Пётрил тӀоцебесеб кагъат 5
5
5 бетӀер
Иман лъуразул цоцаздехун гьоркьоблъи
1Нужго гӀадин, иман лъуразул агьлуялъул бетӀерлъун вугев, МасихӀица хӀехьараб гӀазаб-гӀакъубаги бихьарав ва загьирлъизе бугеб къудраталъул ирсги насиблъулев дица нужер агьлуялъул бутӀрузда гьарулеб буго: 2Аллагьас нужехъе кьураб рехъае вехьлъи гьабе, Аллагь разилъиледухъ гьелъул тӀалабги гьабе, нужеда тӀадаб бугилан гуреб, – рекӀелъ рокьигун, 3ужра-мухьалде хьул лъун гуреб, – Аллагьасе хъулухъ гьабизе бугеб гъира-шавкъгун. Нужеда божун таразе ханлъи гьабуге, рехъадулъ ругезе мисал бихьизабе. 4КӀудияв Вехь тӀаде вачӀараб мехалъ, гьес нужер ботӀрода лъела киданиги холареб таж. 5Гьанже, гӀолохъаби, нужги чӀахӀиязе мутӀигӀлъе. Цоцаздехун хӀеренлъи-хӀалимлъиялъул рачел къай. ТӀехьалда буго: «Аллагь чӀухӀаразда дандечӀола, хӀалимазда гьесул баркат лъола», – ян. 6Аллагьасул къуватаб кверщаликь хӀеренго-хӀалимго рукӀа, болжал цӀараб къоялъ гьес нуж тӀадегӀанлъизарулин. 7Сункьаниги хӀинкъичӀого, кинабго гьесде тӀамун те. Гьес нужер тӀалаб гьабулелъулха. 8ЦӀодорго чӀа, рорчӀи ккве, нужер тушман илбис нужеда сверун лъугьун бугебин, тӀу-тӀун бан кваназе чан балагьулаго гӀергӀедулеб гъалбацӀ гӀадин. 9ТӀолабго дуниялалда ругел нужер вацалги гьединабго гӀазаб-гӀакъубаялда рукӀинги лъан, божи-иманги щулалъизабун, нуж илбисалда дандечӀа. 10Дагьаб заманаялъ гӀазаб-гӀакъуба хӀехьон хадубин абуни, МасихӀиде цолъун ругел нуж, жиндирго къудраталдалъун абадияб гӀумруялде ахӀарав, цӀоб гӀатӀидав Аллагьас цӀидасан тӀадегӀанлъизарила, нужер божи-иман цӀикӀкӀинабила, нужелъ къвакӀи-яхӀ бижизабила ва кьучӀ щулалъизабила. 11Гьесул къудрат абадияб-даимаб буго! Амин!
Кагътил ахир
12Божизе бегьулев вац вугилан дица рикӀкӀунев Сильваница кумекги гьабун, гьаб къокъаб кагъат хъвана нужехъе, нуж къвакӀун чӀезе ва хӀакълъунго гьеб кинабго Аллагьасул баркат букӀиналда нуж божизе. Аллагьасдасан бачӀараб баркаталъул нух щулаго ккве.
13Нужго гӀадин, Аллагьас тӀаса рищарал иман лъуразул Вавилоналда бугеб агьлуялъулги ва дица васлъун тарав Маркилги салам буго нужеде.
14Цоцазда баун салам гьабе. МасихӀиде цолъун ругел нуж киналго сах-саламат хутӀаги!
Currently Selected:
Пётрил тӀоцебесеб кагъат 5: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
