Пётрил тӀоцебесеб кагъат 3

3 бетӀер

Рос-лъадуда тӀадал ишал

1Гьединго нужги – руччаби, россабазе мутӀигӀлъе. Аллагьасул рагӀиялда божуларел россабазени рагӀаби хӀажалъиларо, нужер хьвада-чӀвадиялъ къезарила гьел, 2бацӀцӀадаб ва адаб-хӀурмат цӀунараб гӀамал-хасиятги нужелъ бихьун. 3Гъалал хьухьин, гӀин-квералда гӀарац-месед бай ва чӀухӀараб ретӀел ретӀин – гьедин цебе рехун бихьулебщиналъулъ гуро нужер берцинлъи букӀине кколеб. 4Нужерго рекӀелъ бугеб, нужеего хасаб бацӀцӀадаб адабалъин нуж берцинлъизаризе кколел. Бищунго къиматаблъун ккола Аллагьасда цебе хӀеренаб ва недегьаб ракӀ. 5-6Гьеле гьедин къачӀадулаан цере Аллагьасде иман лъурал рацӀцӀадал руччаби. Мун дир бетӀергьан вугилан Ибрагьим аварагасе Сарат мутӀигӀай йикӀарай гӀадин, жидерго россабазе мутӀигӀал рукӀана гьел. Гьанже нужги гьелъул ясаллъун ккола, нужеца лъикӀлъиги гьабулеб бугони, балагьалдаса хӀинкъулелги гьечӀони. 7Гьединго нужецаги, росал, руччаби нужедаса загӀипал рукӀинги лъан, гӀакъилго-цӀодорго гьабе гьезие рослъи. Гьезул хӀурмат гьабе, нужее гӀадин, гьезиеги насиблъулелъул абадияб гӀумру. Нужер гьари-дугӀаялъе сунцаниги квалквал гьабизе бегьуларо.

Цоцалъ рекъон, вацал гӀадин рукӀа

8Къокъго абуни, нуж киналго цоцалъ рекъон рукӀа, цоцазул къварилъи-гӀатӀилъи бацӀцӀе, нужерго диналъул вацал рокьа, цоцалъ хӀалимго-хӀеренго рукӀа. 9Квешлъи гьабурасе квешлъиги гьабуге, рогьо барасда рогьоги баге, гьелъул гӀаксалда, нужеца абе гьесда баркат лъегийилан. ХӀакълъунго гьедин гьабизе ахӀулел руго нуж Аллагьас, гьелъухъ нужеда баркат лъезе. 10ТӀехьалда буго: «ГӀумру рохалида ине ва лъикӀал къоял тӀаде рачӀине бокьарас чияр бициналдаса мацӀги цӀуне, гьереси бициналдаса кӀалги цӀуне». 11Квешлъи рикӀкӀад гьабе, лъикӀлъи гьабичӀого тоге. Дуца рекъел балагье, гьелда хадув лъугьа мун. 12Муъминзабазул букӀунаро БетӀергьанас цӀунулареб нух, гьезул гьари-дугӀаялъухъ гӀенеккула Гьев, квешлъи гьабуразда дандеги чӀола.

РитӀухълъи сабаблъун гӀазаб-гӀакъуба хӀехьезе ккола

13БитӀараб гьабизе нужеца хӀаракат бахъулеб бугони, лъида кӀолеб нужее зарал-зиян гьабизе? 14Нуж ритӀун хьвадулел рукӀин сабаблъун гӀазаб-гӀакъуба хӀехьезе кканиги, Аллагьасул баркат рещтӀуна нужеде. Лъикьаниги хӀинкъуге, сундулниги ургъел гьабуге. 15МасихӀ ТӀадегӀанавлъун ккве нужерго рекӀелъ. Сунде нужер хьул бугебилан гьикъулевщинасе нужерго сабруялдалъунги адабалдалъунги жаваб кьезе хӀадурго рукӀа нуж кидаго. 16МасихӀиде цолъарал нужелъ бугеб лъикӀаб гӀамал-хасияталда бугьтан лъун данде кӀалъалел чагӀи инжитлъизе, нужеца намус бацӀцӀад цӀуне. 17ЛъикӀлъи гьабуралъухъ гӀазаб-гӀакъуба хӀехьейго лъикӀ (гьелъие Аллагьасул къадар батани), – квешлъи гьабуралъухъ гьеб хӀехьеялдаса.

18Нилъ Аллагьасде гӀагарлъизе киназего гӀоло цо нухалъ хведалха МасихӀ ГӀиса, – мунагьал ругезе гӀоло хведалха мунагьго гьечӀев. Гьесул черх чӀвана, амма РухӀалъ гьев цӀидасан чӀаголъизавуна. 19Гьеб РухӀ ана жужахӀалъур ругел рухӀазда цӀияб хабар бицине. 20Гьел рукӀана, НухӀ аварагас гама гьабулеб заманалда, Аллагь жиндирго кӀудияб сабруялда валагьун чӀун вукӀаниги, Гьесухъ гӀенеккичӀезул рухӀал. НухӀида цадахъ дагьал чагӀи гурони хвасарлъичӀо, микьго чи ворчӀана тӀупаналъул лъададаса. 21ТӀупаналъул лъим ккола гьанже нуж хвасарлъулеб лъадалъ ччун рахъиялъул гӀаламатлъун. Черхалдаса хъублъи чуризе гуро нуж лъадалъ ччун рахъулел, – ГӀиса МасихӀ хваралъуса вахъинавиялдалъун нужер намус бацӀцӀалъизабейилан Аллагьасда гьаризейин. 22Гьев зодове ана ва Аллагьасул кваранаб рахъалда гӀодов чӀун вуго. Гьесие мутӀигӀал руго малаикзаби, гьезул бутӀрул ва хӀакимзаби.

Currently Selected:

Пётрил тӀоцебесеб кагъат 3: АварАК

Highlight

Copy