3 Пачаби 18

Иляс ГӀизраилалде тӀадвусси

1ГӀезегӀан заман ун хадуб, ракъдаллъи ккун лъабабилеб соналъ Илясихъе БЕТӀЕРГЬАНАСУЛ калима рещтӀана: «Вилълъа, Ахавида цеве вахъа, Дица гьаб ракьалде цӀад базабизе букӀине».

2Иляс нухде вахъана Ахавихъе ине.

Самариялда гӀасияб ракъи букӀана, 3ва Ахавица жиндирго кӀалгӀаялъул бетӀерав хъулухъчи ГӀобадиягь ахӀана жиндихъего. (ГӀобадиягь вукӀана БЕТӀЕРГЬАНАСЕ цӀакъ ритӀухъав чи. 4Изавелица БЕТӀЕРГЬАНАСУЛ аварагзаби гъурулаго, ГӀобадиягьица вачун нусго авараг кӀиго нохъода, кӀикъоялда анцӀ-анцӀ жиб-жиб нохъода жанир рахчана ва гьезие чед-лъимги чӀезабуна.)

5Ахавица ГӀобадиягьида абуна: «Гьаб улка къотӀун киналго иццазухъе ва лъаразухъе а. Щиб лъалеб, чуял ва гӀорцӀмал кваназаризе ва гьел хвалде ккечӀого рукӀине, хер батизе бегьула нилъеда».

6Гьез хал-шал гьабизе бугеб ракь цоцада гьоркьоб бикьана ва Ахав цо рахъалде, ГӀобадиягь цогидаб рахъалде ана. 7Жиндирго нухккун унаго ГӀобадиягьида Иляс дандчӀвана. ГӀобадиягьида гьев лъана ва ракьда гьумер цун гӀодове къулана. Цинги гьес абуна: «Мунищ дир бетӀергьан Иляс?»

8«Дун вуго, – ян жаваб кьуна Илясица. – Вахъа, дурго хважаинасда дун вугин гьанивин бицине а».

9«Дида ккараб мунагь щиб, – ин гьикъана ГӀобадиягьица, – гьедин дун, дур лагъ дуца Ахавида кодове тамихӀалъе кьезе? 10Дур БЕТӀЕРГЬАН Аллагьасул цӀаралхӀа, Дир хважаинас мун валагьизе ритӀичӀеб, я цониги халкъ, я цониги пачалихъ хутӀичӀо. Жиб-жиб нухалъ гьез мун гьечӀин довайин абурабго, гьес гьел мун ватичӀин абун гьедизе тӀамуна. 11Гьанже дуца абулеб буго инеги ун дир хважаинасда мун гьанив вугин бицейин. 12Дун гьаниса аравго БЕТӀЕРГЬАНАСУЛ РухӀалъ вачун, киве аравали лъачӀого тӀагӀинагури мун. Дица вачӀун Ахавида абила, гьесдайин абуни мун ватиларо, цинги гьес дун чӀвала. Дуда лъан букӀа, дица, дур лагъас, гӀолохъанлъиялдаса нахъего БЕТӀЕРГЬАНАСЕ как-дин гьабураблъи. 13Изавелица БЕТӀЕРГЬАНАСУЛ аварагзаби чӀвалеб мехалъ дица гьабураб жо бицинчӀищ дуда? Дица БЕТӀЕРГЬАНАСУЛ нусго авараг кӀиго нохъода, кӀикъоялда анцӀ-анцӀ щибаб нохъода жанир рахчана ва гьезие чед-лъимги чӀезабуна. 14Гьанже дуца абулеб буго дида дурго хважаинасухъеги ун гьесда Иляс вугин гьанивин абейин. Гьес чӀван рехула дун!»

15Илясица абуна: «Гучал Аскаразул БЕТӀЕРГЬАНАСУЛ цӀаралхӀа, гьале жакъа дун Ахавида цеве вахъине вуго».

Илясги БагӀалил хъулухъчагӀиги Кармил магӀарда

16ГӀобадиягь Ахавихъе вилълъана ва кинабго гьесда бицана. Цинги Ахав Илясида данде вахъана. 17Илясида бер чӀварабго гьес абуна: «Мунищ гьав? Гьаб балагь ГӀизраилалда тӀаде бачарав чи!» – ян.

