4 Пачаби 5
5
Нааман барасалъул унтудаса сахлъи
1Нааман вукӀана Сириялъул пачаясул аскаразул бетӀер. Пачаясеги кутакалда къиматав, къадруяв чи вукӀана гьев, щайгурелъул БЕТӀЕРГЬАНАС гьесдасан Сириялъе бергьенлъи кьун букӀиндал. Лебалав рагъухъан вукӀана гьев, амма барасалъул унтиялъ#5:1 Барас – черхалда хъахӀаб къара чӀвазабун, инсанасул тӀом пасат гьабулеб, квешаб ва кутакалда захӀматаб унти. Мусал Къануналда рекъон, барасалъ унтарал гӀадамал хъублъарал чагӀилъун рикӀкӀунаан ва диналъул агьлуялда гъорлъе риччалароан. тату хвезабун букӀана. 2Цо нухалъ чабхъаде рахъарал Сириялъул рагъухъабаз ГӀизраилалдаса хъамурай яс йикӀана Нааманил лъадул цеетеллъун. 3Гьелъ жиндирго хважаиналда абуна: «Самариялда вугев авараг вихьизеанищ бетӀерчӀахъаяв дир хважаинасда! Гьес сахлъизавилаан гьев барасалъул унтудаса».
4Нааман вилълъана пачаясухъе ва ГӀизраилалдаса ясалъ абураб кинабго жо гьесда бицана. 5«Гьайгьай, мун ине ккола, – ян жаваб кьуна Сириялъул пачаяс. – Дицаги ГӀизраилалъул пачаясухъе кагъат хъвала».
Цинги Нааман нухде вахъана; сайгъаталъе анцӀго талант#5:5 10 талант – гӀага-шагарго 360 кило. гӀарцул, анлъазарго шекел#5:5 6000 шекел – гӀага-шагарго 70 кило. меседалъул ва анцӀго цӀияб ретӀел-кунги босана цадахъ. 6Гьес ГӀизраилалъул пачаясухъе босун бачӀараб кагътида хъван букӀана: «Гьаб кагъатгун дица дир лагъ Нааман витӀулев вуго духъе, дуца гьев барасалъул унтудаса сах гьавизе вукӀине», – ян.
7Гьеб кагъат цӀалун хадуб ГӀизраилалъул пачаяс тӀад букӀараб ретӀел бихъ-бихъана ва гьес абуна: «Я рухӀ бахъизе, я чӀаго гьаризе, дун Аллагьищ вугев? Щай гьас барасалдаса сах гьавеянги абун дихъе гьав чи витӀарав? Балагье цо, гьас диргун питна балагьулеб бугеб куц!»
8ЭлишагӀ аварагасда гьелъул хабар рагӀарабго гьес пачаясухъе ругьел битӀана: «Щай дуца чара хун ретӀел бихъулеб? Дихъе витӀе гьев чи ва гьесда бихьила ГӀизраилалда авараг вукӀин».
9Чуялгун ва чолгьакалгун вачӀана Нааман ва ЭлишагӀ аварагасул минаялъул кавуда цеве лъалхъана. 10Цинги ЭлишагӀица цо чи витӀун вачӀана гьесухъе гьадинаб рагӀигун: «Иордан лъарахъеги ун, гьенив анкьго нухалъ лъадалъ ччун вахъа, цинги сахлъила мун ва бацӀцӀалъила дур черх».
11Амма Нааманил кутакалда ццин бахъана гьеб бакӀалда. «Дун вукӀана гьев живго къватӀиве вачӀинин дихъе ва жиндирго БЕТӀЕРГЬАН Аллагьасул цӀарги ахӀун, дир унтараб бакӀалде квер хьвагӀилин ва дун барасалъул унтудаса вацӀцӀад гьавилин!» Гьединги абун нахъе ана гьев. 12«ГӀизраилалъул киналго лъараздаса цӀакъал гьечӀищ Дамаскалъул лъарал Аванаги Парпарги? Гьенив чвердон вацӀцӀалъизе кӀоларогойищ дун вукӀарав?!»
Гьедин кьурун вуссун кутакаб ццидада ана гьев гьениса. 13Нааманил церетелал рачӀана цинги гьесда аскӀоре ва гьез абуна: «Я нижер эмен, аварагас цоги цо захӀматаб жо гьабеян дуда абун букӀарабани, дуца гьеб гьабилароанищ? Досин абуни цохӀо чвердеян ва мун вацӀцӀалъилин абуна дуда».
14Цинги гьев вилълъана, ЭлишагӀица абухъе анкьго нухалъ Иорданалда ччун вахъана, ва гьесул черх сахлъун лъимадул гӀадин бацӀцӀалъана. 15Цадахъ жиндирго чагӀазул къокъагун Нааман ЭлишагӀихъе нахъвуссана. Гьесда цевеги вачӀун гьес абуна: «Гьанже лъана дида ГӀизраилалда гуреб тӀокӀаб кибго дунялалда Аллагь гьечӀевлъи. Гьарула дуда, къабул гьабе дир, дур лагъасул сайгъат-салам».
