Даниял 7

Даниялил макьу

1Белшацар Вавилоналъул пачалъун вахъун тӀоцебесеб соналъ#7:1 Цебесеб эраялъул 553 с., къаси бусада вегун вукӀаго, Даниялида цо хӀикматал макьаби рихьана ва гӀаламатал цере тӀамуна. Гьес гьеб киналъулго хӀакъалъулъ хъвай-хъвагӀай гьабуна. Гьале гьеб хъвай-хъвагӀай:

2«Дида, Даниялида, сардилъ цебетӀамиялдалъун бихьана зобалазул ункъго гьуриги бахъун, гьез кӀудияб ралъад багъаризабулеб. 3Цинги ункъго кӀудияб цоцада релълъинчӀеб жанавар бачӀана ралъдалъа къватӀибе.

4ТӀоцебесеб букӀана гъалбацӀалда релълъараб, цӀудул куркьбалги ругеб. Дун балагьун вукӀаго, гьелъул куркьби тӀун ана ва гьаваялда букӀараб гьеб жанавар, цинтӀаго, инсан гӀадин, кӀиго хӀатӀида эхетана. Гьелъие инсанасул гӀакълуги кьуна.

5КӀиабилеб жанавар квачӀид бахъараб циялда релълъараб букӀана ва гьелъул кӀалдиб ккун лъабго ракьа букӀана. Лъицаялиго гьелда абуна: „Бахъа, гӀорцӀизегӀан гьан кванай!“ – ян.

6Хадуб дида цоги, цӀиркъалда релълъараб жанавар бихьана. Гьелъул мугъалда хӀинчӀ-хъумуралъул гӀадаб ункъго кваркьи букӀана. Гьеб букӀана ункъбетӀераб жанавар, ва гӀадамазда тӀад ихтияр кьуна гьелъухъе.

7Гьелдаго хадуб дида бихьана ункъабилеб жанавар – тӀаде балагьизе хӀинкъараб, гӀасияб, кутакалда къуватаб. Гьелъул чӀахӀиял маххул гажал рукӀана; гьелъ гъура-хъурун кваналеб букӀана кодобе щварабщинаб, хутӀарабщинабги хӀатӀикь мерхьунеб букӀана. Цогидал жанаваразда релълъараб букӀинчӀо гьеб, гьелъул анцӀго лълъарги букӀана.

8Дун гьел лълъурдузухъ валагьун вукӀаго, гьезда гьоркьосан цоги гьитӀинаб лълъар баккун бачӀана, ва гьелъие бакӀ гьабизелъун лъабго лълъар кьолболъанго бахъун нахъе рехана. Гьеб лълъаралда инсанасул гӀадал берал рукӀана ва гӀамал кӀодого гаргадилеб кӀалги букӀана.

9Хадуб дида бихьана

тахбакӀал лъолел,

ва Жив Даимав тахида гӀодов чӀолев.

Гьесул ретӀел – гӀазу гӀадаб хъахӀаб,

ботӀрода расги – бацӀцӀадаб хъахӀаб квасалда релълъараб.

Гьесул тахбакӀ – цӀадулъ босун бугин ккола,

тахил гьакибераздасаги цӀа бурула.

10Гьесда цебесан бачӀун,

цӀадул гӀор чвахула.

Аза-азаргоял Гьесие хъулухъалъе чӀун руго,

нус-нусазарго Гьесда цере рахъун чӀун руго.

Диваналде къачӀана,

ва тӀахьал рагьана.

11Доб гьитӀинаб лълъар гӀамал кӀодого кӀалъалеб букӀиндал, гьелъухъ балагьун хутӀун вукӀана дун. Ахирги гьеб жанавар чӀвана ва гьелъул къаркъалаги, гъура-чункун цӀадулъеги рехун, бухӀана. 12ХутӀарал жанаваразухъа гьезие кьун букӀараб ихтияр нахъе бахъана, амма дагьабги заманаялъе чӀаго тана гьел.

13Макьилъ дун валагьана ва гьале,

зобалазул накӀкӀалгун цадахъ ГӀадамил Лъимерин кколев щивалиго чи унев вуго.

Жив Даимасда аскӀове гӀунтӀана Гьев ва Гьесда цеве вачун вачӀана.

