2 Пачаби 5

Давуд тӀолабго ГӀизраилалъул пачалъун вахъин

1ГӀизраилалъул тӀолалго агьлаби рачӀана Давудихъе Хевроналде ва гьез абуна:

«Гьале, дурги нижерги цо умумул руго. 2Цебе жеги Шаул чӀаго вугеб мехалдаго дуца рагъда цебехъанлъи гьабуна ГӀизраилалъе. БЕТӀЕРГЬАНАС дудалъидал абун букӀараб: „Дуца вехьлъи гьабизе буго Дир гӀизраил халкъалъе#5:2 Халкъалъе вехьлъи гьаби – гьелъул магӀна ккола халкъалъе цевехъанлъи гьаби абураб. ва ГӀизраилалда тӀад пачалъун мун вукӀине вуго“, – ян».

3ГӀизраилалъул киналго чӀахӀиял чагӀи Давудихъе Хевроналде рачӀиндал, БЕТӀЕРГЬАНАСДА цебе дугӀаги гьабун, гӀизраилазулгун къотӀи-къай гьабуна Давудица; ГӀизраилалда тӀад гьесул пачалъи тасдикъ гьабун, зайтуналъул нахги бахана Давудида.

4Лъеберго сон барав чи вахъана Давуд пачалъун ва гьес кӀикъого соналъ пачалъи гьабуна: 5Хевроналда чӀун Ягьудиялда тӀад – анкьго сонгун анлъго моцӀалъ, Иерусалималда чӀун тӀолабго ГӀизраилалда ва Ягьудиялда тӀад – лъебералда лъабго соналъ.

Давудица Иерусалим кверде боси

6Жиндирго рагъухъабигун Иерусалималде къокъана Давуд, гьениб чӀел гьабурал евусиязде тӀаде кӀанцӀизелъун. Гьез Давудида абуна: «Дуца хӀетӀе чӀеларо гьаниб, рекъал-беццазцин нахъе къотӀула мун».

Гьезул ракӀчӀун букӀана Давудида гьениве жаниве ворчӀизе бажарунгутӀиялда. 7Амма Давудица гьезухъа Сион хъала бахъана. Гьанже гьелда Давудил Шагьарилан абула.

8Цинги Давудица рагъухъабазда абуна: «Евусиял гъуризе бокьун батани, ракьулъ бугеб лъадал рахъккун ун нух бахъе дол Давуд рихарал#5:8 Ялъуни, Давудида рихарал. „рекъа-беццазухъе“», – ян. (Гьелъин аби бугеб: «Рекъавги беццавги БетӀергьанасул Рокъове жаниве лъугьинаро», – ян.)

9Давуд хъалаялъуве вахъана ва гьелда Давудил Шагьарилан цӀар тана. Гьес гьенир, Миллоялда#5:9 Милло – сверухъе къедги бан, жанисан ракь мерхьун гьабураб борхалъи, тӀад бакӀалги рараб. сверухъ ва жанисеб рахъалда, цӀиял бакӀал рана. 10Давуд тӀадеялдаса тӀаде къуватлъулев вукӀана, щайгурелъул Гучал Аскаразул БЕТӀЕРГЬАН Аллагьас сундулъго кумек гьабулеб букӀиндал гьесие.

11Тиралъул пача Хирамица чапарзаби ритӀун рачӀана Давудихъе. Давудие кӀалгӀа базе кедр#5:11 Кедр – накӀкӀигъутӀбузул цо къимат цӀикӀкӀараб тайпа. гъотӀол цӀулги цӀулал ва ганчӀил устарзабиги ритӀун рачӀана гьес. 12Давудида бичӀчӀана БЕТӀЕРГЬАНАС жив ГӀизраилалда тӀад пачалъун тасдикъ гьавун вукӀин ва Жиндирго гӀизраил халкъалъе гӀоло гьесул пачалъи кӀодо гьабураблъи.

Иерусалималда гьарурал Давудил васал

13Хеврон тун хадусала Иерусалималдаги жеги лъудби-гъаравашал рачана Давудица ва гьез жеги лъимал гьаруна гьесие. 14Гьале гьесие Иерусалималда гьарурал васазул цӀарал: ШаммуагӀ, Шовав, Натан, Сулейман, 15Ивхар, ЭлишуагӀ, Нефег, ЯфиагӀ, 16ЭлишамагӀ, ЭлиядагӀ ва Элипелет.

Пилистимал къезари

17Давуд ГӀизраилалда тӀад пачалъун вахъун вугин рагӀидал, пилистимазул тӀолабго аскар къватӀибе бахъана гьев кверде восизе къасдгун. Гьеб хабар рагӀидал, Давуд хъалаялъуве вилълъана. 18Пилистимал рачӀун Рефаим расалъиялда къайи чӀван чӀана.

19БЕТӀЕРГЬАНАСУЛ амру цӀехон дугӀа гьабуна Давудица: «Пилистимазда данде вагъун лъикӀдай дун? Кьеладай Дуца гьел дир кверде?» – янги абун.

БЕТӀЕРГЬАНАС гьесие жаваб гьабуна: «Гьезда данде вахъа. Дица духъе кверде кьечӀого толаро гьел».

20Давуд БагӀал-Перацималде вилълъана ва гьенир пилистимал гъурана. «КъвачӀа борлъун къватӀибе кӀанцӀараб лъим гӀадин щущахъ разаруна БЕТӀЕРГЬАНАС дир тушбаби», – ян абуна цинги Давудица. Гьединлъидал гьеб бакӀалда цӀар БагӀал-Перацим#5:20 БагӀал-Перацим – БетӀергьанас борлъана абураб магӀна ккола гьеб цӀаралъул. абун тана.

21Пилистимаз жидерго аллагьзабазул цӀулал ва ганчӀил статуяби гьенир ругелъурго рехун тана; Давудицаги гьесул рагъухъабазги гьел нахъе ракӀарана.

22Пилистимал нахъеги рачӀун Рефаим расалъиялда къайи чӀван чӀана. 23Давуд БетӀергьанасул амру цӀехон Гьесда цеве эхетана. БЕТӀЕРГЬАНАС гьесие жаваб гьабуна:

«Гьаб рахъалдасан кӀанцӀуге гьезда тӀаде; гьезул хьибилсверун ун, бигьародул гъутӀби ругеб рахъалдасан тӀаде кӀанцӀе. 24Гьел гъутӀбузул каралъан лъелго унеб бодул гӀадаб хӀатӀил гьаракь рагӀидал, партӀан рагъ байбихье нужеца, щай абуни, гьелъул магӀна ккола БЕТӀЕРГЬАН пилистимазул аскар гъуризе нужеда цеве-цеве унев вугин абураб».

25Давудица кинабго БЕТӀЕРГЬАНАС малъухъе гьабуна ва Геваялдаса рахъарал Гезералде щвезегӀан пилистимал гъурана.

Currently Selected:

2 Пачаби 5: АварАК

Highlight

Copy