Маккавейёслэн 2-тӥ книгазы 11
11
11-тӥ ЛЮКЕТ
1Ӧжыт-ӧжыт гинэ дыр ортчем бере эксэйлэн ӵыжы-выжыез, солэн чакласез-утисез, эксэйлэн воштӥсез, Лисий, – тазьы луиз шуыса, кӧтыз туж ӝож вал, – 2со люказ ог тямыстон сюрс пыдын ожмаськисьёсты, вал вылын вань ожмаськисьёсты, собере иудейёслы пумит ожмаськыны вырӟиз, соослэсь городзэс эллинъёслы улон инты карыны малпаз. 3Мукет язычникъёслэн вӧсяськон интыоссылы кадь ик Иерусалимысь храмлы но выт тырон поныны малпаз, нош вӧсяськон ужъёсъя кузё луонэз арлы быдэ вузаськись-басьтӥськись карыны малпаз. 4Инмарлэн кужымез сярысь со чик ӧз малпаськы, дасо сюрс пыдын ожмаськисьёс, вал вылын сюрсъёсын ожмаськисьёс вылэ, тямыстон слонъёс вылэ со оскиськиз. 5Иудеяе пыриз но, Иерусалимлы ог вить стадия кеме интыяськем Вефсура изкар доры вуыса, сое котыртӥз. 6Маккавей но соин ӵош ветлӥсьёс Лисий юнматэм каръёсты котыртэ шуыса тодӥзы, соку соос синвуэн, бӧрдыса калыкен ӵош Израилез утьыны ӟеч Кылчинэз мед ыстысал шуыса, Кузё-Инмарлэсь тэльмырыса куризы. 7Нош Маккавей ачиз нырысь ик ожмаськон тӥрлык кияз кутӥз но, ассэ кышкытлык киулэ сётыса, агай-вынъёслы юрттыны ас котырысьтыз мукетъёссэ но ӝутказ; соос соку ик капчи мылкыдын ожмаськонэ мыныны потӥзы. 8Иерусалимлы матын сылыкузы на, со виын соослы азьвалтӥсе султӥз вал вылын мынӥсь тӧдьы дӥськутэн дӥсяськем мурт, зарнилэсь лэсьтэм ожмаськон тӥрлыкен сэзъясь. 9Соос ваньзы гажась-жалясь Инмарлы тау каризы но, духенызы юнматскыса, адямиосты гинэ ӧвӧл, сьӧсь пӧйшуръёсты но, корт борддоръёсты но пыргытыны дасесь вал. 10Тазьы соос Инмысь вуэм ожмаськисьлэн шобрет улаз Кузё-Инмарлэн сётэм гажан-жалянэныз вуизы. 11Соос левъёс кадь тушмон вылэ урдскизы но дас одӥг сюрс пыдын ожмаськисьёсты, сюрс куать сюзэ вал вылын ожмаськисьёсты погыртӥзы, нош кылемзэ бызьыса кошкытӥзы. 12Тросэз соос яраё каремын вал, кылиськыса пегӟоно луизы, ачиз Лисий но возьытэ вуоно амалэн пегӟыса кошконо луиз. 13Номыр валасьтэм адями ӧй вал со, шуккет басьтон пумысен ас понназ малпаськиз но валаз: еврейёс вормыны луонтэм калык, малы ке шуоно Ваньмызлэсь Кужмо Инмар соослы вормыны юрттӥське; соин ик соос доры адямиоссэ ыстӥз но 14законъя вань куронъёсты быдэсъяны со соглаш луэ шуыса оскытӥз, эксэй соослы эш мед луоз шуыса, сое со оскытыны выриз. 15Калыклы пайда ваён сярысь сюлмаськыса, Лисий мар куриз, Маккавей ваньзэ сое быдэстыны соглаш луиз; Маккавей Лисийлы иудейёс пумысен кыӵе гинэ ӵектон ӧз гожты, эксэй ваньзэ умой луэ шуыса лыдъяз уго. 16Нош Лисийлэн иудейёслы гожтэм гожтэтэзлэн пуштросэз таӵе вал: «Лисий иудей калыклы – шумпотэлэ. 17Тӥляд ыстэм адямиосты, Иоаннэн Авессалом, гожтӥськыса сётэм ответтэс сётӥзы но, мар отын верамын вал, соин соглаш луыны куризы. 