Потон 13

13-тӥ ЛЮКЕТ

1Кузё-Инмар Моисейлы шуиз: 2«Израиль пиос пӧлын нырысь вордскем котькудзэ пиез, анай пушкысь нырысь потэмзэ, Мыным сӥзь, адямиосты но, пудоосты но, [малы ке шуоно] соос – Мынам». 3Моисей калыклы тазьы шуиз: «Тодады вае Египетысь, ляльчиын улонлэн юртысьтыз, потон та нуналдэс, уго Кузё-Инмар кужмо киыныз тӥледыз отысь поттӥз, со нуналэ чырсатэм нянез эн сие. 4Туннэ Авив толэзе потӥськоды. 5[Инмаред] Кузё-Инмар тонэ хананейёслэн, хеттейёслэн, аморрейёслэн, евейёслэн, иевусейёслэн, [гергесейёслэн, ферезейёслэн] музъемазы пыртэм бере, – со сярысь Со тынад атайёсыд азьын кыл сётыса вераз, йӧлын, чечыен бызись музъемез тыныд сётоз шуыса, – соку тон арлы быдэ та толэзе та вӧсяськонэз ортчытылы; 6сизьым нунал ӵоже юмал нянь сиыса ул, сизьыметӥ нуналаз Кузё-Инмарлы сӥзем праздник; 7сизьым нунал ӵоже юмал нянь сиыны кулэ, дорад чырсатэм нянед луыны кулэ ӧвӧл, быдэс улон шаерад но нянь шӧмед медаз луы. 8Со нуналэ пиедлы тазьы ялыса шу: ”Та со понна: Египетысь кошкыкум, [Инмар] Кузё-Инмар мар мон понна лэсьтӥз – сое буре вайыны”. 9Тон понна со ки вылад понэм пус мед луоз, син азяд адӟиськись синпелет мед луоз, Кузё-Инмарлэн законэз кыл вылад мед улоз, уго [Инмар] Кузё-Инмар Аслаз кужмо киыныз тонэ Египетысь поттӥз. 10Та пуктон-косонэз ас дыраз быдэсъя, арысь аре. 11[Инмаред] Кузё-Инмар тонэ Ханаан музъеме пыртӥз ке, сое тыныд сётӥз ке, кызьы Со тыныд но, тынад атайёсыдлы но кыл сётӥз, 12соку котькудзэ анай пушкысь нырысь потэм [пи] нуныез Кузё-Инмарлы висъя; ваньзэ нырысь вордскем ошпиостэ, такаостэ но Кузё-Инмарлы [сӥзь]. 13Нош котькудзэ [анаез пушкысь] нырысь потэм ишакез ыжпиен вошты; ӧд ке вошты, соку дун тырыса басьты; нылпиосыд пӧлысь котькудзэ нырысь вордскем пиез но дун тырыса басьты. 14”Мар та?” шуыса, пиед тонэ юано луиз ке, тон солы шу: ”Кузё-Инмар кужмо киыныз асьмеды Египетысь, ляльчиын улон юртысь, поттӥз, 15уго фараон асьмеды потыны лэзёнлы пумитъяськыса улыку, Кузё-Инмар Египетысь ваньзэс нырысь вордскем пиосты вииз, нырысь вордскем пиосты гинэ ӧвӧл, пудоослэсь но нырысь вордскем ошпиоссэс, такаоссэс вииз – соин ик мон Кузё-Инмарлы курбон вайисько ваньзэ анай пушкысь нырысь потэм айы луисьсэ, нош пиосы пӧлысь котькудзэ нырысь вордскемзэ дунэн басьтыса мозмыто; 16та ки вылад пус интыын мед луоз, синъёсыдлэн вылӥысьтызы йыркерттэт интыын мед луоз, уго Кузё-Инмар асьмеды Египетысь кужмо киыныз поттӥз”».

17Фараон калыкез кошкыны лэзем бере Инмар сое Филистим музъем вылтӥ мынӥсь сюрес кузя ӧз нуы, уго со матын сюрес; Инмар шуиз уго: «Ожмаськонэз адӟыса, калык медаз ӧкыны но берен Египетэ медаз берытскы». 18Инмар калыкез кыр дуннеысь котыр кузь сюрес кузя Горд Кам зарезь пала нуиз. Израиль пиос ожмаськон тӥрлыкъёсын Египет музъемысь потӥзы. 19Моисей ас сьӧраз Иосифлэсь лыоссэ басьтӥз, уго [Иосиф] израиль пиосты, кылзэс юаса, кыл сётытыса шуиз: «Тӥ доры Инмар лыктоз, нош тӥ мынэсьтым лыосме татысь сьӧрады басьтыса поттэ». 20[Израиль пиос] Сокхофысь потӥзы но луоё кыр дуннелэн дураз, Ефаме, вуыса, станэн#13:20 стан – вакчи дырлы дугдыса улон инты; лагерь. Сӥзем музъеме мыныкузы израиль пиос 41 (яке 42) интые лагерен (станэн) дугдылӥзы интыяськизы. 21Кузё-Инмар нуназе соослэн азязы пилем юбо пушкын соослы сюрес возьматыса мынӥз, нош уйин тыл юбо пушкын соослы сюресэз югдытыса мынӥз, уйин но, нуназе но соос мыныны мед быгатозы шуыса. 22Нуназе пилем юбо, уйин тыл юбо калык азьысь чик ӧз кошкылы.

Currently Selected:

Потон 13: УДМБИБ

Highlight

Copy