Коринфиязухъе тӀоцебесеб кагъат 5

5 бетӀер

Иман лъуразул агьлуялда жаниб ккараб пасатаб иш

1Цинги, дида бицана нужер гьениб мажусиязулгицин гьечӀебгӀадаб инжитаб иш лъугьун бугилан – цо чи жиндирго бесдал эбелалда аскӀов вегулев вугилан. 2Гьелдаса пашманлъизе кколеб бакӀалда нужер чӀухӀиго щиб! Гьединаб инжитлъи жиндасан лъугьарав чи нужерго агьлуялда гьоркьоса вачахъизе кколаан нужеца. 3-4Дирго рахъалъ абуни, черх гьаниб бугониги, рухӀ гьениб нужеда аскӀоб бугелъул, гьенив вугев гӀадин вукӀуна дун. Нужер данделъиялда нилъер ТӀадегӀанав ГӀисал къудратгун цадахъ дирго рухӀги гӀахьаллъизабун, нилъер ТӀадегӀанав ГӀисал цӀаралдалъун дица хӀукму къотӀана 5гьеб иш гьабурав чи илбисалъул кверщаликье кьезе – биччанте гьесул мунагьаб напс хвезе. ТӀадегӀанав вачӀараб къоялъ гьесул рухӀ хвасарлъизеги бегьула.

6Нужер гьеб гӀамал кӀодолъи лъикӀаб хасият гуро. Нужеда рагӀанищ гьадинаб кици: «ГьитӀинаб реччеялъги гӀемераб ханжу беччизабула»? 7Мунагьалъул басрияб речче тӀубанго нахъе рехе. Гьебмехалъ речче гъорлъ гьечӀого бежараб чедлъун лъугьина нуж. Гьединаб чедин нуж кколел! Нилъер пасхаялъул кьегӀер – МасихӀ – цевего къурбанлъун лъугьиндалха!#5:7 Пасхаялъул хасаб квание кьегӀерги хъолаан, реччичӀел чадалги режулаан. 8РачӀа гьанже нилъеца пасхаялъул байрамалде хӀадурлъи гьабилин басрияб речче (ай мунагьги квешлъиги) цадахъ гьечӀого. РеччичӀел чадал (ай бацӀцӀадабщинабги хӀакъабщинабги) цадахъ, росун хӀадурлъизин гьелде.

9Дица нужехъе битӀараб кагътида хъван букӀана пасатал чагӀазулгун гьоркьоблъи гьабугейилан. 10Пасатал, хъантӀарал, макруял гӀадамазул ва гьересиаллагьзабазе лагълъи гьабулел мажусиязул гуребха дица бицунеб букӀараб. Гьездаса ратӀалъизени, дуниял тун ине ккелаан ниж. 11Дица хъван букӀана, жидеца иман лъун бугиланги абун, пасалъиги гьабулел, хъантӀун магӀишатги гьабулел, гьересиаллагьзабазе лагълъиги гьабулел, мацӀги гьабулел, хӀилла-рекӀкӀги гьабулел, гьекъолдизеги гьекъолдулел гӀадамазулгун хурхен гьабугейилан, хӀатта гьезда цадахъ гӀодор чӀун кванагейилан. 12-13Нилъер гуреб агьлуялъе суд гьабунги щайха дие? Аллагьас гьабила гьезие суд. Нужерго агьлуялъул чиясе суд гьабизе кколаребищ нужеца? ТӀухьдузда хъван бугелъул: «Квешав чи нужер агьлуялда гьоркьоса нахъе вачахъе», – ян.

Currently Selected:

Коринфиязухъе тӀоцебесеб кагъат 5: АварАК

Highlight

Copy