18«Дица бачинчӀо ГӀизраилалда тӀаде балагь, – ин жаваб кьуна Илясица, – амма дуцаги дур инсул гӀагарлъиялъги бачана: БЕТӀЕРГЬАНАСУЛ амруялги рехун тун нужлъидал БагӀалида хадур рилълъарал. 19АхӀизе чагӀиги ритӀун тӀолабго ГӀизраилалдаса халкъ бакӀаре дихъе Кармил магӀарде. Изавелида цадахъ квана-гьекъолев ункънусиялда кӀикъоялда анцӀго БагӀалил аварагги, ункънусго Ашерал аварагги ваче гьаниве».

20Ахавица киналго гӀизраилазухъе хабар битӀана ва Кармил магӀарде аварагзаби ракӀарана. 21Иляс тӀолго халкъалда цеве вахъун кӀалъана:

«Кире щвезегӀан нужеца цого заманалда кӀиго бакӀида гӀодор чӀезе хӀаракат бахъизе бугеб? Нужер Аллагьлъун БЕТӀЕРГЬАН ватани – Гьесда хадур рилълъа, БагӀал ватани – гьесда хадур а». Халкъалъ цо кӀал кӀалъачӀо. 22Гьебмехалда Илясица гьезда абуна:

«БЕТӀЕРГЬАНАСУЛ аварагзабазда гьоркьов цохӀо дун гурони хутӀичӀо, БагӀалил абуни ункънусиялда кӀикъоялда анцӀго авараг вуго. 23Биччанте кӀиго баси бачун бачӀине гьанибе. Хадуб гьез тӀаса бище абе цояб, хъун къотӀ-къотӀун кескал гьарун цӀулада тӀад лъе абе, амма цӀа гъоге. Дица цогидаб баси къачӀала, цӀулада тӀад лъела, амма цӀа гъеларо. 24Цинги нужеца нужерго аллагьасул цӀар ахӀе, дица БЕТӀЕРГЬАНАСУЛ цӀар ахӀила. ЦӀадудалъун жаваб кьурав Аллагь вукӀине вуго хӀакъикъияв Аллагь».

ЛъикӀаб жо бицунеб буго дуцаян абун кӀалъана халкъ. 25Илясица БагӀалил аварагзабазда абуна: «Нуж гьедигӀан гӀемерал ругелъул, тӀоцебе нужеца гьаб кӀиябго басидул цояб тӀаса бищун къачӀай. Нужерго аллагьасул цӀар ахӀе, амма цӀа бакуге».

26Гьез цояб баси бачана ва хъун къотӀ-къотӀун къачӀана, цинги радалиса бахъараб къаде мех щвезегӀан БагӀалиде ахӀи бана.

«Нижер гьари къабул гьабе, БагӀал!» – ин ахӀдана гьел. Амма данде сас рагӀулеб букӀинчӀо ва лъицаго гьезие жаваб кьолеб букӀинчӀо. Жинцаго гьабураб къурбаналъе бакӀалда сверун лъугьун эхе-эхеде кӀанцӀана ва хӀал щун рекерахъдана гьел. 27Къадемех щварабго Иляс гьезда тӀад велъанхъизе жувана.

«ЛъикӀ гӀергӀеде! – ян абулеб букӀана гьес. – Гьев аллагьлъидал! Гьев цо сундулниги пикруялда ватила, ялъуни сапаралда ватила. Щиб лъалеб, кьижун ккун ватизеги бегьула ва гьев ворчӀизавизе ккела». 28Гьел жеги цӀикӀкӀун ахӀдана ва жидерго гӀадаталда рекъон, хунжрузгун хучдуз жалго жидецаго ругънахинарун би чвахизабуна. 29Къадемехги ана ва бакъанигӀуж щвезегӀан гьел жеги хӀалалдаса ун хъетӀана. Амма данде сас рагӀулеб букӀинчӀо ва лъицаго гьезие жавабги кьечӀо. 30Цинги Илясица халкъалда абуна: «Гьанире дида аскӀоре рачӀа», – ян.

