Пётрил кӀиабилеб кагъат 2
2
2 бетӀер
Гьересиаварагзабиги гьересинасихӀатчагӀиги
1Амма ГӀизраилалъул халкъазда гьоркьор гьересиаварагзаби рукӀаралго гӀадин, нужеда гьоркьорги рукӀине руго гьересинасихӀатчагӀи. Гьез нужехъе балъгого росун рачӀина кина-щинабго щущазабулел гьерсал. Гьез инкар гьабизе буго жалго тархъан гьарурав ТӀадегӀанав ПарччахӀасдаса, гӀасияб гӀажал жидедаго тӀаде хехгого цӀазе буго. 2ГӀемерисез мисал босила гьезул пасалъиялдаса, ва гьеб бихьидал гӀадамал хӀакъабщиналъул нух какизе лъугьина. 3Гьел руго гӀорцӀиго лъаларел чагӀи. Жидецаго ургъун рахъарал харбалги нужее рицун, лъикӀго бечелъила гьел. Амма гьезие некӀого къотӀараб хӀукму кватӀизе гьечӀо, гьезде бачӀинесеб балагь-гӀазабги гъапуллъун гьечӀо!
4Мунагь гьабурал малаикзабаздагицин гурхӀичӀо Аллагь: гьес гьел жужахӀалъур тӀамуна ва Суд гьабулеб къо тӀаде щвезегӀан бецӀлъиялъул рахсаца рухьун тана. 5РитӀухълъи тӀибитӀизабизе витӀарав НухӀги ва гьесда цадахъ анкьго чиги хутӀизегӀан, цогидал гӀадамаздаги гурхӀичӀо Аллагь, мунагь-хӀакъалъул агьлуялде тӀупан тӀураб мехалда. 6Содом ва Гоморра шагьарал щущазаризе хӀукмуги гьабун, гьел рохъоялде сверизаруна, гьез гӀадинаб пасалъи хадубккунги гьабулезе дарслъун букӀине. 7Амма Аллагьас хвасар гьавуна гӀорхъулъа борчӀараб хъахӀбалъиялде руссарал гӀадамазул хьвада-чӀвадиялъ тату хвезабурав ва вацӀцӀадго чӀарав ЛутӀ. 8Гьезда гьоркьов вацӀцӀадго хьвадарав гьев чиясул бацӀцӀадаб рекӀее щибаб къоялъ гӀазаб кьолаан гьез гьабулебщинаб бихьулебги рагӀулебги букӀиналъ. 9БетӀергьанасда лъала рацӀцӀадал гӀадамал гӀакъуба-къварилъиялдаса хвасар гьаризе, пасатал чагӀазейин абуни, Суд гьабулеб къо тӀаде щвелалдегоцин тамихӀ гьабичӀого толаро. 10Жидерго гьаваялъ рижизарурал хъубал къасдазда хадур унел ва гьесул амруял рикӀкӀинего рикӀкӀунарел гӀадамазе бищун цӀикӀкӀараб тамихӀ гьабула Аллагьас.
Гьел адаб гьечӀел ва намусги гьечӀел гӀадамал хӀинкъуларо зобалазда ругел къудратал малаикзаби какизе. 11Гьел квешал гӀадамаздаса гӀемерго къуватал ва гучал ругониги, малаикзаби намуслъула БетӀергьанасда цебе гьединал гӀадамазда гӀайиб чӀван гьел какизе. 12Гьел гӀадамал релълъуна гудраца кквезе ва чӀвазе рижарал гӀакълу гьечӀел хӀайваназда. Жидер гӀакълу нахъгӀунтӀуларебщинаб какула гьез. ЧӀвазе рижарал хӀайванал гӀадин, хвалде гӀагарлъула гьел. 13Жидеца гьабураб квешлъиялъухъ шапакъатлъун квешлъи щвела гьезие.
ГӀадада-къад гьабулеб пасатаб гьекъел-кванай гьуинаб буго гьезие. Гьел руго инжитал ва хъубал гӀадамал. Гьез лазат босула нужеда цадахъ цо хӀарччида нахъа гӀодор чӀараб мехалъгицин нуж гуккулел рукӀиналдаса. 14ХъахӀбалъиялъул гурони пикруги гьабуларо, мунагьал гьарунги гӀорцӀуларо. РакӀ загӀипал гӀадамал гьез къорикье ккезарула. ХъантӀиялъе куцун руго гьез жалго. Аллагьасул нагӀанаялъе мустахӀикълъана гьел!
15БитӀараб нухги тун, къосун ккун руго гьел. Квешлъиялъухъ щолеб гӀарцуца къосинавурав Беъорил вас БилгӀамил нухдасан ана. 16Амма гьес гьабулеб букӀараб квешаб къасд къватӀиб чӀвана: мацӀ лъалареб жиндирго хӀамица, инсанасул мацӀалдалъун кӀалъан, гьеб гӀантаб жо гьабизе биччачӀо.
17Гьел гӀадамал релълъуна ракъварал иццазда, гьороца хъамулел накӀкӀазда! Гьезие хӀадурун буго жужахӀалъул абадияб бецӀлъи. 18Гьезул кӀалдир ругьунлъун руго жалго реццулел ва гьодорал рагӀаби. Къосараб гӀумру гьабулездаса гьанжего-гьанже рикӀкӀалъизе байбихьарал гӀадамал гьез квегъун буссунареб чорхол гьаваялъул гьиналъ кквезе тӀамула. 19Гьел гьересинасихӀатчагӀаз рагӀи кьола гӀадамал жидеца тархъан гьарилилан, амма гьел жалго руго пасалъиялъул лагъзал. Бергьарасул лагълъун къурав кколелъулха! 20Нилъер ТӀадегӀанав ва нилъ хвасар гьарурав ГӀиса МасихӀ лъаялдалъун гьел гьаб дуниялалъул къабихӀлъиялдаса рикӀкӀалъун рукӀана, амма кӀиабизеги нухкъосуде ккеялъ къезаруна. Цебе букӀаралдасаги квешаб хӀалалде ккана гьел 21БитӀараб Нух лъан букӀинчӀебани лъикӀаб букӀинаан гьезие, гьеб нухги лъан хадуб гьезде божилъи гьабураб илагьияб амруялдаса кьуризегӀан! 22Гьезие лъугьараб жоялъ бихьизабула гьадинал кицаби ритӀарал рукӀин:
«Гьве тӀадбуссун бачӀуна жинцаго лагӀараб жо чӀикӀизе»
ва
«Чурун хадубги болъон хӀарщулъ гебегахъдула».
Currently Selected:
Пётрил кӀиабилеб кагъат 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
