3 Пачаби 8
8
КъотӀиялъул гъамас БетӀергьанасул Рокъобе боси
1Сулейманица БЕТӀЕРГЬАНАСУЛ гъамас Давудил Шагьаралдаса#8:1Давудил Шагьарилан, ялъуни Сионилан абула шагьаралъул басрияб рахъалда. БетӀергьанасул Рукъ Иерусалималъул цӀияб шималияб рахъалда бана., ай, Сионалдаса нахъе босизе, ГӀизраилалъул халкъалъул кӀудиял чагӀи ва жиб-жиб къавмалъул бутӀрул ахӀана Иерусалималде. 2Анкьабилеб моцӀалъ, ай, етаним моцӀалъ, Хъошал Раялъул байрамалъул#8:2 Хъошал раялъул байрам – жалго авлахъалда рукӀараб заман ва БетӀергьанас жиндирго гьабураб тӀалаб-агъаз ракӀалде щвезабун тӀобитӀулеб ягьудиязул байрам. заманалда, киналго гӀизраилал Сулейманихъе ракӀарана.
3КӀудиял чагӀи рачӀарабго кашишзабаз гъамас тӀаде борхана, 4ва гьеб БЕТӀЕРГЬАНАСУЛ гъамасги, гьенир жанир лъурал киналго мукъадасал тӀагӀелалгун цадахъ мажлисалъул Чадирги босана. Кашишзабазги левитазги раччана гьел. 5Сулейманицаги гьесда сверун бакӀарараб кинабго ГӀизраилалъул халкъалъгиян абуни, гьеб гъамасалда цере-цереги унаго, рикӀкӀун хӀал кӀоларебгӀан гӀемераб гӀи-боцӀи къурбаналъе хъолеб букӀана.
6Кашишзабаз БЕТӀЕРГЬАНАСУЛ гъамас жиндирго бакӀалде – жанисеб Мукъадасаб бакӀалде, ай Бищунго Мукъадасаб бакӀалде щвезабуна ва хъерувимазул куркьбазда гъоркь лъуна. 7Хъерувимазул куркьби гьеб гъансида ва гьеб гъамас тӀад ххун гьеб босизе хӀалтӀизарулел гӀурдузда тӀад тӀиритӀун рукӀана. 8Гьел гӀурдузул халалъиялъ гьезул рагӀаллъаби Бищунго Мукъадасаб бакӀалда цебе бугеб рокъосацин рихьулел рукӀана, амма къватӀисахун рихьулароан. Жакъа къоялде щвезегӀанги гьенир руго гьел. 9Мисриялдаса къватӀире рахъун хадуб, ГӀизраилалъул халкъгун БЕТӀЕРГЬАНАС гьениб КъотӀи гьабураб Хоривалда#8:9 Хорив – гьеб ккола Синаялъул батӀияб цӀар. вугеб мехалъ, Мусаца гьениб жаниб лъураб кӀиго къоно хутӀараб батӀияб жо щибго букӀинчӀо гъансида жаниб.
10Кашишзаби Мукъадасаб БакӀалдаса къватӀире лъугьарабго накӀкӀул парчаялъ цӀезабуна БЕТӀЕРГЬАНАСУЛ рукъ. 11Кашишзабазухъа как-динцин гьабун бажарулеб букӀинчӀо, щайгурелъул БЕТӀЕРГЬАНАСУЛ къуваталъ цӀезабун букӀиндал БЕТӀЕРГЬАНАСУЛ Рукъ.
12Гьебмехалда Сулейманица абуна:
«БЕТӀЕРГЬАН, Дуца лъазабун букӀана Мун биццатаб накӀкӀул парчаялъулъ вукӀунилан. 13Дица Дуе ТӀадегӀанаб Рукъ бана – абадиялъего Мун вукӀине бакӀ».
Халкъалдехун Сулейманил калам
14Цинги Сулейман халкъалдехун вуссана ва гьезие баракат гьарана. 15Хадуб гьес абуна:
«Жиндицаго дир эмен Давудие кьураб рагӀи тӀубазабурав ГӀизраилалъул БЕТӀЕРГЬАН Аллагьасе рецц! Гьес абун букӀиндал: 16„Мисриялдаса къватӀибе Дирго халкъ бачараб къоялдаса нахъе Дица цониги ГӀизраилалъул къавмалъул шагьар тӀаса бищичӀо, гьениб Дир Рукъ базе. Амма, Дир халкъалда, ГӀизраилалда тӀад нухмалъи гьабизе Давуд тӀаса вищана“.
