3 Пачаби 2
2
Давудица Сулеймание гьабураб ахирисеб насихӀат
1Хвезе заман гӀагарлъараб мехалъ Давудица Сулеймание гьадинаб насихӀат гьабуна:
2«Дун унев вуго гьанже киналго чагӀи унелъуре, – ян абуна гьес. Мун чаран гӀадин къвакӀун, бихьинчи гӀадин вукӀа; 3дур БЕТӀЕРГЬАН Аллагьас тӀад лъураб тӀубазабе. Мусал къануналда хъван бугелда рекъон Гьесул нухдасан хьваде. Бичасул амруял, Гьесул къанунал ва ахӀкамал тӀуразаре, мун киве аниги, щиб дуца гьабулеб бугониги, дуего битӀ ккезе букӀине. 4Гьедин БЕТӀЕРГЬАНАС дир хӀакъалъулъ „дур наслу битӀараб нухда хьвадани ва Дир хӀакъабщиналда ракӀ-ракӀалъго нахъбилълъани, ГӀизраилалъул тахидаса дур зурияталъул гӀаркьел кидаго къотӀиларо“, – ян абураб рагӀиги тӀубазе букӀине.
5Гьединго, дуда лъала Церуягьил вас Иоавица дие гьабурабщинаб – гьес кӀиялго ГӀизраилалъул аскаразул бутӀрул Нерил вас Авнерие ва Етерил вас Амасае гьабураб жо. Гьес, рагъда гӀодобе тӀураб бидухъ ракълил заманалда къисасги босун чӀвана гьел, ва гьеб гӀайиб гьечӀого гӀодобе тӀураб биялъ хъублъизабуна черхалда бараб рачел ва хӀатӀида ретӀараб хьит.#2:5 «Хъублъизабуна черхалда бараб рачел ва хӀатӀида ретӀараб хьит» – гьеб абиялъул магӀна букӀана гьев чияс живго гӀайибалъул цӀезавунин ва гьесул гӀайиб киназдаго бихьулеб бугин абураб. 6Дуца гьанже дурго гӀакълуялда рекъон гьабе, амма гьесул хъахӀаб бетӀер парахатго хабалъе ине биччаге.
7ГилгӀадалдаса Барзиллайил васазда цӀоб лъе, ва гьел мунгун квен гӀахьал гьабулезда гьоркьоре раче. Дур вац Авессаломихъа дун лъутун унаго, гьел дие эхетана.
8Цоги дуда цадахъ вуго Герал вас ШимгӀи – Бахурималдаса буняминияв. Кутакалда нагӀанаби кьуна дос дие дун Маханаималде унеб къоялъ. Гьев Иорданалде дида данде вачӀараб мехалъ, БЕТӀЕРГЬАНАСУЛ цӀар бахъун гьедана дун досие: „Мун чӀвазе дица хвалчен бахъиларо“, – ян. 9Амма гьанже дов гӀайиб гьечӀевлъун рикӀкӀунге дуца. Мун гӀакъилав чи вуго, дудаго лъала щиб досда гьабилебали. Бида чвахулаго ккезабе досул хъахӀаб бетӀер хабалъе».
Давудил хвел
10Давуд хвана ва Давудил Шагьаралда#2:10 Давудил Шагьар – гьеб ккола Давудил пачалъиялъул кӀалгӀа букӀараб бакӀ. Гьелда Сиониланги абулаан. жиндирго умумузда аскӀов хабалъ лъуна. 11ГӀизраилалда тӀад кӀикъого соналъ пачалъи гьабуна гьес – анкьго соналъ Хевроналда ва лъебералда лъабго соналъ Иерусалималда. 12Сулейман жиндирго инсул тахида чӀана ва гьесул пачалъи щулалъана.
Адониявие гьабураб тамихӀ
13Агитил вас Адонияв вачӀана Сулейманил эбел Батшебахъе. Батшебаца гьесда цӀехана: «Мун рекъелгун вачӀунев чийищ?» – ан. «Рекъелгун», – ин жаваб кьуна гьес.
14Хадуб гьес цӀехана: «Бегьилищ цо мунгун кӀалъазе?» – ян. «КӀалъай», – ян жаваб кьуна Батшебаца.
