Пётрил кӀиабилеб кагъат 3

3 бетӀер

ГӀиса МасихӀ кӀиабизеги вачӀина

1Гьале дица нужехъе кӀиабизеги кагъат хъвалеб буго, дир хириял. Гьал кагътазда жаниб дица хӀаракат бахъулеб буго, нужеда ракӀалде щвезабун, нужелъ рацӀцӀадал пикраби рижизаризе. 2Бичасул аварагзабаз абурал рагӀаби ва нужехъе рачӀарал чапарзабаз бицараб нилъ хвасар гьарурав ТӀадегӀанасул амру нужеца ракӀалдаса ине биччаге.

3Сундасаго цебе нужеда лъазе ккола дуниялалъул ахирисел къоязда рачӀине рукӀин жидерго къасдазул нухдасан унел ва намус гьечӀел гӀадамал. 4ГӀад-хочӀ гьарун, гьез абизе буго: «ВачӀинилан рагӀи кьурав гьев щайха вачӀунев гьечӀев? Гьале нилъер умумулги цереса ана, амма кинабго хутӀун буго дуниял бижараб мехалъго букӀараб хӀалалда, щибго хиси ккечӀого». 5Гьезда кӀочон толеб буго авалалдаго, Аллагьас амру гьабун, зобалги ракьги рижун рукӀараблъи. Ракь бижана лъададасан ва лъададалъун. 6Цинги гьеб тӀупаналъул лъадалъ тӀерхьана. 7Гьанже ругел зобалги ракьги Суд гьабулеб къо щвезегӀан цӀунизе руго Аллагьас. Суд гьабулеб къоялъ зобалги ракьги рухӀун лъугӀила, киналго пасатал гӀадамаздеги хвел рещтӀина.

8Нужеда кӀочон тоге, дир хириял, БетӀергьанасе цо къоги азарго сон гӀадин букӀунеблъи, азарго сонги цохӀо къо гӀадин букӀунеблъи. 9Гьев кватӀулев вугилан цо-цо гӀадамаз рикӀкӀунеб бугониги, БетӀергьан кватӀулев гьечӀо кьураб рагӀи тӀубазабизе. ХӀакъикъаталда гьес сабру гьабулеб буго: гьесие бокьун гьечӀо нужер щивниги гӀадада хвезе – бокьун буго киналго кантӀун жиндего руссине. 10ТӀадегӀанасул Къо бачӀине буго тохлъукьего, цӀогьор гӀадин. Гьеб Къоялъ, кутакалда гъугъадун, зобал тӀубанго тӀагӀина, дуниялалда бугебщинаб цӀа рекӀун бухӀила. Гьебмехалъ къватӀирчӀвала ракьалда лъугьарал тӀолалго ишал. 11Кинабго гьедин биххун-щущан инехъин бугелъул, нужеца гьабизе ккола бацӀцӀадаб ва Аллагьасде мутӀигӀаб гӀумру. 12Аллагьасул Къо бачӀиналъухъ – цӀа рекӀун зобал щущан унеб ва зобалазда ругелщинал цӀадулъ риун унеб къо бачӀиналъухъ – ралагьун чӀун руго нуж, хехго бачӀагиян гӀашикълъун руго! 13Нилъ ралагьун чӀун руго, гьес рагӀи кьураб къагӀидаялъ, цӀиял зобал ва цӀияб ракь бижиялъухъ. Гьенибин ритӀухълъи букӀунеб!

14Гьединлъидал, дир хириял, гьеб къо бачӀиналъухъ ралагьун чӀун, рацӀцӀадаллъун, гӀайиб гьечӀеллъун ва Аллагь разилъулеллъун рукӀине хӀаракат бахъе. 15Нужеда лъазе ккела БетӀергьанасул кӀудияб сабруялдалъун нуж хвасарлъизе рукӀин. Аллагьас гьесие кьураб гӀакъиллъиялдалъун гьелъул хӀакъалъулъин нужеда бицараб нилъер хирияв вац Павелицаги. 16Гьес гьелъул хӀакъалъулъ бицунеб буго жиндирго киналго кагътазда. РичӀчӀизе захӀматал жалги руго гьенир, лъавукъал ва цо хӀал кколарел гӀадамаз, цогидал тӀухьдузда хъваралъулго гӀадин, гьезулги магӀна мекъи сверизабула, – жидедего гӀасияб балагь бачӀиналъе сабаблъун ккезе. 17-18Нужеца, дир хириял, нужеда гьеб цебеккунго лъалелъул, нужго цӀуне! Намус гьечӀел гӀадамазул гьересиялъ хадур цӀазе ва мугъчӀвазе бугеб щулияб сангаралдаса махӀрумлъизе чӀоге! Нилъер ТӀадегӀанав ва нилъ хвасар гьарурав ГӀиса МасихӀги гьесул лъикӀлъиги лъикӀго ва цӀикӀкӀун лъазабун, нужго камиллъе. Гьесие рецц гьанжеги ва абадул абадиялъги. Амин.

Currently Selected:

Пётрил кӀиабилеб кагъат 3: АварАК

Highlight

Copy