4 Пачаби 2
2
Иляс авараг зобалазде хъами
1БЕТӀЕРГЬАНАС буран бахъинабун, Иляс авараг зобалазде хъамизе хӀукму гьабуна. Илясги ЭлишагӀги Гилгалалдаса къватӀире рачӀунел рукӀана гьеб мехалъ. 2Илясица ЭлишагӀида абуна: «Мун гьанив чӀа; БЕТӀЕРГЬАНАС дун Бет-Элалде витӀун унев вуго». Амма ЭлишагӀица абуна: «ХӀакъав БЕТӀЕРГЬАНАСУЛ цӀаралхӀа ва дур гӀумруялхӀа – дун дудаса вичӀиларо!» – ян.
Цинги гьел Бет-Элалде ана. 3Бет-Элалдаса аварагзабазул къокъа бачӀана ЭлишагӀида данде ва гьез цӀехана: «Дуда лъалищ жакъа Зобалазул БЕТӀЕРГЬАНАС дур хважаин вачун ине вугевлъи?» «Лъала, – ян жаваб гьабуна гьес. – РуцӀцӀун чӀа».
4Цинги Иляс аварагас гьесда абуна: «ЭлишагӀ, мун гьанив чӀа, дун БЕТӀЕРГЬАНАС Ерихоналде витӀун унев вуго». Гьес жаваб кьуна: «ХӀакъав БЕТӀЕРГЬАНАСУЛ цӀаралхӀа ва дур гӀумруялхӀа – дун дудаса вичӀиларо!» – ян.
Цинги гьел Ерихоналде рилълъана. 5Ерихоналдаса аварагзабазул къокъа бачӀана гьенибги ЭлишагӀида аскӀобе ва гьез абуна: «Зобалазул БЕТӀЕРГЬАНАС жакъа дур хважаин дуда аскӀоса нахъе вачун ине вукӀин лъалищ дуда?» «Лъала, – ян жаваб гьабуна гьес. – РуцӀцӀун чӀа».
6Илясица ЭлишагӀида абуна: «Мун гьанив чӀа, БЕТӀЕРГЬАНАС дун Иорданалде витӀун унев вуго». Амма ЭлишагӀица абуна: «ХӀакъав БЕТӀЕРГЬАНАСУЛ цӀаралхӀа ва дур гӀумруялхӀа – дун дудаса вичӀиларо!» – ян.
Цинги гьел цадахъ нухде рахъана. 7Гьел кӀиялго Иордан лъарахъе щваралго, Аварагзабазул кӀикъоялда анцӀго чи вачӀана ва цодагьал нахъегӀанги къан, гьезда дандритӀун гьезухъ халккун чӀана. 8Иляс аварагас гӀаба тӀаса бахъана, гуризеги гьабун гьеб лъадада кьабуна. Цинги лъим рахъ-рахъалде бикьун ана ва гьел бакъвараб тӀиндасан доб рахъалде рилълъана. 9Доб рахъалде щваралго Иляс аварагас ЭлишагӀида абуна: «Бице, дун дудаса нахъе вачун иналда цебе дур мурад тӀубазабизе, щиб дица дуе гьабун лъикӀ?» «Дулъ бугеб авараглъиялъул къуват кӀиго нухалъ цӀикӀкӀун щваги дие», – ян жаваб кьуна ЭлишагӀица.
10«ЗахӀматаб жо гьарулеб буго дуца, – ян абуна Илясица. – Дун дудаса нахъе вачун унеб куц дуда бихьани, дуца абухъе букӀина дуе, бихьичӀони – букӀинаро».
11Гьедин хаба-чӀабаралда гьел унел рукӀаго, тохлъукьего цӀадул чуялги рараб, цӀадул чолгьоко баккана ва гьелги ратӀа гьарун, Иляс авараг зобалазде хъамун ана. 12ЭлишагӀ авараг гьеб киналъухъгоги валагьун ахӀдана: «Вай дир эмен! Вай дир эмен! ГӀизраил цӀунараб лебалаб хъергъу! Мун ана гьанже!»
