Маккавейёслэн 1-тӥ книгазы 12
12
12-тӥ ЛЮКЕТ
1Ионафан адӟиз, со понна ӟеч дыр вуиз шуыса, соку со Рим калыкен эшъяськонэз юнматон, азинтон понна пиосмуртъёсты бырйиз но соосты Риме ыстӥз. 2Спартаын, мукет интыосын улӥсьёс доры но, та сярысь ик вераса, гожтэтъёс ыстӥз. 3Соос Риме вуизы но кун кенеше пырыса шуизы: «Ионафан архиерей, иудей калык эшъяськонмес азинтон сярысь тӥледын вераськыны милемыз ыстӥз, азьло кадь ик кусыпъёсмес утьыны мед быгатомы шуыса». 4Вань ортчоно интыосысьтызы кивалтӥсьёслы мед сётозы, нош соос таосты каньылэн Иудей музъеме мед келялозы шуыса, отысен соослы гожтэтъёс сётӥзы. 5Тани Ионафанлэн Спартаын улӥсьёслы ыстэм гожтэтэзлэн списокез: 6«Ионафан архиерей, калыклэн тӧроосыз, священникъёс, вань иудей калык Спартаысь агай-вынъёсмылы – шумпотэлэ. 7Эшшо азьвыл аръёсы тӥ дорын эксэйын пукем Дарий [Арей] дорысь Оний архиерей доры гожтэтъёс ыстэмын вал, тӥ, пе, милемлы агай-вынъёс луиськоды, – кызьы вера список. 8Ыстэм муртэ Ония сӥлы карыса пумитаз, гожтэтъёс басьтӥз, отын валамон верамын вал кусыпез утён, эшъяськон сярысь. 9Соос милемлы сокем кулэ но ӧвӧл, малы ке шуоно киысьтымы священной книгаос – милям буйгатсконмы, 10но эшъяськыса, тупаса улонэз азинтон вылысь, тӥлесьтыд медам люкиське шуыса, адямиосмес ыстоно кариськимы, уго трос дыр ортчиз ини ми доры гожтэтъёстэс ыстылэмды дырысен. 11Ми дугдылытэк, котькыӵе дыръёсы но – праздник нуналъёсы но, мукет тупатэм нуналъёсы но – курбонъёс сётылыкумы, вӧсяськыкумы но, кызьы ӟеч агай-вынъёсты буре вайыны кулэ, озьы тӥледыз буре вайиськомы. 12Тӥляд данлыкты понна ми шумпотӥськомы; 13ми котырын трос шугадӟонъёс бергало, ожмаськонъёс ӵем луо, уго котырысьтымы эксэйёс милемлы пумит ож нуо. 14Нош милям тӥледыз, мукет эшъёсмес, кусып возёно муртъёсмес со ожъёсын сюлэмшугъяськытэммы уг поты вал, 15уго ми асьмелы юрттӥсь юрттэт Инмысь басьтӥськомы; тушмонъёсмылэсь ми мозмытскимы, тушмонъёсмы лапкатэмын. 16Али ми Антиохлэсь Нуминий пизэ, Иасонлэсь Антипатр пизэ бырйимы но Рим калык доры азьвыл кусыпъёсмес, эшъяськонмес соосын азинтон пумысен вераськон нуыны ыстӥмы. 17Соосты тӥ доры но мыныны косӥмы, тӥледыз ӟечкыланы, тӥледын эшъяськыса, тупаса улон кусыпъёсмес азинтыны мылкыдмы сярысь вераса гожтэт ыстӥмы. 18Гожтэтмылы ответ сётӥды ке, ӟеч уж лэсьтоды.
19Тани Дарийлэн [Арейлэн] ыстэм гожтэтэзлэн списокез: 20”Спарталэн Дарий эксэез Оний архиерейлы шумпотоно шуэ. 21Гожтэмъёс пӧлысь шедьтэмын: Спарта калык но иудейёс – агай-вынъёс луо, соос Авраам выжы бордысь пото. 22Табере, та сярысь тодэммы бере, тӥ ӟеч лэсьтоды, асьтэлэн улэм-вылэмды сярысь гожтӥды ке. 23Нош ми тӥледлы вераськомы: тӥляд пудоды но, ваньбурды но – со милям, нош милям мармы вань, со – тӥляд. Та сярысь тӥледлы ивортыны косӥмы”».