16Аварагас жаваб гьабуна: «Дица Жиндие бетӀер чӀвалев хӀакъав БЕТӀЕРГЬАНАСУЛ цӀаралхӀа, щибниги босиларо». КигӀан Нааманица гьараниги гьес инкар гьабуна сайгъаталдаса.
17«Дуца дир сайгъат къабул гьабулеб батичӀони, – ян абуна Нааманица, – гьарула дуда, кӀиго гӀорцӀеналда лъураб ракь#5:17 ГӀизраилал гурел, батӀиял халкъазул гӀемерисел чагӀи божулаан Аллагьасе как-дин Гьесул халкъалъул ракьалда, ялъуни гьениса босараб ракьул гьабураб къурбаналъе бакӀалда цебе гурони гьабизе бегьуларин. босизе изну кье дие гьаниса. Гьанжеялдаса нахъе дица киданиги БЕТӀЕРГЬАНАСЕ тун батӀиял аллагьзабазе ракълил къурбаналги, тӀуран рухӀулел къурбаналги тӀокӀалъ хъвезе гьечӀо. 18Амма цо жо тӀаса лъугьун таги дие БЕТӀЕРГЬАНАС: Риммоние#5:18 Риммон – сириязул пири-гъугъадиялъул аллагь. тӀагӀат-гӀибадат гьабизе гьесул мукъадасаб рокъове дир пача лъугьунаго, гьес дир квер ккола ва гьесда цадахъ дунги суждаялда чӀезе ккола. Риммонил рокъов дун суждаялда чӀолаго БЕТӀЕРГЬАН тӀаса лъугьаги дидаса». 19«Парахат нухда а дурго», – ян абуна ЭлишагӀица.
Нааманица нухлул цодагьаб манзил тун букӀана, 20цинги ЭлишагӀил лагъ Гехазица пикру гьабуна: «Дир хважаинас дов сирияв, цониги сайгъатги досухъа босичӀого, гӀадада виччан тана. ХӀакъав БЕТӀЕРГЬАНАСУЛ цӀаралхӀа, дун досда хадув вортила ва досухъа щиб букӀаниги диего босила». 21Гехази Нааманида хадув векерана. Гьев векерун вачӀунев вихьун, гьесда дандчӀвазе чолгьакидаса гъоркье рещтӀана Нааман.
«ЩибгӀаги ккараб жо бугищ?» – ин цӀехана гьес. 22«ГьечӀо, – ян абуна Гехазица. – Дир хважаинас витӀана дун духъе ругьелгун: „Аварагзабазул кӀиго гӀолохъанчи вачӀун вуго дихъе Ефраимил тӀалъиялдаса. Гьарула дуда гьезие талант#5:22 Талант – гӀага-шагарго 36 кило. гӀарцулги кӀиго ретӀел-кунги кьеян“, – абун». 23«Гьайгьай! КӀиго талант босе», – ян абуна Нааманица.
Гьес кӀиго ретӀелгун цадахъ кӀиго къандалъоде жанибе бараб кӀиго талант гӀарцулги босинабуна Гехазида. Гьес жиндирго церетелазул кӀигоял ритӀана Гехазида цере-цере гьебги босун. 24ГохӀде щваравго, Гехазица гьезухъаги босун, жиндирго рокъоб жаниб бахчана гьеб. Нааманил церетелалги тӀадруссун жиндирго нухда ана. 25Хадув гьев жиндирго хважаин ЭлишагӀ аварагасда цеве вилълъана.
«Кив мун вукӀарав, Гехази?» – ян цӀехана ЭлишагӀица. «Дун кивего ун вукӀинчӀо», – ян жаваб гьабуна Гехазица.
26Амма ЭлишагӀица гьесда абуна: «Дуда цадахъ гурищ дир ракӀ букӀараб, дуда дандчӀвазе дов чи чолгьакидаса гъоркье рещтӀунеб мехалъ? ГӀарацги, ретӀелги, зайтуналъул гъутӀбузул расалъабиги, цӀолбол ахалги, гӀи-боцӀул рехъабиги, лагъзалги, гъараващалги тӀалаб гьаризе рекъараб заманищ гьаб бугеб? 27Гьанже биччанте Нааманил барасалъул унти дуде ва дур наслуялда тӀаде ккезе абадиялъго».
Барасалъ тӀуван гӀазу гӀадин хъахӀлъун вачӀана Гехази ЭлишагӀида аскӀоса къватӀиве.
Currently Selected:
4 Пачаби 5: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
