Маккавейёслэн 2-тӥ книгазы 9
9
9-тӥ ЛЮКЕТ
1Со вакытъёсыгес ик Персия шаерысь, сӥтэм-дантэм луыса, Антиох бертэ вал. 2Персеполь шуон городэ со пыриз но отысь храмез тарканы, городэз киултыны малпаз. Соку калык туж ӝог огазе люкаськиз но ожмаськон тӥрлык борды басьтӥськиз, нош Антиохез калык улляса лэзиз, соин ик со, возьытэ вуыса, дораз берытсконо луиз. 3Екбатаналы матын сылыкуз, солы ивор вуттӥзы Никанорен но Тимофеен луэм учыр сярысь. 4Со йыркурен ӝуатскиз но сое улляса лэзисьёслы урод-лек ужзы понна пунэм берыктонзэ но иудейёс вылын ик быдэстыны малпаз; валэн ожмаськон уробоез валтӥсез со ялан дыртытӥз, ӝоггес улляны косӥз, нош Инмысь суд со бӧрсьы кыльытэк мынӥз ини. Уго со вылтӥяськыса шуиз: «Иерусалимез, отчы вуи ке, иудейёслы шайвыл каро». 5Нош ваньзэ адӟись Кузё-Инмар Израильлэн Инмарез, бурмыны луонтэм, адскисьтэм амалэн шуккыса, сое погыртӥз: та кылъёссэ вераса гинэ вуиз, соку ик солэн кӧтыз чиданы луонтэм висьыны кутскиз, пушкыз-ерыз туж курадӟыны ӧдъяз, 6кемыз: со уго мукет муртъёслэсь пушсэс-ерзэс трос, адӟылымтэ-кылылымтэ амалъёсын курадӟытылӥз. 7Нош ачиз вылтӥяськемысь чик но ӧз дугдылы, эшшо но вылэгес йырзэ урдӥз, ӝуась тыло йыркурен со иудейёс вылэ шоказ, сюрес кузя ворттонзэс ялан ӝогомытӥз. Соку тазьы пӧрмиз: ӝог ворттыса мыныку, со уробоысь усиз но туж зол шуккиськиз: вань мугор люкетъёссэ вӧсь кариз. 8Со, кудӥз али гинэ ассэ адямиослэсь вылӥ карыса, вылтӥяськыса, малпа вал зарезь тулкымъёслы косонъёс сётылыны, малпа вал ӝужыт гурезьёсты вес вылын мертаны, со ик музъем вылэ погыртэмын вал; носилка вылын сое нуизы, ваньмызлы Инмарлэсь бадӟым кужымзэ возьматыса. 9Озьы та сьӧлыклэсь кышкасьтэм муртлэн мугор пушкысьтыз трос нумыръёс потӥзы; со улэп на дыръя, висёнлы, курадӟонлы чидатэк, мугор люкетъёсыз одӥген-одӥген усьылӥзы; быдэс армия пушкын солэн сисьмем зыныныз шоканы ик уг луы вал. 10Сое, кин та азьын гинэ ас понназ малпа вал инмысь кизилиос борды йӧтӥськыны, нокин но ӝутыса нуыны ӧз быгаты, бордысьтыз чиданы луонтэм зын потэмен сэрен. 11Табере, куасалтӥськем бераз, туж зол вылтӥяськон сямызлэсь куштӥськыны кутскиз, Инмарлэн эрикезъя вуэм курадӟонъёсыз минутлы быдэ золгес но золгес луэм бере со валатскиз. 12Аслэсьтыз покач зынзэ чиданы быгатымтэ дыръя со шуэ вал: «Инмарлы тэрытскон – шонер уж, кулоно муртлы вылтӥяськыны уг яра, астэ Инмарен оградэ пуктыны кулэ ӧвӧл». 