Гьел аскӀоре рачӀана ва гьес биххун букӀараб БЕТӀЕРГЬАНАСУЛ къурбаналъе бакӀ цӀи гьабун къачӀана. 31Илясица анцӀила кӀиго гамачӀ босана, дуда цӀар ГӀизраил букӀине бугилан БЕТӀЕРГЬАН жинда кӀалъарав Якъубидаса лъугьараб анцӀила кӀиго къавмалъул къадаралда рекъон. 32Гьел ганчӀалги лъун гьес БЕТӀЕРГЬАНАСЕ къурбаналъе бакӀ бана ва гьелда сверун кӀиго сат#18:32 2 сат – гӀага-шагарго 15 литра. ролъул жанибе унеб рахъ бухъана. 33Гьес цӀадуе цӀул лъуна, басидул къаркъалаги кескал гьарун къотӀун цӀулада тӀад лъуна. 34Хадуб гьес абуна:

«Ункъо кӀудияб гӀеретӀ лъадал цӀезабе ва гьеб гьаб тӀубан бухӀулеб къурбаналдеги цӀуладеги тӀаде тӀе. КӀиабилеб нухалъги гьединго гьабе», – ян.

Гьез гьедин гьабуна. Лъабабилеб нухалъги гьединго гьабейилан абуна гьес. Лъабабилеб нухалъги гьединго гьабуна. 35Лъим къурбаналъул бакӀалда сверун чвахана ва рахъцин цӀезабуна. 36Къурбаналъе мех щварабго Иляс аскӀовегӀан къана ва гьес дугӀа гьабуна:

«Ибрагьимил, ИсхӀакъил ва ГӀизраилил БЕТӀЕРГЬАН Аллагь, биччанте жакъа халкъалда лъан букӀине Мун вугевлъи ГӀизраилалъул Аллагь ва дунги Дур лагъ вукӀин, гьаб кинабгоги дица Дур амруялда рекъон гьабулеб букӀин! 37Къабул гьабе БЕТӀЕРГЬАН, къабул гьабе дир дугӀа, гьаб халкъалда Мун БЕТӀЕРГЬАН Аллагь вукӀин ва Дуца цӀидасан гьезул ракӀал Дудехунго руссинарулел рукӀин лъан букӀине».

38Гьебмехалда БЕТӀЕРГЬАНАСДАСА цӀа рещтӀана, ва цӀулгун, гамачӀгун, ракьгун ва рахъниб букӀараб лъимгун цадахъ тӀубан бухӀулеб къурбан гьеб цӀадуца къулчӀана. 39Гьеб бихьарабго тӀолабго халкъалъ кӀалагъоркье речӀчӀун сужда гьабуна ва гьел ахӀдана:

«БЕТӀЕРГЬАН вуго Аллагь! БЕТӀЕРГЬАН вуго Аллагь, БагӀал гуро!» 40Илясица гьезие буюрухъ кьуна:

«БагӀалил аварагзаби ккве! Цонигияв лъутун ворчӀизе виччаге!» – ян. Гьез гьел ккуна ва Илясица Кишон расалъиялдеги рачун гьел киналго чӀвана.

Ракъдаллъиялъул ахир

41Илясица Ахавида абуна: «Вахъа, квана-гьекъезе а, чвахун балеб цӀадул сас рагӀулеб бугин».

42Ахав квана-гьекъезе ана, Илясин абуни Кармил мегӀералъул тӀогьиве вахана, гьенив гьумерги накабазда гьоркьоб лъун суждаялда чӀана.

43«Вахъа, ралъдал рахъалдехун валагьизе а», – ян абуна гьес жиндирго лагъасда. Гьев валагьизе ана ва щибго гьечӀин абуна.

Анкьго нухалъ абуна Илясица: «Нахъеги а», – ян. 44Анкьабилеб нухалъ лагъас абуна:

«Ралъдахъа цо гьитӀинаб, хъатидаса кӀудияб гьечӀеб накӀкӀ бачӀунеб буго», – ян.

Цинги Илясица абуна: «Инеги ун Ахавида абе: „Чолгьаказда хехго чуял рай, цӀадги бан мунго гьенив хутӀичӀого вукӀине“, – ян».

45Цодагьаб заманалда жаниб накӀкӀаз бецӀлъизабуна зоб, кутакаб гьури бахъана ва тӀупан тӀезе байбихьана; Ахавица Изреелалде нух босана. 46Илясида тӀаде БЕТӀЕРГЬАНАСУЛ къуват рещтӀана ва рачликь къазабун гӀабагун Ахавида цеве-цеве векерана гьев Изреелалде щвезегӀан.

Currently Selected:

3 Пачаби 18: АварАК

Highlight

Copy