14Гьесие кьуна ихтияр, къудрат ва парччахӀлъи –

щибаб халкъалъул, къавмалъул, мацӀалъул ва миллаталъул гӀадамал Гьесие мукӀурлъизе рукӀине.

Гьесул ихтияр – абадул абадияб, кидаго ахир гьечӀеб,

ва Гьесул парччахӀлъи щулияб, кидаго тарулареб.

Макьуялъул магӀна

15Дун, Даниял, гьел церетӀамияз кутакалда хӀинкъизавун, рахӀат хун лъугьана. 16Дун гьенир эхетаразул цоясда аскӀове вилълъана, ва дица гьеб киналъулго хӀакъаб магӀна щибилан цӀехана. Гьес дида бицана: 17„Ункъго кӀудияб жанавар ккола дунялалда букӀине бугеб ункъго пачалъи. 18Амма ахир-къадги тӀолабго пачалъи ТӀадегӀанасул халкъалъухъе кьезе буго ва абадул абадиялъе гьезул кверщаликь букӀине буго“.

19Ункъабилеб жанаваралъул магӀнаги лъазе бокьун букӀана дие – цогидал жанаваразда жиб релълъинчӀеб, бищунго гӀасияб, маххул гажалги мазгарул малъалги ругеб, кодобе щварабщинаб гъурун-хъурун кваналеб, хутӀарабщинабги жинца хӀатӀикь мерхьунеб. 20Жеги дие лъазе бокьун букӀана гьелъул анцӀабго лълъаралъулги ахиралда бижараб лълъаралъулги магӀна – жиндие бакӀ кьезе гӀоло цогидаб лъабго лълъар бортараб, хадуб бищун кӀудияб гӀураб, бералги ругеб, гӀамал кӀодого кӀалъалеб кӀалги бугеб. 21-22Дида бихьана гьеб лълъаралъ БетӀергьанасул халкъгун рагъ гьабулеб ва, ахир-къадги Жив Даимав вачӀинегӀан, гьезда тӀад бергьенлъи босулеб. Цинги Гьес гьеб лълъаралъе диван къотӀана, ТӀадегӀанасул халкъ ритӀухъ гьабуна ва пачалъи гьезул ихтияралде кьуна.

23Гьес дида абуна: „Ункъабилеб жанавар ккола дунялалда букӀине бугеб ункъабилеб пачалъи. Гьеб цере рукӀараздаса батӀияб букӀине буго; гьелъ тӀолабго дунял кваназе, гъуризе ва щущахъ биххизабизе буго. 24АнцӀго лълъар ккола гьеб пачалъиялда жаниса вачӀине вугев анцӀго пача. Хадув вачӀине вуго батӀияв пача, гьезда релълъинчӀев; гьес лъабго пача жиндирго кверщаликье ккезавизе вуго. 25ТӀадегӀанасда данде чӀун кӀалъазе вуго гьев, ва ТӀадегӀанасул халкъалда тӀад зулму-хӀал гьабизе буго гьес. Диниял байрамал ва Къанун хисизабизе лъугьина гьев. Бичасул халкъ гьесул кверщаликье кьела цо лъагӀалие, кӀиго лъагӀалие ва бащдаб лъагӀалие#7:25 Цо лъагӀалие, кӀиго лъагӀалие ва бащдаб лъагӀалие – гьеб ккола лъабго лъагӀелгун бащдаб.. 26Хадуб гьесие диван къотӀила ва гьесухъа ихтияр нахъе бахъила; абадиялъего тӀагӀинавила гьев. 27Дунялалъулго пачалихъазул гучги, бечелъиги, къудратги кьела божаразул – ТӀадегӀанасул халкъалъул – ихтияралде. Гьесул парччахӀлъи – абадияб-даимаб! Гьаб дунялалъул тӀолалго бутӀрул Гьесие мукӀурлъизе руго ва Гьесие хъулухъалъе эхетизе руго“.

28Гьанир лъугӀана дир церетӀамиял. Дун, Даниял, кутакалда рахӀат хун, гьурмал кьерги тӀун, пикрабаз чӀвалев вукӀана. Амма дица гьеб кинабго балъго рекӀелъ жаниб цӀунун тана.

Currently Selected:

Даниял 7: АварАК

Highlight

Copy