17ГӀизраилалъул БЕТӀЕРГЬАН Аллагьасе Рукъ базе рекӀел мурад букӀана дир эмен Давудил. 18Амма БЕТӀЕРГЬАНАС лъазабуна дир инсуда, Давудида: „Дир цӀар кӀодо гьабун, Дие Мукъадасаб Рукъ базе мурад буго дур, гьебги лъикӀаб мурад буго. 19Амма дуца гуреб, дудаса гьавурав дур васас базе буго Дие Мукъадасаб Рукъ“.
20Гьале БЕТӀЕРГЬАНАС Жиндирго рагӀи тӀубазабуна. БЕТӀЕРГЬАНАСУЛ рагӀуда рекъон, дир эмен Давудидасан ирсалъе щвараб ГӀизраилалъул тахида чӀана дун, ва ГӀизраилалъул БЕТӀЕРГЬАН Аллагьасул цӀар кӀодо гьабун Мукъадасаб Рукъги бана дица. 21Мисриялдаса къватӀире рахъарабго, Гьес нилъер умумузулгун гьабураб КъотӀи жаниб лъураб БЕТӀЕРГЬАНАСУЛ гъамасалъе бакӀги къачӀана дица гьениб».
Сулейманил дугӀа
22Кинабго ГӀизраилалъул жамагӀаталда цебе, БЕТӀЕРГЬАНАСУЛ къурбаналъе бакӀалда цеве эхетана Сулейман ва зодоре квералги рорхун 23дугӀа гьабуна:
«ГӀизраилалъул БЕТӀЕРГЬАН Аллагь! Я дунялалда, я зобалазда Дуде данде кквезе бегьулев цоги Аллагь гьечӀо! РакӀ-ракӀалъго Дур нухда хьвадулелгун гьабураб гурхӀел-рахӀмуялъул къотӀи-къай цӀунула Дуца. 24Дуца Дур лагъ Давудие, дир инсуе кьураб рагӀи ккуна; Жакъа Дуцаго тӀубазабуна кинабго.
25Гьединлъидал, ГӀизраилалъул БЕТӀЕРГЬАН Аллагь, тӀубазабе гьанже, „дур васал мунго гӀадин Дида цере битӀараб нух цӀунун хьвадани ва дихъ гӀенеккани, киданиги Дида цеве ГӀизраилалъул тахида гӀодов чӀарав дур ирсилав къотӀиларо“, – янги абун, Дуца Дур лагъ, дир эмен Давудие кьураб рагӀиги. 26ГӀизраилалъул БетӀергьан, биччай гьанже тӀубазе Дуца Дур лагъ Давудие кьураб рагӀи!
27Амма гьаб дунялалда рукъ ккун чӀелищ Аллагь! Зобалаздаги, зобалазул зобалаздагицин бажаруларо Гьев жидедаго жаниве гьинавизе, гьаб дица бараб Рукъалъул бицинего бицинарин. 28Амма, дир БЕТӀЕРГЬАН Аллагь, Дур лагъас Дуде гурхӀел-рахӀму гьарун гьабулеб дугӀаялъухъ гӀенекке! Дуца къабул гьабеги Дур лагъас жакъа Дуда цебе гьабулеб бугеб гьаб гьари-дугӀа. 29Биччанте къасиги къадги гьаб, „гьаниб букӀина Дие как-дин гьабулеб бакӀ“, – ин Дуца абураб Мукъадасаб Рукъалда тӀад букӀине Дур берги кӀалги. Дуда рагӀаги гьаб бакӀалде гьумерги битӀун Дур лагъас гьарараб дугӀа. 30Дуда рагӀаги гьаб бакӀалде гьумерги битӀун Дур лагъасги Дур ГӀизраилалъул халкъалъги гьарараб дугӀа. Дур зобалазул рокъоб Дуца къабул гьабе ва Мун нижеда тӀасаги лъугьа.
31Цо чияс цогидасе зарал гьабуни ва гьес досдаса гьа гьедизе тӀалаб гьабуни, дос вачӀун Дур къурбаналъул бакӀалда цебе гьаги бани, 32Дуда рагӀила зобалазда ва. Дуца къотӀила гьезие ритӀухъаб диван. ГӀайибиясе жаза гьабила – гьесда тӀаде буссина гьес жинцаго гьабурабщинаб гӀамал. ГӀайиб гьечӀев ритӀухъ гьавила ва гьев витӀун вукӀин тасдикъ гьабила.
33Дуда данде мунагь гьабун букӀиналъ, Дур халкъ тушбабаздаса къуни, амма хадуб Дуде руссун Дур цӀарги ахӀун Дуда цебе гьаб бакӀалда дугӀа-гьари гьабуни, 34Дуца зобалазда гьеб къабул гьабе ва Дур ГӀизраилалъул халкъалъул мунагьаздаса тӀаса лъугьа, гьел Дуцаго гьезул умумузе кьураб ракьалде тӀадруссинаре.
