4 Пачаби 13
13
Егьоахаз – ГӀизраилалъул пача
1Ахазиягьил вас Егьоаш Ягьудиялъул пачалъун вахъун къоло лъабабилеб соналъ Егьул вас Егьоахаз ГӀизраилалъул пачалъун вахъана, ва анцӀила анкьго соналъ пачалъи гьабуна гьес Самариялда. 2Гьес БЕТӀЕРГЬАНАСДА квешбихьанщинаб гьабуна: ГӀизраилги хадуб цӀан, Наватил вас Яровамица гьарурал мунагьазда хадув ана гьев ва гьел мунагьаздаса кьуричӀо. 3БЕТӀЕРГЬАНАСУЛ ццин бахъана ГӀизраилалде ва гӀезегӀан мехалъ Сириялъул пача Хазаилил ва гьесул вас Бен-Гьададил кверщелчилъиялда гъоркь чӀезаруна Гьес гьел.
4Амма Егьоахаз БЕТӀЕРГЬАНАСДЕ гьардана ва, Сириялъул пачаяс ГӀизраилалъе кьолеб гӀазаб-гӀакъуба бихьун, БЕТӀЕРГЬАНАС къабул гьабуна гьесул гьари. 5Цинги БЕТӀЕРГЬАНАС ГӀизраил хвасар гьабизе чи витӀана, ва гьел Сириялъул кверщаликьа рорчӀана. Цебего гӀадин ракълилаб заман бачӀана гӀизраилазе. 6БукӀаниги, ГӀизраилги хадуб цӀан Яровамица гьарурал, гьесул хъизан-агьлуялъул мунагьазде мугъ рехичӀо гьез; гьелго мунагьазда хадур рилълъана. Ашерал хӀубиги эхетаралъубго букӀана Самариялда.
7КӀикъоялда анцӀго чотӀахъанги, анцӀго чолгьокоги ва анцӀазарго лъелал рагъухъабиги гурони, тӀокӀаб щибго хутӀичӀо Егьоахазил аскаралъул, щайгурелъул Сириялъул пачаяс гьабихъ хӀур гӀадин тӀагӀинаруна хутӀаралщинал.
8Егьоахазил пачалъиялъул хутӀарал лъугьа-бахъинал, кинабго гьес гьабурабщинаб ва гьесул бахӀарчиял ишазул хӀакъалъулъ хъван буго «ГӀизраилалъул пачабазул тарих» абураб тӀехьалда. 9Егьоахаз хвана ва Самариялда жиндирго умумузда аскӀов хабалъ лъуна. Гьесул бакӀалда гьесул вас Иоаш вахъана пачалъун.
Иоаш – ГӀизраилалъул пача
10Егьоаш Ягьудиялъул пачалъун вахъун лъебералда анкьабилеб соналъ Егьоахазил вас Иоаш ГӀизраилалъул пачалъун вахъана, ва анцӀила анлъго соналъ пачалъи гьабуна гьес Самариялда. 11Гьес БЕТӀЕРГЬАНАСДА квешбихьулебщинаб гьабуна. ГӀизраилги хадуб цӀан, Наватил вас Яровамица гьарурал мунагьазул цохӀоги гьоркьоб биччачӀо; гьел мунагьазукь хьвадана гьев.
12Иоашил пачалъиялъул хутӀарал лъугьа-бахъинал, кинабго гьес гьабурабщинаб ва Ягьудиялъул пача Амациягьида данде вагъулаго гьес бихьизабураб бахӀарчилъиялъул хӀакъалъулъ хъван буго «ГӀизраилазул пачабазул тарих» абураб тӀехьалда.
13Иоаш хвана ва гьесул бакӀалда Яровоам пачалъун вахъана. Иоаш Самариялда ГӀизраилалъул пачабазда аскӀов хабалъ лъуна.