Иляс авараг цевеса тӀерхьидал, гьес ракӀ бакъван, тӀад букӀараб ретӀел бихъана. 13Иляс аварагасдаса бортараб гӀабаги босун гьев нахъвуссун Иордан лъарахъе вилълъана ва гьелъул рагӀалда эхетана. 14Цинги гьес босун Иляс аварагасул гӀаба лъадада кьабуна: «Кив вугев БЕТӀЕРГЬАН – Илясил Аллагь?» – инги абун.
Гьес гьеб лъадада кьабидал, лъим рахъ-рахъалде бикьун ана ва гьев лъарал доб рахъалде вилълъана. 15Ерихоналдаса аварагзабазда бихьана гьеб кинабго ва гьез абуна: «Иляс аварагасул къуват гьанже ЭлишагӀие щун буго», – ян.
Гьел гьесда данде рачӀана ва, гӀодоб бетӀер чӀван, гьесие къулана.
16«Нижер кӀикъоялда анцӀго чи вуго – киналгоги къуватал бихьинал, – ян кӀалъана гьел. – Биччанте гьез инеги ун дур хважаин валагьизе. Щиб лъалеб БЕТӀЕРГЬАНАСУЛ РухӀалъ вачун гьев цо магӀарде, ялъуни расалъиялде рехун ватизе бегьула». «Щалго ритӀизе кколаро», – ян жаваб гьабуна ЭлишагӀ аварагас.
17Амма гьел тӀаса ричӀулел рукӀинчӀелъул, гьес абуна: «Ине риччанте». Цинги гьез кӀикъоялда анцӀго бихьинчи нухде витӀана. Гьез лъабго къоялъ валагьана Иляс авараг, амма ватичӀо. 18Гьел Ерихоналда тарав ЭлишагӀ аварагасухъе тӀадруссун рачӀиндал, гьес гьезда абуна: «Дица унгеян абулеб букӀинчӀищ нужеда?» – ян.
ЭлишагӀ аварагасул мугӀжизатал
19Шагьаралъул жамагӀат кӀалъана ЭлишагӀ аварагасда: «ГӀенекке, нижер бетӀергьан, гьаб шагьар лъикӀаб бакӀалда буго – дудаго бихьула гьеб, амма лъим сахаб гьечӀо гьаниб. Гьелъ нижер ракь хъарцинлъизабулеб буго», – ян.
20«Цо цӀияб гӀорто босе гьанибе, – ян абуна ЭлишагӀица, – цӀамги бай гьенибе жанибе». Гьез гӀорто босун бачӀана. 21Гьев иццул бетӀералде вилълъана, цинги гьенибе цӀамги щван гьадин кӀалъана: «Гьале БЕТӀЕРГЬАНАСУЛ рагӀи: „Дица сах гьабуна гьаб лъим. ТӀокӀаб кидаго гьалъ я хвел, я рижаликълъи ккезабизе гьечӀо“». 22ЭлишагӀ аварагас бицараб рагӀуда рекъон, жакъа къоялъги гьеб лъим бацӀцӀадго буго.
23ЭлишагӀ авараг гьениса Бет-Элалде вилълъана. Гьев нухда унев вукӀаго, шагьаралдаса къватӀибе васазул къокъа бачӀана ва гьел гьев къабихӀ гьавун, гьесда тӀад релъанхъизе журана: «Ле, тӀохӀок, тӀагӀа гьаниса! – ян ахӀдана гьел. – ТӀагӀа гьаниса, тӀохӀок!»
24Цинги гьес, гьездехунги вуссун, БЕТӀЕРГЬАНАСУЛ цӀарги бахъун, гьезие нагӀана кьуна. Гьебмехалда рохьоса къватӀибе кӀиго эбелаб ци бачӀана ва гьез гьезул кӀикъоялда кӀиго вас тӀутӀун вана.
25Хадуб гьес Кармил магӀарде нух босана ва гьениса Самариялде тӀадвуссана.
Currently Selected:
4 Пачаби 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
