Потон 7

7-тӥ ЛЮКЕТ

1Нош Кузё-Инмар Моисейлы шуиз: «Учкы, Мон тонэ фараонлы Инмар карыса пукто, нош Аарон агаед тынад пророкед луоз: 2мар Мон тонэ косо, тон [солы] ваньзэ вера, нош Аарон агаед фараонлы вералоз, израиль пиосты фараон ас музъемысьтыз кошкыны мед лэзёз шуыса. 3Нош Мон фараонлэсь сюлэмзэ лекомыто, Аслэсьтым трос паймымон ужъёсме, паймымон тодметъёсме Египет музъемын возьмато; 4фараон тӥлесьтыд верандэс санэ уз поны, соку Мон Египет вылэ киме ӝуто но Аслэсьтым ожгарчиосме, Ас калыкме, израиль пиосты, быдӟым судъёс пыр Египет музъемысь потто. 5Египет вылэ киме ӝутыса, соос пӧлысь израиль пиосты поттыкум, [вань] египет калык тодоз, Мон Кузё-Инмар луисько шуыса». 6Кызьы Кузё-Инмар Моисеен Ааронлы косӥз, соос озьы ик лэсьтӥзы. 7Фараонлы вераны кутскыкузы, Моисейлы тямыстон арес вал, нош Ааронлы [агаезлы] – тямыстон куинь арес. 8Моисеен Ааронлы Кузё-Инмар тазьы вераз, тазьы шуиз: 9«Фараон тӥледлы тазьы шуиз ке: ”Паймымон уж, [паймымон тодмет] возьматэ”, соку тон Аарон [агаедлы] шу: ”Бодыдэ кут но фараон азе, [солэн ляльчиосыз азе музъем вылэ] кушты, – со кыйлы пӧрмоз”». 10Моисеен Аарон фараон доры, [солэн ляльчиосыз доры] лыктӥзы но лэсьтӥзы озьы, кызьы [соослы] Кузё-Инмар косӥз. Аарон бодызэ фараон азе, солэн ляльчиосыз азе куштӥз но, со кыйлы пӧрмиз. 11Соку фараон [Египетысь] визьнодоосты, туно-пеллёосты дораз ӧтьытӥз. Таос, Египетысь туноос, веднаськон амалъёсынызы таӵе ик уж лэсьтӥзы: 12ваньзы соос бодызэс куштӥзы но, соос кыйлы пӧрмизы, нош Ааронлэн бодыез соослэсь бодыоссэс ньылӥз. 13Фараонлэн сюлмыз лекомиз, соосты ӧз кылзы, кызьы вераз вал [таослы] Кузё-Инмар.

14Соку Кузё-Инмар Моисейлы шуиз: «Вогъяське фараонлэн сюлэмыз: солэн калыкез кошкыны лэземез уг поты. 15Ӵуказе ӵукна фараон доры мын: соку со ву дуре лыктоз, тон солэн сюрес вылаз, шур дуре, султы, кыйлы пӧрмытскем бодыдэ кияд кут но 16солы шу: ”Еврейёслэн Инмарзы Кузё-Инмар монэ тон доры тазьы вераны ыстӥз: ”Мынэсьтым калыкме кошкыны лэзь, луоё кыр дуннеын со, Мыным сӥзьыса, вӧсяськон ортчытыны мед быгатоз”; нош тон, тани, татчыозь верамез санэ ӧд на поны. 17Тазьы шуэ Кузё-Инмар: ”Татысен тон тодод, Мон Кузё-Инмар шуыса: киысьтым бодыен шурысь ву вылэ шукки ке, ву вирлы пӧрмоз, 18шурысь чорыг кулоз, шур зынмоз, египет калык шурысь вуэз юыны юрдоз”». 19Соку Кузё-Инмар Моисейлы шуиз: «Ааронлы [агаедлы] вера: ”[Кияд] бодыдэ кут но египет калыклэн вуос вылаз кидэ ӝут – шуръёссы вылэ, ошмес вайёссы вылэ, тыоссы вылэ, вань ву возиськон интыоссы вылэ кидэ вӧлъя но, отысь вуос вирлы пӧрмозы, быдэс Египет музъем вылын вир луоз, пулэсь, излэсь лэсьтэм сосудъёсын но”». 20Моисеен Аарон лэсьтӥзы озьы, кызьы косӥз Кузё-Инмар. [Аарон] бодызэ ӝутӥз но фараонлэн син азяз, солэн ляльчиосызлэн син азязы шурысь ву вылэ шуккиз, соку ик шурысь ву быдэсак вирлы пӧрмиз, 21шурысь чорыг соку кулӥз, шурысь зын потыны кутскиз, египет калыклэн шурысь вуэз юэмез ӧз ни луы; быдэс Египет музъемын вир вал. 22Египетысь туноос но тунаськыса-пелляськыса тазьы ик лэсьтӥзы. Соку фараонлэн сюлмыз лекомиз, со Моисеен Ааронлэсь верамзэс санэ ӧз поны, кызьы азьвыл ик Кузё-Инмар соослы вераз вал. 23Фараон берытскиз но аслаз дораз кошкиз; та учырез адӟыса но, солэн сюлмыз ӧз вырӟы. 24Соку вань египет калык шур котыре гудӟиськыны кутскиз юыны ву поттон понна, угось шурысь вуэз юэмзы уг ни луы вал. 25Кузё-Инмарлэн шурысь вуэз юыны ярантэм карем дырысеныз сизьым нунал ортчиз.

Currently Selected:

Потон 7: УДМБИБ

Highlight

Copy