ЭлишагӀ аварагасул хвел
14ЭлишагӀ аварагасда хвалил унти чӀван букӀана. Цинги ГӀизраилалъул пача Иоаш вачӀана гьесухъе ваккизе, ва гьесда тӀадеги къулун гӀодана гьев. «Вай дир эмен! Вай дир эмен! ГӀизраил цӀунараб лебалаб хъергъу! Унев вуго гьанже гьадин нижги тун!» – ин чӀвачӀвадана гьев.
15ЭлишагӀица абуна: «Бахъе къватӀибе чӀорбутӀги чӀоралги». Гьес гьедин гьабуна.
16«ЧӀорбутӀ кодобе босе», – ян абуна гьес ГӀизраилалъул пачаясда.
Гьес гьеб кодобе босидал, ЭлишагӀица ГӀизраилалъул пачаясул кверазда тӀад лъуна жиндирго кверал.
17«Бакъбаккул рахъалдехун бугеб гордо рагье», – ян абуна гьес. Гьес гордо рагьана. «Гьанже речӀчӀе», – ян абуна ЭлишагӀица. Гьес речӀчӀана.
«Гьеб буго Сириялда тӀад босизе бугеб БЕТӀЕРГЬАНАСУЛ бергьенлъиялъул чӀор! – ин абуна ЭлишагӀица. – Мун вагъизе вуго сириялгун Апекалда ва дуца тӀуран гъуризе руго гьел».
18Хадуб гьес абуна: «ЧӀорал кодоре росе». ГӀизраилалъул пачаяс гьел росана.
ЭлишагӀица абуна гьесда: «Ракьалда кьаб-кьабгӀе гьел». Гьес лъабго нухалъ кьабуна.
19Цинги ЭлишагӀ кутакалда ццидахана ва гьес абуна: «Дуца щуго яги анлъго нухалъ кьабизе кколаан гьел ракьалда. Гьебмехалъ дуца сириял тӀуран гъура-чункилаан. Гьанже лъабго нухалъ гурони къезаризе гьечӀо дуца дол».
20ЭлишагӀ авараг хвана, ва гьев хабалъ лъуна.
Щибаб соналъул ихдалил гӀужалъ МогӀавалдаса хъачагъаз чабхъен гьабизе лъугьана ГӀизраилалде. 21Цо нухалъ, хварав чи вукъизе унел гӀадамаз, хъачагъазул къокъа бихьун, гьеб жаназа ЭлишагӀ аварагасул хабал нохъоде рехун балагьизабуна. Хварав чиясул жаназа ЭлишагӀил рукьбузда хъварабго гьев чи чӀаголъун тӀаде вахъун вачӀана.
ЭлишагӀ аварагас ахиралда бицараб рагӀи тӀубараб куц
22Егьоахаз пачалъун вугебгӀан заманалда Сириялъул пача Хазаилица ГӀизраилалда тӀад кверщел гьабуна. 23Амма Ибрагьимгун, ИсхӀакъгун ва Якъубгун гьабураб Жиндирго къотӀиялъе гӀоло БЕТӀЕРГЬАНАС цӀоб лъуна гӀизраилазда, гьезда гурхӀана ва гьезие кумекалъе чӀана. Гьесие бокьичӀо гьел тӀагӀинаризе ва Жиндирго берда цереса тӀуранго нахъе къотӀичӀо гьел жакъа къоялъги.
24Сириялъул пача Хазаил хвана, гьесул бакӀалда гьесул вас Бен-Гьадад пачалъун вахъана. 25Цинги Егьоахазил вас Иоашица, жиндирго эмен Егьоахазихъа Хазаилил вас Бен-Гьададица рахъун рукӀарал шагьарал нахъе рахъана. Иоашица лъабго нухалъ бергьенлъи босана гьесда тӀад ва ГӀизраилалъул шагьарал гьесухъа нахъруссинаруна.
Currently Selected:
4 Пачаби 13: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