15«Дуда лъалагури, – ян кӀалъана гьев, – пачалъи хӀакъикъаталда дир кколеб букӀараблъи ва вукӀинесев пача хӀисабалда тӀолабго ГӀизраилалъул бербалагьиги диде букӀараблъи. Амма гьеб хиса-сверана ва пачалъи дир вацасухъе ккана – гьесие хъван букӀун бугелъул гьеб БЕТӀЕРГЬАНАС. 16Гьанже цо гьари буго дир дуде. Инкар гьабуге дие».
«Бице», – ян абуна гьелъ.
17Гьес абуна: «Гьарула дуда, дие шунемияй Авишаг кьеян кӀалъай Сулейман пачаясда – дуе гьес инкар гьабиларо».
18«ЛъикӀ буго, – ян жаваб кьуна Батшебаца. – Дица дур рахъалъ пачаясда кӀалъай гьабила».
19Адониявил хӀакъалъулъ кӀалъазе Сулейман пачаясухъе Батшеба ячӀиндал, пача гьелда данде тӀаде вахъун, гьелъие къулана ва жиндирго тахида гӀодов чӀана. Гьес пачаясул эбелалъе тах босун бачӀаян лъазабуна ва гьей гьесул кваранаб рахъалда гӀодой чӀана.
20«Цо гьитӀинаб гьари буго дир дуде, – ян абуна гьелъ. – Инкар гьабуге дие».
Пачаяс жаваб кьуна: «Гьаре, дир эбел; дица дуе инкар гьабиларо». 21Ва гьелъ абуна: «Шунемияй Авишаг дур вац Адониявие росасе кье».
22Цинги Сулейман пачаяс эбелалъе жаваб кьун абуна: «Щай дуца Адониявие шунемияй Авишаг гьарулей йигей? Гьедин батани, пачалъиги гьаре гьесие – гьев дир кӀудияв вацлъидал, – уха, гьаре гьесиеги, кашиш Авиатариеги ва Церуягьил вас Иоавиеги».
23Хадув БЕТӀЕРГЬАНАСУЛ цӀар бахъун гьедана Сулейман: «БетӀергьанас балагьалъукье ккезавеги дун, гьеб гьариялъухъ Адониявица гӀумру рехичӀони! 24Дун, Жиндирго амруялда рекъон, дир эмен Давудил тахида лъурав ва дир рукъ-къай щула гьабурав хӀакъав БЕТӀЕРГЬАНАСУЛ цӀаралхӀа, гьале жакъаго Адонияв хвезе ккола».
25Сулейман пачаяс ЕгьоядагӀил вас Бенаягь витӀун, гьес Адонияв чӀвана.
Авиатарие гьабураб тамихӀ ва Иоавил хвел
26Хадуб кашиш Авиатарида абуна пачаяс: «Дурго Анатоталда ругел ракьазде а. Мун чӀвазе мустахӀикъав чи вуго, амма жакъа дица мун чӀвазе къотӀиларо, щайгурелъул дир эмен Давудида цебе Къудратав БЕТӀЕРГЬАНАСУЛ гъамас баччарав ва гьесда цадахъ кинабго захӀмалъиги хӀехьарав чи вугелъул мун».
27Цинги Сулейманица БЕТӀЕРГЬАНАСУЛ кашишлъиялдаса нахъе гьавуна Авиатар – Шилоялдаса Илясил наслуялда тӀаде бачӀун букӀараб БЕТӀЕРГЬАНАСУЛ рагӀи#2:27 Бал. 1 Пач. 2:27-36. гьедин тӀубана. 28Цебе Авессаломил рахъ кквечӀониги, Адониявида хадув индал Иоав, гьеб хабар тӀаде щведал, БЕТӀЕРГЬАНАСУЛ Чодрониве жанивеги лъутун, къурбан хъолеб бакӀалъул лълъурдулги ккун чӀана гьев. 29Сулейман пачаясда бицана Иоав БЕТӀЕРГЬАНАСУЛ Чодрониве жанивеги лъутун, къурбан хъолеб бакӀалда чӀун вугин. Гьебмехалда Сулейманица ЕгьоядагӀил вас Бенаягьие буюрухъ кьуна: «Инеги ун, чӀвай дов!»
30БЕТӀЕРГЬАНАСУЛ Чодронивеги ун, Бенаягь Иоавида кӀалъана: «Пачаяс лъазабулеб буго: „КъватӀиве вачӀа!“ – ян».
Амма гьес жаваб кьуна: «ВачӀинаро, гьаб бакӀалда хвела дун», – ин.
Бенаягьица пачаясда бицана Иоавица гьедин абунилан.
