1 Пачаби 24
24
Давудица Шаулил гӀумру цӀуни
1Гьениса ун Эн-Гедиялъул кьурабалъ чӀей гьабуна Давудица.
2Пилистималгунги вагъун тӀадвуссун вачӀунелъул, Шаулида бицана Давуд Эн-Гедиялъул кьурабалъ чӀун вугилан.
3Лъабазарго тӀаса вищарав рагъухъанги вачун, ГӀалхул Жайраназул кьурабалъ вугев Давудги гьесул чагӀиги ралагьизе къватӀиве вахъана Шаул. 4Нухда унаго, гьев гӀиязул ручнал ругеб бакӀалде щвана. Гьениб цо нохъо букӀана; Шаул къваригӀел тӀубазе гьениве жаниве вилълъана. Давудин абуни, жиндирго чагӀигун цадахъ гьеб нохъодул гъварилъуда вахчун вукӀана.
5Давудил чагӀаз абуна: «Гьале доб БЕТӀЕРГЬАНАС дуе цебеккунго загьир гьабун букӀараб къо: „Дица духъе кверде кьела дур тушман, дуца гьесие дуего бокьараб гьабизе букӀине“, – янги абун».
Гьавугьин аскӀовегӀан ун, Давудица Шаулил гӀабаялъул квенчӀел къотӀана. 6Амма, хадуб Давудил цӀакъ ракӀ бухӀана Шаулил гӀабаялъул квенчӀел къотӀиялдаса.
7Цинги гьес жиндирго чагӀазда абуна: «БЕТӀЕРГЬАНАС цӀунаги дун БЕТӀЕРГЬАНАС тӀаса вищарав дир пачаясде кверги борхун, гьединаб иш гьабиялдаса, – БЕТӀЕРГЬАНАС тӀаса вищарав пачалъидал гьев!»
8Гьедин бадибчӀвай гьабуна Давудица жиндирго чагӀазе ва Шаулие зарал гьабизе биччачӀо. Нохъодаса къватӀивеги лъугьун, Шаул жиндирго нухда ана. 9Цинги нохъодаса къватӀивеги вилълъун, гьес Шаулида хадуб ахӀана: «Я дир пача!» – ин.
Шаул нахъехун валагьидал, Давуд гьесие нодо чӀван къулана. 10Цинги Давудица Шаулида абуна:
«Щай мун гӀенеккулев Давуд дуе квешлъиялъе хӀалтӀулев вугилан абун гӀадамаз рицунел харбазухъ? 11Жакъа дудаго бихьанагури нохъода жанив БЕТӀЕРГЬАНАС мун дихъе кьураб куц. Мун чӀван рехейилан цогидаз абуниги, дун дуда гурхӀана. „Дир пачаясде дица квер борхиларо, гьев БЕТӀЕРГЬАНАС тӀаса вищарав вугелъул“, – ин абуна дица. 12Я дир эмен, гьаниве валагье дир хъатикь ккун бугеб дур гӀабаялъул квенчӀелалъухъ! Дица дур гӀабаялъул квенчӀел къотӀана, амма дуде квер борхичӀо. ГьанжегӀаги бичӀчӀа дуда дида тӀад щибго такъсир гьечӀеблъи ва дуе дица щибго квешлъи гьабичӀеблъи. Мунилан абуни, дун чӀвазе къваригӀун дида хадув лъугьун вуго. 13БЕТӀЕРГЬАНАС къотӀаги нилъее хӀукму! Дир рахъалъ БЕТӀЕРГЬАНАС босила дудаса рецӀел, амма дица дуда квер хъваларебха. 14„Квешал чагӀаздаса квешлъи гурони букӀунареб“, – ин аби буго некӀсиял умумузул. Гьединлъидал, дица дуда квер хъвазе гьечӀо.
15Лъида данде вахъарав чи ГӀизраилалъул пача; лъиде чан гьабулев чи мун кколев? Хвараб гьойда, ялъуни цо чӀетӀалда дандейищ? 16Нилъеда гьоркьов диваналъе БЕТӀЕРГЬАН вукӀа абе, ва Гьес къотӀе абе хӀукмуги. Гьев валагьизе те гьаб ишалъухъ; Гьес дун ритӀухъавлъун тасдикъ гьавеги ва дур квердаса хвасар гьавеги».
17Давуд гьедин кӀалъаравго, «Давуд, дир вас, дур гьаракьищ гьаб дида рагӀулеб бугеб?» – инги абун, биччан гьаракьгун, гӀодана Шаул.
18«Мун дидасаги цӀикӀкӀун иман бугевлъун вихьула. Дица дуе квешлъи гьабуниги, дуца дие лъикӀлъи гьабуна. 19Дуца бицунеб буго дуца дие гьабураб лъикӀлъиялъул, – БЕТӀЕРГЬАНАС духъе кверде кьурав дун дуца чӀвачӀого теялъул. 20Кодов щварав тушман парахат нухда ине виччан толев чи кив ватулев? Жакъа дуца дие гьабураб лъикӀлъи БЕТӀЕРГЬАНАС дуе азариде бахинабеги. 21Дида ракӀчӀун лъала мун ГӀизраилалъул пачалъун вукӀине вугеблъи ва гьеб пачалъи БетӀергьанас дур хъатикь щула гьабизе бугеблъи. 22Дир наслуялъул чагӀи тӀагӀинариларин ва дир инсул агьлуялда гьоркьоса дир хъизан-къайги нахъе хъвагӀаларин гьеде гьанже мун дие БЕТӀЕРГЬАНАСУЛ цӀарги бахъун».
23Давуд Шаулие гьедана. Хадув Шаул рокъове тӀадвуссана, Давудги гьесул чагӀиги жидерго кьурабазде рахана.
Currently Selected:
1 Пачаби 24: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
