Маккавейёслэн 2-тӥ книгазы 7
7
7-тӥ ЛЮКЕТ
1Тазьы но луиз: сизьым агай-вынъёсты анаенызы валче кутӥзы но, эксэйлэн косэмезъя, сюлоен, сӥнырезлэсь пунэм гозыен тышкаса, законэн сиыны лэзьымтэ сиёнэз – парсь сӥлез – сиыны косӥзы. 2Соос пӧлысь одӥгез, ваньзы понна ответ кутыса, шуиз: «Мар сярысь тынад юалляськемед потэ яке милесьтым мар тодэмед потэ? Атайёсмылэсь законъёссэс сӧрытозь, ми эсьмаса кулыны дась». 3Соку эксэйлэн йыркурез ӝуатскиз но табаосты, пуртыосты ӟырдатыны косӥз. 4Улазы тыл ӝуатэм бере соку ик ас вылаз ответ басьтӥсьлэсь кылзэ вандыны косӥз, анаез азьын, вань агай-вынъёсыз азьын вылысьтыз кузэ ниыны но мугор люкетъёссэ кораны косӥз. 5Вань мугор люкетъёссэ уретъям бере со шока на вал, соку эксэй сое, тылскем доры вайыса, таба вылын сутыны косӥз; таба бордысь бусэн ӵын потыны кутскем бере агай-вынъёс анаенызы ӵош, кулонэз кышкатэк чиданы кулэ шуыса, ог-огзэс юнматӥзы, шуизы: 6«Инмар Кузё-Инмар адӟе, зэмзэ ик асьмеды жалялоз, кызьы Моисей ас кырӟанэныз калык азьын ивортӥз: Аслэсьтыз ляльчиоссэ Со жалялоз».#7:6 2Зак. 32:36 7Нырысетӥез кулэм бере кыкетӥзэ курадӟытыны поттӥзы, йырысьтыз кузэ йырсиеныз валче ниыса ишкалтэмзы бере «мугор люкетъёстэ одӥген-одӥген курадӟытыны кутскеммылэсь азьло (парсь сӥль) сиёд-а» шуыса юазы. 8Нош со атыкай кылыныз ответ сётыса шуиз: «Уг». Соин ик со но, нырысетӥез кадь ик, курадӟонэз чиданы басьтӥськиз. 9Берпумзэ шокчон азяз со шуиз: «Тон, курадӟытӥсь, таизлэсь улонлэсь милемды люкиськод, нош дуннелэн Эксэез милемды, Солэн законъёсыз понна кулэмъёсты, пумтэм вапумъёс улон понна, кулэмысь улӟытыса султытоз». 10Та бере куинетӥез курадӟытыны поттэмын вал, кылзэ куремзы бере соку ик со кылзэ мычиз, кышкатскытэк киоссэ но мычиз, 11кышкатэк шуиз: «Соосты мыным Инмар кузьмаз, Солэн законъёсыз понна мон соосты жалятэк сётӥсько, Солэсь нош ик соосты басьтыны оскиськисько». 12Ачиз эксэй, соин ӵош огазьын луэмъёс но егит пилэн таӵе кышкасьтэм луэмезлы паймемын вал, уго со курадӟонъёссэ номыр ӵотэ но ӧз поны. 13Таиз но кулэм бере таӵе амалэн ик ньылетӥзэ но кесязы, курадӟытӥзы. 14Лулыз потон азьын со тазьы шуиз: «Адямиослэн киулазы кулӥсьлы дунолэсь но дуно луэ Инмар вылэ оскиськыны, Со нош ик кулэмысь улӟытыса султытоз уго; нош тон кулэм берад пумтэм улонэ уд пыры». 15Та бере витетӥзэ вуттӥзы но сое курадӟытыны кутскизы. 16Со, эксэй шоры учкыса, шуиз: «Адямиосын кузёяськыны луонлыкед вань бере, тон, ачид но сисьмоно-быроно мурт, лэсьтӥськод мае лэсьтэмед потэ; но тон эн малпа, Инмар милесьтым выжымес кулэтэм кариз шуыса. 17Возьма, тон но Солэсь быдӟым кужымзэ адӟод, адӟод, кызьы Со тонэ, тынэсьтыд выжыдэ но вӧсь кароз». 18Та бере куатетӥзэ вуттӥзы, кулонлы дасяськыса со шуиз: «Юнме шорысь астэ эн пӧя. Тае ми чидано луиськомы Инмармы азьын сьӧлыкаммы понна, соин ик та паймыны ярамон учыръёс ортчо. 19Эн малпа, Инмарлы пумит султыны дӥсьтэмед понна вӧсь карытэк кылёд шуыса». 20Нош тужгес но паймыны, данъяса буре вайыны ярамон анай, со ас синмыныз адӟиз одӥг нунал куспын сизьым пиоссэ виылэмзэс но, Кузё-Инмар вылэ оскиськыса, юн мылкыдын ваньзэ тае чидаз. 21Батырлыко мылкыдын тыр луыса, кышномурт малпанзэ пиосмурт духен юнматыса, вань пиоссэ ӟеч кылъёсын лӧпкытыса, атыкай кылыныз соослы тазьы шуиз: 22«Мон уг тодӥськы, кызьы тӥ мынам мугор пушкам кылдыны кутскиды; шокан но улон мон тӥледлы ӧй сёты; котькуддылэсь мугор люкетъёстэс мон ӧй кылдыты. 