13Сое жалямысь пыраклы дугдэм Кузё-Инмарлэсь сьӧлыклэсь кышкасьтэм тэльмырыса, вӧсяськыса шуиз: 14«Святой городэз, кудзэ мон музъемен ӵошкатыны, шайвыллы пӧрмытыны дыртӥ, эрико город луэ шуыса ялӥсько; 15иудейёсты, кудъёссэ мон сюе ватыны ӧй лэзьы, нылпиосынызы валче шӧйёссэс сьӧсь тылобурдоослы, пӧйшуръёслы куяны косӥ, табере Афины карын улӥсьёсын оградэ пырто. 16Святой храмез, кудзэ мон азьвыл таркай вал, чеберъяло туж синмаськымон арбериосын, вӧсяськон сосудъёсты ваньзэ берыкто, эшшо тросгес ваё, курбон сётонлы кӧня кулэ, сомында аслам ваньбур шыкысысьтым сёто; 17та сяна, ачим иудей карисько, вань улон интыостӥ ветлыса, Инмарлэн кужымез сярысь ивортыло». 18Нош висёнэз чик йӧнамтэысь, уго со доры Инмарлэн шонер судэз вуиз ни, со, ас вылаз оскиськонзэ ыштыса, со иудейёслы таӵе пуштросъем тэльмыронлы укшась гожтэт ыстӥз: 19«Эксэй но ож ужъёсын кивалтӥсь кузёйыр Антиох ас кун-эксэйлыказ улӥсь ӟечесь иудейёслы – туж-туж шумпотэлэ, тазалыко, шудбуро улэ. 20Нылпиосыныды валче тазалыко улӥськоды ке, ужъёсты но мылкыд каремдыя мыно ке, соку мон Инмарлы туж бадӟым тау каремме верасько, мон уго Инмар вылэ оскиськисько. 21Нош мон висьыса кыллисько но тӥлесьтыд ӟеч мылкыддэс, монэ сӥлы каремдэс гажаса тодам вайисько. Персияысь берытскыкум, туж секыт висёнэн висьыны кутски но вань калыклэн кышкатэк улонэз сярысь сюлмаськыны кулэ шуыса малпай. 22Улэп кылён пумысен оскиськонме ӧй ышты, висёнлэсь мозмытско на шуыса, туж оскисько на, 23но тодыса, кызьы атае но, вылӥысь кунъёсын ожмаськыкуз, аслаз вуоно воштӥсез сярысь ялӥз, – 24малпамтэ учыр луиз ке, кыӵе ке урод уж сярысь ялӥзы ке, та кунын улӥсь калык мед тодоз, кин кие кивалтон уж сётӥське, куалекъяно-кышкано медаз луэ. 25Со сяна пусъёно луисько, котыр ёросъёсыз киулазы возисьёс, асьме кунэн артысь эксэйёс дырез чакласа уло, витё, маин ваньмыз та йылпумъяськоз, соин ик мон эксэе Антиох пиме пуктӥ; сое мон вылӥысь улосвылъёсы ветлылыкум, тӥ пӧлысь тросэз киулэ оскыса сётылӥ, тӥледыз соин тодматылӥ; солы мон нимысьтыз гожтӥ. 26Мон тӥледыз оскытӥсько, курисько: вань калыктылы но, нимысьтыз адямиослы но мынэсьтым лэсьтэм ӟеч ужъёсме тодады мед возёды, та дыре монэ но, мынэсьтым пиме но гажандэс азьланяз но мед утёды. 27Уго мон оскисько, мынэсьтым мылкыдме санэ поныса, со тӥледын гажаса, яратыса кусып возёз».
28Тазьы та адями виылӥсь, Инмарез сантэмась мурт, аслаз курадӟытэм муртъёсыз кадь ик, туж курадӟыса, мурт дуннеысь гурезьёсы сантэмлэсь но сантэм кулонэн кулӥз. 29Солэсь мугорзэ соин ӵош быдэсмем мурт, Филипп, вайиз, ачиз Антиохлэн пиезлэсь кышкаменыз, Египетэ Филометор Птоломей доры кошкиз.
Currently Selected:
Маккавейёслэн 2-тӥ книгазы 9: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016