18Озьыен, эксэйлы мар сярысь ивор вуттоно вал, мон валэктӥ; мае кабыл басьтыны луэ вал, соин со соглаш луиз. 19Соин ик, кивалтӥсьёслы ӟеч мылкыддэс возьматыса улӥды ке, азьланяз но мон тӥледлы ӟеч мед луоз шуыса юрттӥсько. 20Нош куд-ог люкетъёс пумысен тӥлядъёслы но, асламъёслы но – тӥледын мед вераськозы шуыса, мон косон сётӥ. 21Ӟечо-буро луэ! Сю ньыльдон тямысэтӥ арлэн Диоскоринфий толэзьлэн кызь ньылетӥ нуналаз». 22Нош эксэйлэн гожтэтэзлэн пуштросэз таӵе вал: «Антиох эксэй Лисий братэзлы – шумпотоно. 23Атае инмаръёс доры кошкем дырысен милям таӵе мылкыдмы: эксэйлыклы тэрытскыса улӥсьёс, асьсэлэсь ужъёссэс быдэсъяку, бугыръяськытэк мед улысалзы. 24Атаелэсь выль эллин сямъёсты улонэ пыртонэныз иудейёс соглаш уг луо шуыса, ми кылӥмы, уго соос асьсэлэсь пуктон-косонъёссэс вылэ пукто, соин ик асьсэлэсь законъёссэс утьыса улыны мед лэзьысалзы шуыса куро. 25Озьыен, кулэ карыса, таиз но калык бугыръяськытэк мед улоз шуыса, таӵе пуктон-косон сётӥськом: соослэн храмзы соослэн киулазы берен сётэмын мед луоз, вашкала атайёссылэн сямъёссыя соос улыны мед быгатозы. 26Тон умой лэсьтод, соос доры адямиостэ вераськыны ыстӥд но соосын тупаса улон сярысь огкыл гожтыны быгатӥд ке, милесьтым малпанмес-мылкыдмес тодыса, ӟеч мылкыдоесь мед луысалзы но асьсэлэсь ужъёссэс шулдырен мед азинтысалзы». 27Калыклы нош эксэй таӵе гожтэт гожтӥз: «Антиох эксэй иудей тӧроослы, мукетъёслы но вань иудейёслы – шумпотэлэ. 28Ӟечесь-тазаесь ке тӥ, сое ик ми тӥледлы сӥзиськомы; ми но ӟеч-таза улӥськомы. 29Менелай милемлы ялӥз, ми дорын улӥсь асьтэлэн адямиосты доры ветлыны тӥляд мылкыдды вань, пе. 30Озьыен, кинъёс Ксанфик толэзьлэн куамынэтӥ нуналозяз доразы бертозы, соослы, оскытыса, кышкатэк улыны быгатозы шуыса, бур кимес сётомы. 31Иудейёс азьвыл кадь ик кыӵе кулэ, сыӵе ик сиён сиыны, асьсэлэсь законъёссэс утьыны быгато, соос пӧлысь одӥгез но, нокыӵе амалэн но азьвыл тодытэк лэсьтэм янгышъёсыз понна вӧсь каремын уз луы. 32Тӥледыз мед буйгатоз шуыса, тӥ доры мон Менелаез ыстӥ. 33Чырткем луэ! Сю ньыльдон тямысэтӥ ар, Ксанфик толэзьлэн дас витетӥ нуналыз». 34Соослы Римын улӥсьёс но таӵе пуштросъем гожтэт ыстӥзы: «Римысь тӧроос Квинт Меммий но Тит Манлий иудей калыклы – шумпотэлэ. 35Эксэйлэн ӵыжы-выжыез Лисий маин тӥледын соглаш луиз, соин ми но соглаш луиськомы. 36Мае со эксэйлы вераны кулэен лыдъяз, со сярысь куспады вераське но чик ӝегатскытэк кинэ ке но ми доры ыстэ, мар тӥледлы кулэ, сое ӵектыны мед быгатомы, уго ми Антиохияе кошкиськомы. 37Соин ик дыртэ, кинэ ке но ыстэ, – ми но тодыны мед быгатомы, кыӵе тӥляд малпанды. 38Чырткемесь луэ! Сю ньыльдон тямысэтӥ ар, Ксанфик толэзьлэн дас витетӥ нуналыз».
Currently Selected:
Маккавейёслэн 2-тӥ книгазы 11: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016