23Дуннеез Кылдытӥсь, адями выжыез Кылдытӥсь, ваньмызлэсь кылдонзэс тупатӥз-радъяз, Со нош ик тӥледлы гажаса-жаляса шокан но улон сётоз, уго тӥ али Солэсь законъёссэ утён понна асьтэдыз асьтэос уд ни жаляське». 24Антиох малпаз, сое адӟонтэм каро шуыса, тазьы вераса сое сантэмало, кожаз, соин ик со улэп на кылем покчи пиез сюлворыса аслэсьтыз куронзэ быдэстыны куриз, сое кыл вылын гинэ оскытыны ӧз выры, сое – атайёсызлэн законъёсызлэсь куштӥськиз ке – узырмытоз, шудо кароз, солы эш луоз, сое сӥё-дано ужъёсын кивалтӥсь кароз, кыл сётыса но оскытылӥз. 25Нош егит пияшлэсь солэсь верамзэ чик санэ понымтэзэ адӟыса, эксэй солэсь анайзэ ӧтьытӥз но сое пизэ индылыны куриз, пиез аслэсьтыз улонзэ мед утёз шуыса. 26Трос-трос либатыны выремысьтыз, анай соглаш луисько шуиз пизэ берыктыса утчаны. 27Нош ачиз, пиез пала мыкыртӥськыса, лек курадӟытӥсез мыскылляса, атыкай кылын солы шуиз: «Пие! Жаля монэ, мон тонэ ас пушкам укмыс толэзь ӵоже нуллӥ, куинь ар ӵоже тонэ нонтӥ, сюдӥ-вордӥ, быдэ вуттӥ, нодъяй-дышетӥ. 28Нуные, мон тонэ тэльмырыса курисько: учкы ин шоры, музъем шоры, ваньзэ адӟид ке, тод, ваньзэ тае Инмар номыртэмысь кылдытӥз шуыса, тазьы ик адями выжы но кылдӥз. 29Та адями виылӥсьлэсь эн курда, агайёсыдлэсь улэ эн усьы, кулонэз кабыл басьты, соку мон Инмарлэн гажан-жалянэныз, агайёсыныд ӵош тонэ нош ик аслым карыны мед быгатом».
30Со вера на вал, нош егит пи шуиз: «Мае тӥ возьмаськоды? Эксэйлэсь косонзэ мон пелям уг понӥськы, мон тэрытскисько Моисей пыр атайёсмылы сётэм законлэн косонъёсызлы. 31Нош тон, еврейёс понна вань лекез-уродэз поттӥсь, Инмар ки улысь уд пегӟы. 32Ми асьмелэн сьӧлыкъёсмы понна курадӟиськомы. 33Визьман понна, милемды вӧсь карон понна улэп Кузё-Инмар вакчи дырлы ми вылэ вожзэ поттӥз ке, Со нош ик Аслэсьтыз ляльчиоссэ жалян пала берытскоз. 34Нош тон, вань адямиос пӧлысь самой сьӧлыклэсь кышкасьтэмез, йыруж лэсьтӥсез, юнме шорысь астэ вылэ эн ӝут, ӧрекчи оскиськонъёсын астэ эн лӧпкыты, аслэсьтыд кидэ Солэн ляльчиосыз вылэ ӝутыса; 35уго тон ӧд на мозмытскы на Ваньмызлэсь Кужмо, Ваньзэ Адӟись Инмарлэн судэзлэсь. 36Агай-вынъёсмы та виын вакчи дыр ӵоже курадӟон чидазы но Инмарлэн сӥзён-косонэзъя бырисьтэм улонэз басьтӥзы, нош тон Инмарлэн судэзъя, астэ вылӥ карем понна шонер вӧсь каронэз чидано луод. 37Нош мон, агайёсы музэн ик, атайёсмылэн законъёссы понна сётӥсько лулме но, мугорме но, Инмарлы вазиськисько: ӝоггес Со Аслэсьтыз калыксэ жаляны мед кутскысал, нош тон курадӟыса, вӧсь луон пыр мед тодытысалыд, Со – одӥгназ гинэ Инмар луэ шуыса, 38Ваньмызлэсь Кужмолэн вань выжымы вылэ шонер вуэм вожпотонэз мон вылысен, мынам агайёсы вылысен мед кысысал». 39Соку йыркурен урмем эксэй, серем каремлэсь вожпотонзэ кытчы карыны тодытэк, мукетъёссэ сярысь, тазэ эшшо но золгес вӧсь кариз. 40Озьы таиз но улонзэ дун-чылкыт куен йылпумъяз, быдэсак Кузё-Инмар вылэ оскиськыса. 41Пиосыз бере анай но кулӥз.
42Сульдэръёслы-идолъёслы сӥзем курбонъёс сиён сярысь, чидантэм секыт курадӟытонъёс сярысь тырмыт ини верамын.
Currently Selected:
Маккавейёслэн 2-тӥ книгазы 7: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016