35Дуда данде Дур халкъалъ мунагь гьабун букӀиналъ зобалазул гордал рахани ва цӀад къотӀани, амма гьез Дур цӀарги ахӀун гьаб бакӀалде руссун дугӀа-гьари гьабуни, ва Дуца тамихӀ гьабун хадуб мунагьазде мугъги рехани, 36зобалазда къабул гьабе Дуца гьеб ва Дурго лагъ ГӀизраилалъул халкъалъул мунагьаздаса тӀаса лъугьа. Гьел хьвадизе гьезда лъикӀаб нух малъе ва Дуцаго Дур халкъалъе ирсалъе кьураб ракьалде цӀад базабе.
37Нагагьлъун ракъи ккани, къавуда щвани, бухӀараб гьури пуни, ккал чӀвани, ракъул гарцӀ тӀаделъани, царагьве бани, тушбабаз кинаб букӀаниги ГӀизраилалъул шагьар сверун ккуни – кинаб букӀаниги я балагь, я унти тӀаде бачӀани, – 38кинаб гьари яги дугӀа цо чияс, ялъуни тӀолабго Дур ГӀизраилалъул халкъалъ гьабуниги, жив-живас ракӀ бухӀун, къваридго гьаб бакӀалде кверал ритӀарабго, 39Дурго зобалазул рокъоб къабул гьабе. ТӀаса лъугьа ва жив-живасе гьезул ишазда рекъон гьабе, Мунго гьезул рекӀехъ балагьун, Дуда лъалелъул инсанияталъулго рекӀелъ бугеб – 40нижер умумузе Дуца кьураб ракьалда нижеца гӀумру гьабулеб бугебгӀан мехалъ гьел Духъа хӀинкъизе рукӀине.
41-42Гьединго, Дур халкъалъул гурев, къватӀиса рикӀкӀадаса Дуе гӀоло вачӀарав чиясги (гӀадамазда рагӀилелъул Дур кӀудияб ЦӀар ва Дур къуват-гучалъул хӀакъалъулъ) гьаб Мукъадасаб Рукъалдехун вуссун дугӀа гьабуни, 43Дурго зобалазул рокъоб къабул гьабе ва къватӀисес Дуда гьарарабщинаб жо тӀубазабе, Киналго халкъазда Дур цӀар лъазе ва гьел, дур халкъ ГӀизраил гӀадин Духъа хӀинкъизе рукӀине, ва гьаб дица бараб Мукъадасаб Рукъ Дур букӀин лъазе.
44Дур халкъ тушбабазда данде багъизе ани, Дуца кинаб нухалъ гьел рачаниги, гьаб Дуца тӀаса бищараб шагьаралдехун ва дица Дуе бараб Мукъадасаб Рукъалдехун балагьун гьез Дуе дугӀа гьабуни, БЕТӀЕРГЬАН, 45зобалазда къабул гьабе гьезул гьари-дугӀа ва гьезие кумек гьабе.
46Гьез Дуда данде мунагь гьабуни – мунагь гьабуларев чи цониги гьечӀелъул, – Дур ццинги бахъун, дуца гьел тушбабазул квердеги кьун, гьез жидерго ракьалде асирлъуде рачун ани, я рикӀкӀаде, я гӀагарде, 47хадуб асирлъиялъул ракьалда дур халкъ рекӀекълъун, гьез тавбу гьабуни, ва, „нижеца мунагь гьабуна, мекъго хьвадана ва квешлъиялъе хӀалтӀана“, – янги абун Дуде гьардезе лъугьани, 48жал асир гьарурал тушбабазул ракьалда гьел ракӀ-ракӀалъго Дуде руссани, ва Дуца гьезул умумузе кьураб ракьалдехун, гьаб Дуца тӀаса бищараб шагьаралдехун ва дица Дуе бараб Мукъадасаб Рукъалдехун балагьун гьез дугӀа гьабуни, 49Дур зобалазул рокъоб къабул гьабе гьезул гьари-дугӀа ва гьезие кумек гьабе. 50ТӀаса лъугьа Дуда данде мунагь гьабураб Дур халкъалдаса. Гьез Дуда данде гьарурал киналго такъсираздаса тӀаса лъугьа ва гьел асир гьаруразул ракӀал гурхӀизаре гьезда, 51Дуца Мисриялдаса, гьеб цӀадул кориниса къватӀибе бачараб Мунго бетӀергьанаб Дур халкълъидал гьеб.
