3 Пачаби 6

Сулейманица БетӀергьанасул Рукъ бала

1Мисриялдаса ГӀизраилалъул халкъ къватӀибе бахъун ункънусиялда ункъоабилеб соналъул кӀиабилеб моцӀалъ, ай, зив моцӀалъ#6:1 Зив моцӀ – ихдалил бащалъи, цебесеб эраялъул 966-леб сон., Сулейман пачалъун вахъун ункъабилеб соналъ, гьес БЕТӀЕРГЬАНАСЕ Мукъадасаб Рукъ базе байбихьана.

2Сулейманица БЕТӀЕРГЬАНАСЕ бараб Рукъ букӀана лъабкъого натӀалъ халатаб, къого натӀалъ гӀебаб ва лъеберго натӀалъ борхатаб. 3Гьеб Мукъадасаб Рукъалда цебе бугеб рагъи букӀана минаго гӀадин къого натӀалъ гӀебаб ва анцӀго натӀалъ цебе бачӀараб. 4Мукъадасаб Рукъалъе Сулейманица рагьуларел гордал лъуна. 5Гьеб БетӀергьанасул Рукъалъул къадазул къватӀисеб рахъалдасан, хьалбазухъги, нахъисеб рахъалдаги жеги тӀаде бакӀал рана ва гьенир рукъзал гьаруна. 6ТӀоцебесеб тӀала – щуго натӀалъ, кӀиабилеб – анлъго натӀалъ, ва лъабабилеб – анкьго натӀалъ гӀебаб букӀана. БетӀергьанасул Рукъалда сверун къватӀисахун рахъалъ цӀутӀелал гьаруна, къватӀисахун рукъзазул рахал кквезе рукӀине ва гьел рахал Мукъадасаб Рукъалъул къадакье ккечӀого рукӀине.

7БакӀал раялъе хӀалтӀизабуна гьецӀо бахъулеб бакӀалдаго бекӀун къачӀараб гамачӀ; я квартӀил, я гӀощтӀол, я цоги маххул алаталъул сас рагӀулеб букӀинчӀо БетӀергьанасул Рукъ балеб бакӀалда.

8ТӀоцебесеб тӀалаялде жанире лъугьунеб кӀалтӀу букӀана Рукъалъул къилбаялъул рахъалдасан. КӀиабилеб тӀалаялде болъаби лъуна ва гьениса лъабабилеб тӀалаялдеги лъуна. 9Гьедин бана гьес Мукъадасаб Рукъ – кедралъул чӀалабиги лъун хъарщиги тӀад бан, ахиралде щвезабуна кинабго. 10КъватӀисахун, БетӀергьанасул Рукъалъул къадалккун гьес гьарурал рукъзал рукӀана щу-щу натӀалъул борхалъи бугел; кедралъул чӀалабаз хурхинарун рукӀана гьел БетӀергьанасул Рукъалда.

11Сулейманихъе БЕТӀЕРГЬАНАСУЛ калима бачӀана:

12«Дуца гьаб Мукъадасаб Рукъ балеб буго. Мун Дир амруязда рекъон хьвадани, Дир къанунал цӀунани ва Дир фарз тӀубазабуни, Дицаги дур эмен Давудие Дица кьун букӀараб рагӀи тӀубазабила. 13Дун ГӀизраилалъул халкъгун вукӀина ва Дир халкъ кидаго рехун теларо».

14Сулейманица Мукъадасаб Рукъ бан рагӀалде бахъинабуна.

Рукъалъул жанисеб рахъалъул гӀуцӀи

15Сулейманица жанисеб рахъалъ къадазда кедралъул хъарщи ккуна – Мукъадасаб Рукъалъул чӀарбидаса мокърукье щвезегӀан. ЧӀабаралда кипарисалъул хъарщи кьабуна. 16БетӀергьанасул Рукъалъул Бищунго Жанисеб бакӀ гьабуна къого натӀалъул манзилалда, чӀарбидаса мокърукье щвезегӀан кедралъул хъарщиги кьабун, гьениб Жанисеб Мукъадасаб бакӀ, ай, Бищунго Мукъадасаб бакӀ гьабизе. 17Бищунго Мукъадасаб бакӀалда цебесеб рукъ, ай Мукъадасаб бакӀ, кӀикъого натӀалъ халатаб букӀана. 18Мукъадасаб Рукъалда жаниб кедралъул хъарщи кьабуна, гьезда тӀад бикӀун букӀана хъабхъил суратазда ва тӀугьдузда релълъарал жал. Киса-кибего кедралъул цӀул кьабун букӀана, кибниги къватӀибе баккун гамачӀ букӀинчӀо.

