1 Пачаби 30
30
Давудица амалекияздаса рецӀел боси
1Давудги гьесул рагъухъабиги лъабабилеб къоялъ щвана Циклагалде.
Амалекиял тӀаде кӀанцӀун ратана Негевалде ва Циклагалде. Амалекияз Циклагалда хвалил цӀа бакана 2ва, гьитӀинал-кӀудиял батӀалъи гьечӀого, киналго руччабиги лъималги асирлъуде рачана. Гьез цо чи чӀвачӀо гьезул, амма жидедаго цадахъ асир гьарун рачун ана киналго.
3Давудги гьесул чагӀиги Циклагалде щваралго, гьезда бихьана Циклаг цӀадуца бухӀун букӀин ва гьезул лъудбиги лъималги ккун рачун ун рукӀин. 4Гьебмехалъ кӀудияб магӀил гьаракь бахъана гьениб, ва сваказегӀан гӀодана Давудги гьесул халкъги. 5Давудил кӀияйго лъадиги асир гьаюн йикӀана – Изреелалдаса АхӀиноам ва Кармилалдаса Навалида йикӀарай Авигайл. 6Къварилъиялъ рачел къана гьанже Давудида, щайгурелъул жидерго лъималазул рухӀелалъ чара бухӀараб халкъалъ цадахъ рахъун гьев ганчӀица чӀвазехъин вукӀана. Амма жиндирго БЕТӀЕРГЬАН Аллагьасде лъураб хьулалъ къвакӀизавуна гьев.
7Гьебмехалъ Давудица Ахимелехил вас кашиш Авиатарида абуна: «Эфод босе дихъе», – ян.
Авиатарица гьеб босун бачӀана. 8Цинги Давудица БЕТӀЕРГЬАНАСУЛ амру цӀехон дугӀа гьабуна: «Вахъун лъикӀдай дун доб боялда хадув? Дозда хадув гӀунтӀизе бажариладай дида?» – янги абун.
«Дозда хадув а. Мун ракӀчӀун дозда хадув гӀунтӀизе вуго ва дозухъа кинабго нахъе бахъизе буго», – ян жаваб кьуна БетӀергьанас.
9Цинги, анлънусавго рагъухъанги цадахъ вачун, Бесор лъарахъе къокъана Давуд; цо-цоял гьенир чӀана. 10Амма Давудги ункънусго чиги амалекиязда хадур ана; гӀемер свакаялъ кӀинусго чиясда лъар бахине кӀвечӀо.
11Авлахъалда цо мисрияв ватана гьезда, ва гьез гьев Давудихъе щвезавуна. Гьесие кваназе квенги гьекъезе лъимги, 12инжиралъул къараб чадил рекелги, кӀиго хъат кишмишалъулги кьуна. Квана-гьекъон хадув гьев вигьа-вичун вачӀана; гьес лъабго сордо-къоялъ кӀалдиб квен лъун букӀинчӀо.
13Цинги Давудица гьесда цӀехана: «Мун лъил ва киве унев чи кколев?» – абун.
Гьес жаваб кьуна: «Дун мисрияв вуго, цо амалекиясул лагъ ккола дун. Дун унтун лъабгониги къо байдал, гьес рехун тана. 14Ниж керетиязул Негевалде, ягьудиязул цо-цо ракьазде ва Халевил Негевалде чабхъаде ун рукӀана. Циклагги тӀубан бухӀана нижеца».
15Давудица гьесда абуна: «Дозул бо бугеб бакӀалде ниж щвезаризе рази вугищ мун?» – ин.
Гьелъие жавабалъе мисрияс абуна: «Дун чӀвачӀого телилан ва дир хважаинасухъе тӀадвуссинавиларилан Аллагьасул цӀарги бахъун мун дие гьедани, дица мун дозул бо бугеб бакӀалде вачина», – ян.
16Гьедин гьесда цадахъ амалекиял ругеб бакӀалде щведал, гьел ратана авлахъ цӀун гӀодор чӀун сухӀмат-кепалда квана-гьекъолел, щайгурелъул гьезие пилистимазул ва ягьудиязул ракьаздасан гӀемер кӀудияб давла щун букӀиндал. 17МаркӀачӀул гӀужалда тохлъукьего гьезде тӀаде кӀанцӀана Давуд ва нахъисеб къоялъул бакъанигӀужалде щвезегӀан вагъана цадахъ жиндирго рагъухъабигун. Варанабазда тӀаде кӀанцӀун лъутун арав ункънусго гӀолохъанчи гурони, тӀокӀалъ цониги инсан ворчӀичӀо амалекиязул.
18Амалекияз хъамун ун букӀарабщинаб жо нахъе бахъана Давудица ва кӀияйго лъадиги хвасар гьаюна. 19Амалекияз хъамун ун букӀарабщинаб боцӀи-рикъзи, я кӀудияб, я гьитӀинаб, щибго тӀаса камичӀого, кинабго тӀадбуссинабуна Давудица: лъимал рукӀа, къайи-къоно букӀа ва цогидаб букӀа. 20Гьединго Давудица гьезул кинабго гӀи-боцӀиги бачана ва цогидаб боцӀуда цебе къотӀана гьеб; гьесул чагӀаз абулеб букӀана гьаб Давудил давла бугилан.
Давла киназдаго гьоркьоб бикьа-къотӀи
21Свакараб свакаялъ Давудида цадахъ вилълъине бажаричӀев ва Бесор лъарахъ тарав кӀинусго чиясухъе тӀадруссана Давудги гьесул гӀадамалги. Гьал рачӀунел рихьидал, гьел данде рахъун рачӀана ва Давудица гьезие салам кьуна. 22Амма Давудида цадахъ ун рукӀаразда гьоркьоса цо-цо ракӀхъубал ва нахъегӀанал чагӀаз абуна:
«Нилъеда цадахъ рилълъинчӀел гьезие гьаб давлаялда гьоркьоса щибго кьезе гьечӀо. Жив-живас жинди-жиндир лъадиги лъималги рачун нахъе а абе», – ян.
23Давудица абуна:
«Бегьуларо дир вацал, БЕТӀЕРГЬАНАС нилъер кверде кьураб жоялда тӀад кверщел гьабуге. БетӀергьанас цӀунана нилъ, ва нилъеда тӀаде кӀанцӀун букӀараб аскарги нилъер кверде кьуна. 24Гьадинаб къоялъ нужеца бицунеб хабар щиб? Къайи-къоногун таразулги рагъде аразулги бутӀа цо букӀине буго; киназего бащад бикьизе ккола», – ян.
25Гьелдаса нахъе гьеб къанунлъун чӀезабуна Давудица; жакъа къоялъги гьеб гьедин буго.
26Циклагалде щведал, Давудица жиндирго гьудул-гьалмагъзабазе ва Ягьудиялъул церехъабазе давлаялъул цо-цо бутӀа битӀана: «Гьале БЕТӀЕРГЬАНАСУЛ тушбабазухъа бахъараб давлаялдаса нужееги сайгъат», – инги абун.
27Гьес церехъабазе сайгъатал ритӀарал бакӀал кколаан: Бет-Эл, Рамот-Негев, Ятир, 28АрогӀер, Сифмот, Эштемоа, 29Рахал, ерахмеэлиязул ва кениязул шагьарал, 30Хормагь, Бор-Ашан, Атах, 31Хеврон ва жиндирго чагӀигун Давуд сверанщинал бакӀал.
Currently Selected:
1 Пачаби 30: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