24Ионафан кылӥз, Димитрийлэн ожен кивалтӥсьёсыз азьвыллэсь но тросгес ожгарчиосын солы пумит ожмаськыны берытскизы шуыса. 25Соку Ионафан Иерусалимысь потӥз но Амаф ёросын соосты пумитаз, аслаз куназ пырыны дыр ӧз сёты. 26Соослэн лагерязы эскерись-чаклась муртъёсты ыстӥз, соос отысь берытскемзы бере солы ялӥзы: «Та уе соос асьме вылэ ожен лыктыны малпало». 27Соин ик шунды пуксем бере Ионафан аслаз ожгарчиосызлы сэзь улыны косӥз, ожмаськон тӥрлыксэс киязы возьыса, быдэс уй ӵоже ожмаськыны дась луоно, лагерезлэн котыраз возьмаськисьёсты пуктӥз. 28Тушмонъёс кылӥзы, Ионафан ас адямиосыныз ожлы дасяське шуыса, соос кышкатскизы, сюлэмъёссы куалекъяны кутскизы, лагерязы тылъёс ӝуатыса, отысь кошкизы. 29Нош Ионафан но соин ӵош ветлӥсьёс ӵукнаозь та сярысь ӧз тодэ, уго отысь ӝуась тылъёсты адӟизы. 30Ионафан соос сьӧры уйиськыса мынӥз но ӧз ни суты соосты, – соос Елевфер шур сьӧры потэмын вал ини. 31Соку Ионафан заведей шуон арабъёс вылэ урдскиз, вормиз соосты, соослэсь трос ваньбурзэс киултӥз. 32Собере, берытскем бераз, Дамаске вуиз но быдэс кун-музъемзы пыр потӥз. 33Симон но потӥз, со Аскалонозь, матысьтыз изкаръёс дорозь мынӥз, Иоппия пала берытскиз но сое киултӥз, 34уго со кылӥз вал, Иоппияын улӥсьёс изкарзэс Димитрийлэн ожгарчиосыз киулэ сётыны туртто шуыса, – отчы, сое возьманы возьмаськисьёсты пуктӥз. 35Ионафан берытскиз но калыклэсь тӧрооссэ дораз ӧтчатӥз, Иудеяе изкаръёс ӝутылон пумысен соосын кенешиз, 36Иерусалимлэсь борддоръёссэ вылэгес ӝутон но изкарен город вискы ӝужыт борддор ӝутон пумысен, изкарез городлэсь люкыны мед луысал – со нимаз мед луысал, со пушкын басьяськон но, вузкарон но медаз ни луэ шуыса, соосын со кенешиз. 37Город пуктыны люкаськизы: шундыӝужанпал ву ӧр вӧзысь борддор дорозь вуизы, Хафенафа шуон люкетэз лэсьтӥзы-пуктӥзы. 38Нош Симон Сефиле Адидаез пуктӥз, капкаоссэ юнматӥз, ворсэтъёссэ но. 39Со вакытэ ик Трифон Азиялы эксэй луон вылысь кужымзэ понӥз, йыр вылаз эксэй изьы изьыяны но Антиох эксэй вылэ кизэ ӝутыны малпаз, 40нош ачиз кышказ, Ионафан солы кызьы ке но медаз люкеты вал, солы пумит ожмаськыны медаз кутскы вал шуыса; соин со Ионафанэз кутыса виыны учыр утчаса улӥз, со муген ӝутскиз но Вефсанэ кошкиз. 41Ионафан солэн пумитаз быръем ньыльдон сюрс ожгарчиосыныз потӥз, соос ожмаськыны дасесь вал; Вефсанэ вуиз. 42Трифон адӟиз, Ионафан туж трос ожгарчиосын лыктэ шуыса, соку со кышказ со вылэ кизэ ӝутыны. 43Сое со сӥё-дано пумитаз, вань эшъёсызлы-матысьёсызлы сое возьматӥз, кузьымъёс сётъяз, аслаз ожгарчиосызлы косон сётӥз: солы аслыз кадь ик соос Ионафанлы мед тэрытскозы. 44Собере Ионафанлы шуиз: «Мар понна тон вань та калыкез курадӟытӥськод, асьме куспын ожмаськон луоно ӧвӧл ук? 45Озьыен, тон соосты али гуртъёсазы бертыны лэзь, нош аслыд кӧнязэ ке воргоронъёстэ бырйы, соос тонэн ӵош мед ветлозы, собере асьмеос Птолемаидае мыномы, сое мон тон кие сёто, мукетъёссэ изкаръёсты но, кылемзэ ожгарчиосме но, выт бичанъя вань кивалтӥсьёсты но тон кие сёто, собере мон ас дорам берытско; со понна ик мон татын улӥсько уго». 46Ионафан солэн кылъёсызлы оскиз, солэн верамезъя лэсьтӥз, ожгарчиоссэ лэзиз но, соос Иудей музъеме кошкизы; 47ас бордаз куинь сюрс ожгарчиосты кельтӥз, соос пӧлысь кык сюрссэ Галилеяе кельтӥз, нош сюрсэз со сьӧры мынӥзы. 48Нош Ионафан Птолемаидае пырыса гинэ вуиз, отын улӥсьёс кар капкаез ворсазы, сое кутӥзы, соин ӵош вань пыремъёсты но мечен виылӥзы. 49Соку Трифон ожгарчиоссэ, вал вылын ожмаськисьёссэ Галилеяе, ваньзэс Ионафанэн ӵош ветлӥсьёсты быдтон понна туж бадӟым ӵошалэ келяз. 50Нош соос кылӥзы, Ионафанэз, соин ӵош ветлӥсьёсты но кутӥллям, вииллям шуыса, соку соос ог-огзэс юнматӥзы но йыг-йыг строе султыса, ожмаськыны дась луыса потӥзы. 51Уйиськыса мынӥсьёс адӟизы, таос улон понна лулзэс сётыны дасесь шуыса, соку соос берыктӥськыса кошкизы. 52Нош соос ваньзы ӟечкын Иудей музъеме вуизы, Ионафанэз, соин ӵош быремъёсты но жаляса бӧрдӥзы, туж кышкаса улӥзы, быдэс Израиль курыт синвуэн бӧрдыса улӥз. 53Соку котыр ёросъёсысь вань калыкъёс соосты быдтыны утчазы, тазьы соос шуизы: «Табере соослэн кивалтӥсь йырзы, дурбасьтӥсьсы ӧвӧл ини, табере соослы пумит ожмаськоме, калыкъёс пушкысь соосты тодэ ваёнэз быдтоме».
Currently Selected:
Маккавейёслэн 1-тӥ книгазы 12: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016