52Дуца кидаго кӀвар кье Дур лагъасде ва Дур халкъ ГӀизраилалъул дугӀаялде, кидаго гьез гьардон Дуде ахӀи балеб мехалъ Дуда гьеб рагӀизе букӀине. 53Дуца Мунго бетӀергьанавлъун вукӀине дунялалъул цогидал халкъаздаса батӀа гьарун ругелъул гьел, Дурго ирсилаллъун. Къудратав БЕТӀЕРГЬАН, нижер умумул Мисриялдаса къватӀире рачарабго, Дур лагъ Мусаги гьоркьов ккун гьедин лъазабун букӀиндал Дуца».
ГӀизраилалъул халкъалъул рахъалдаса дугӀа
54БЕТӀЕРГЬАНАСДЕ гьеб дугӀа-гьари гьабун лъугӀарабго, БЕТӀЕРГЬАНАСУЛ къурбаналъе бакӀалда цеве, квералги зобалазде ритӀун, накабазда чӀун вукӀарав Сулейман тӀаде вахъана. 55ТӀадеги вахъун, киназдаго рагӀун, тӀолабго ГӀизраилалъул халкъалъе баракатги гьарун гьес абуна:
56«Жиндирго ГӀизраилалъул халкъалъе Жиндирго рагӀуда рекъон рахӀат кьурав БЕТӀЕРГЬАНАСЕ рецц! Жиндирго лагъ Мусаги гьоркьов ккун Гьес гьедараб кинабго лъикӀабщиналъул цониги жо тӀубачӀого хутӀичӀо. 57Нилъер БЕТӀЕРГЬАН Аллагь, Гьев нилъер умумузда цадахъ вукӀарав гӀадин, кидаго нилъеда цадахъги вукӀаги. Гьес кидаго нилъ рехун тогеги. 58Нилъ Бичасул нухда хьвадизе ва Гьес нилъер умумузе чӀезабураб хӀалалъ ахӀкамал, амруял ва къанунал тӀуразаризе Гьес нилъер ракӀал Жиндехунго цӀаги. 59Гьаб БЕТӀЕРГЬАНАСДА цебе дица гьарараб дугӀа къасиги къадги БЕТӀЕРГЬАНАСДА кӀочонгеги ва щибаб къоялъ Жиндирго лагъасе ва Жиндирго ГӀизраилалъул халкъалъе хӀажатабщинаб кьеги, 60дунялалъул тӀолалго халкъазда БЕТӀЕРГЬАН тун тӀокӀав Аллагь гьечӀеблъи лъан букӀине. 61Нилъер умумузе Гьес рихьизарурал Гьесул амруял ва ахӀкамал жакъа гӀадин кидаго тӀуразаризе, нужер ракӀал БЕТӀЕРГЬАН Аллагьасе тӀуран ритӀухъаллъун рукӀаги».
БетӀергьанасул Мукъадасаб Рукъ рагьи
62Хадуб пачаясги ГӀизраилалъул халкъалъги БЕТӀЕРГЬАНАСЕ къурбанал хъуна. 63БЕТӀЕРГЬАНАСЕ ракълил къурбаналъе Сулейманица къоло кӀиазарго бетӀер боцӀул ва нусиялда къоазарго гӀиялъажо хъуна. Гьедин рагьана пачаясги ГӀизраилалъул халкъалъги БЕТӀЕРГЬАНАСУЛ цӀияб Мукъадасаб Рукъ.
64Гьебго къоялъ, БЕТӀЕРГЬАНАСУЛ Рукъалда цебе бугеб азбаралъул бакьулъ бакӀ къурбаназе хӀадур гьабуна пачаяс. Гьенир тӀуран рухӀулел къурбанал хъуна, ролъул сайгъаталги гьаруна, ракълил къурбаназул тӀатӀиги бухӀана, щайгурелъул БЕТӀЕРГЬАНАСДА цебе бугеб мазгаралъул къурбаналъе бакӀ цӀакъго гьитӀинлъана гьеб къоялъ тӀуран рухӀулел къурбаназе, ролъуе ва ракълил къурбаназул тӀатӀуе.
65Лево-Хаматалдаса бахъараб Мисриялъул гӀорхъода бугеб лъарахъе щвезегӀан гӀемераб гӀаламгун, ай тӀолабго ГӀизраилалъул халкъгун, Сулейманица байрам тӀобитӀана. Гьеб байрам тӀобитӀана нилъер БЕТӀЕРГЬАН Аллагьасда цебе цин анкьго, хадуб жеги анкьго къоялъ – кинабниги анцӀила ункъо къоялъ. 66Микьабилеб къоялъ Сулейманица халкъ рокъобе биччана. Пачаясе баракатги гьарун, БЕТӀЕРГЬАНАС Жиндирго лагъ Давудие ва Жиндирго гӀизраил халкъалъе гьабураб кинабго лъикӀлъиялдаса рохун, тӀолалго гӀадамал аваданго рокъо-рокъоре руссана.
Currently Selected:
3 Пачаби 8: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