31Гьебмехалда пачаяс Бенаягьида абуна: «Гьес абухъе гьабе. ЧӀван хабалъ лъе дов, ва дунги дир инсул аслуги, Иоавица гӀайибго гьечӀого гӀодобе тӀураб биялъул хӀакъалдаса рацӀцӀад гьаре. 32Жиндица гӀодобе тӀураб биялъухъ БЕТӀЕРГЬАНАС бецӀила гьесие, щайгурелъул дир инсудаги лъачӀого кӀиявго чиясда тӀаделъана гьев ва хвалчаца чӀвана гьел. Гьел кӀиялго – ГӀизраилалъул аскаралъул бетӀер Нерил вас Авнерги ва Ягьудиялъул аскаралъул бетӀер Етерил вас Амасги – гьесдаса тӀокӀал ва иман бугел рукӀана. 33Гьезул гӀодобе тӀураб биялъул гӀайиб Иоавидаги гьесул наслуялдаги тӀаде ккаги абадиялъего. Амма Давудиеги, гьесул зурияталъеги, гьесул агьлуялъеги, гьесул ирсилазеги БЕТӀЕРГЬАНАС даимго лъикӀаб гӀумру кьеги».
34ЕгьоядагӀил вас Бенаягьица гьенивеги ун Иоав чӀвана ва гӀицӀаб авлахъалда бугеб гьесул жиндирго ракьалда хабалъ лъуна. 35Пачаяс ЕгьоядагӀил вас Бенаягь тана Иоавил бакӀалда аскаразул бетӀерлъун, Авиатарил бакӀалда кашишлъун Цадок тана.
ШимгӀил хвел
36Хадуб пачаяс ШимгӀида хадур чагӀи ритӀана ва гьесда лъазабуна: «Иерусалималда дуего минаги бай ва гьениб чӀел гьабе, тӀокӀаб батӀияб бакӀалде къватӀиве вахъунге. 37Дуда лъан букӀа, мун къватӀиве вахъун Кедрон расалъи дуца бахараб къоялъ, мун хвезе вукӀин ва дурго гӀажалалъе гӀайибиявги мунго вукӀине вугевлъи».
38«ЛъикӀ буго, – ян абуна ШимгӀица. Дур лагъас кинабго дир бетӀергьан пачаяс абухъе гьабила».
ШимгӀица гӀезегӀан мехалъ гӀумру гьабуна Иерусалималда. 39Амма лъабго сон ун хадуб Гаталъул пача, Маахил вас Ахишихъе лъутана ШимгӀил кӀиго лагъ ва ШимгӀида гьесул лагъзал Гаталда ругилан бицана.
40Цинги, хӀамаги кьолон, гьес лагъзал ралагьизе Гаталде Ахишихъе нух босана. Гаталдаса лагъзалги рачун ШимгӀи тӀадвуссана. 41Сулейманида ШимгӀи Иерусалималдаса къватӀиве Гаталде ун вукӀанилан ва тӀадвуссун вачӀанилан бициндал, 42пачаяс ШимгӀи жиндихъего ахӀана ва гьесда абуна:
«Дица дуда лъазабун гуребищ букӀараб, БЕТӀЕРГЬАНАСУЛ цӀар бахъун духъа рагӀиги босун, батӀалъи гьечӀо мун киве аниги, дуда лъан букӀа, гьаниса къватӀиве араб къоялъ мун хвезе вугевлъиян абун? ЛъикӀ буго, гьедин гьабилин кӀалъана мун доб къоялъ. 43Щайха цинги БЕТӀЕРГЬАНАСЕ гьедараб гьа хвезабураб ва дир буюрухъ тӀубазабичӀеб дуца?»
44Сулейманица ШимгӀида жеги абуна: «Дуда кидаго ракӀалда букӀине ккола дуца дир эмен Давудие гьабурабщинаб квешлъи. Гьанже БЕТӀЕРГЬАНАС гьабила дуе дур квешлъиялъухъ. 45Сулейман пачаясдайин абуни баракат лъела ва Давудил тах БЕТӀЕРГЬАНАСДА цебе кидаго къуркьулареблъун букӀина».
46Пачаяс ЕгьоядагӀил вас Бенаягьие буюрухъ кьуна ва гьес инеги ун, ШимгӀи чӀвана. Ва пачалъиялъул кверщел Сулейманил хъатикь тӀубан щулалъана.
Currently Selected:
3 Пачаби 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