19Гьес БЕТӀЕРГЬАНАСУЛ КъотӀиялъул гъамас жаниб лъезе Бищунго Мукъадасаб бакӀ къачӀана. 20Бищунго Мукъадасаб бакӀ букӀана къого натӀалъ халатаб, къого натӀалъ гӀебаб ва къого натӀалъ борхатаб – гьелъул жанисеб рахъалда къадазда месед бекьана; къурбаналъе бакӀалда тӀадги бацӀцӀадаб месед бекьана. 21Мукъадасаб Рукъалъул жанисеб рахъалда бацӀцӀадаб месед бекьана ва Бищунго Мукъадасаб бакӀалде лъугьунеб кӀалтӀуялда меседил рахсал рана. 22Гьедин, кинабго рукъалъул жанисеб рахъалда ва Мукъадасаб бакӀалъул къурбаналъе бакӀалда киса-кибго месед бекьана.

23Бищунго Жанисеб Мукъадасаб бакӀалда гьес зайтуналъул цӀулал гьарурал анцӀ-анцӀ натӀалъ рорхатал кӀиго хъерувимал#6:23 Хъерувим – куркьбал ругеб малаик ва малаикзабазда гьоркьоб бищун тӀадегӀаназул цо тайпа. лъуна. 24ТӀоцебесеб хъерувималъул жиб-жиб кваркьи букӀана щуго натӀалъ халатаб – анцӀго натӀ букӀана кӀиябго кваркьиялда. 25КӀиабилеб хъерувималъул куркьбаздаги букӀана анцӀго натӀ – гьел цоцада релълъарал ва цоцада ращадал рукӀана. 26Жиб-жиб хъерувим анцӀго натӀалъ борхатаб букӀана. 27ГӀебеде ритӀун куркьбалгун гьел хъерувимал гьес БетӀергьанасул Рукъалъул Бищунго Жанисеб бакӀалда лъуна. Цоялъул кваркьи цо къедалда, цогиялъул кваркьи дандбитӀун бугеб къедалда цуна, ва хъерувимазул кӀиабилел куркьби рукъ бакьулъ цоцазда цуна. 28Сулейманица хъерувимазда тӀадги месед бекьана.

29БетӀергьанасул Рукъалъул киналго къадазда, жанисанги къватӀисанги, бикӀун рахъана хъерувимазул, чамасдакил гъотӀол гӀаркьалабазул ва тӀугьдузул суратал. 30Жеги гьес Мукъадасаб Рукъалъул жанисеб рахъалда ва гьелда цебесеб рахъалда гӀодобги месед бекьана.

31Бищунго Мукъадасаб бакӀалде лъугьине гьес щубокӀонал ххундулги ругел зайтуналъул цӀулал нуцӀби гьаруна. 32КӀиябго зайтуналъул цӀулал нуцӀида гьес бикӀун рахъана хъерувимазул, чамасдакил гъотӀол гӀаркьалабазул ва тӀугьдузул суратал ва хъерувимаздаги чамасдакил гъотӀол гӀаркьалабазда тӀадги месед бекьана. 33Гьединго аслияб Мукъадасаб Рокъоре жанире лъугьунеб бакӀалдаги гьес зайтуналъул цӀулал ункъбокӀонал ххундул гьаруна. 34Жеги кипарисалъул цӀулал, кӀиябго рахъалде ричӀулел нуцӀбиги гьаруна гьес. 35Гьес гьезда тӀад бикӀун рахъана хъерувимазул, чамасдакил гъотӀол гӀаркьалабазул ва тӀугьдузул суратал ва гьезда тӀадги месед бекьана.

36Жанисеб азбарги гьабуна гьес БетӀергьанасул Рукъалда цебе. Гьеб азбар сверун къараб къед бана бекӀараб ганчӀил лъабго кьер гьабун ва цо кьералда кедралъул чӀалаби лъун.

37БЕТӀЕРГЬАНАСУЛ Рукъалъе кьучӀ лъуна ункъабилеб соналъул зив моцӀалъ. 38Сулейман пачалъун вахъун анцӀила цоабилеб соналъул бул#6:38 Бул моцӀ – хасалихълъиялъул бащалъи. моцӀалъ, ай, микьабилеб моцӀалъ, кинабго гьелъие бихьизабураб кьучӀалда рекъон, бан ахиралде бахъана Мукъадасаб Рукъ. Сулейманица гьеб анкьго соналда жаниб бана.

Currently Selected:

3 Пачаби 6: АварАК

Highlight

Copy