Маккавейёслэн 1-тӥ книгазы 1
1
1-тӥ ЛЮКЕТ
1Киттим музъемысь потэм македон пи, Филипплэн Александр пиез, Елладалы эксэй луиз, Персиялэсь но Мидиялэсь Дарий эксэйзэ погыртэм но со интые эксэе пуксем бере 2со трос ожъёс ортчытӥз, трос юнматэм каръёсты киултылӥз, соослэн музъемысьтызы эксэйёсты виылӥз. 3Музъемлэн пумозяз вуиз, трос калыкъёслэсь ваньбурзэс киултӥз; со азьын музъем чусомиз, со вылэ но вылэ ӝутскиз, солэн сюлмыз данъяськыны кутскиз. 4Со туж кужмо войско люказ но улосвылъёсын, калыкъёсын, кивалтӥсьёсын кузёяськыны кутскиз, соос солы выт тырисьёс луизы. 5Та бере валес вылаз выдӥз, со шӧдӥз уго: кулэ ни. 6Пинал дырысенызы соин ӵош будэм-дышетэм нимо-дано медооссэ ӧтьытӥз но ачиз улэп дыръя эксэйлыксэ соослы люкылӥз.
7Александр дас кык ар эксэй вал, собере кулӥз. 8Солэн медоосыз котькудӥз аслаз интыяз кузёяськыса улӥз. 9Со кулэм бере соос ваньзы йыразы эксэй изьы изьыязы, нош соос бере соослэн пиоссы но трос аръёс ӵоже озьы лэсьтӥзы; музъем вылэ уродлыкез йылэтӥзы. 10Соос пӧлысь сьӧлыклэн выжыез потӥз – Антиох Епифан, Антиох эксэйлэн пиез, кудӥз Римын пленын улӥз, нош Эллин кунлы сю куамын сизьым ар тырмыку эксэй луиз.
11Со нуналъёсы Израильысь законлы пумит улӥсь пиос потӥзы, тазьы вераса трос муртэ оскытыны выризы: «Ойдолэ мыноме но асьме котырын улӥсь калыкъёсын кусып кылдытоме, уго соос бордысь палэнскеммы бере асьме доры трос шугадӟонъёс вуизы». 12Соослы та верам кыл кельшиз. 13Калык пушкысь куд-огезлэн мылкыдыз ӝутскиз, соос эксэй доры мынӥзы, эксэй соослы язычникъёслэсь сямъёссэс быдэсъяны эрик сётӥз. 14Иерусалиме соос язычникъёслэн сямъёссылы тупась училище#1:14 училище – татын: егит пиослы мугорзэс веськрес каронъя дышетсконни (2 Макк. 4:9,12) усьтӥзы, 15вандӥськон ортчытэм интызэс ватыса улыны малпазы, дун-чылкыт сӥзён-косонлэсь палэнскизы, язычникъёсын огазе кариськизы, урод ужъёс лэсьтонлы вузаськизы.
16Эксэй кунэзлэсь юнмамзэ адӟем бераз Антиох малпаз Египетэз киулаз басьтыны, кык эксэй кунъёсын кузёяськыны мылкыд кариз. 17Трос ожгарчиосыныз, ожмаськон уробоосын, слонъёсын, буш вал вылын мынӥсьёсын, трос корабльёсыныз со Египетэ пыриз; 18Египетлэн Птоломей эксэеныз ожмаськыны кутскиз; Птоломей со азьын куалектӥз но пегӟыса кошкыны кутскиз, трос кулэмъёс вал. 19Египет музъемысь трос юнматэм городъёсты киултӥзы, Египет музъемысь таласа ваньбур люказы.
20Египет усем бере, сю ньыльдон куинетӥ арын, Антиох дораз берытскиз но Израиль вылэ урдскиз, кужмо армиеныз со Иерусалиме пыриз; 21йырзэ урдыса, вӧсяськон интые пыриз но отысь зарни курбон сётон ӝӧкез, югдытон арбериез киултӥз, отысь вань сосудъёсты но, 22курбон нянь тырон ӝӧкез но, курбон-салам кисьтыку кутӥськись кружкаосты, чашаосты, зарнилэсь лэсьтэм кадилоосты, катанчиез, венец изьыосты, храмлэн азьпаласьтыз зарнилэсь лэсьтэм чеберъянэз киултӥз, ваньзэ лушказ-кысказ. 23Азвесез но, зарниез но, дуно сосудъёсты но басьтӥз, ватэм дуно ваньбурез но, мае шедьтӥз, ваньзэ басьтӥз. 24Ваньзэ бичам бераз ас музъемаз кошкиз, адямиосты виылӥз, туж вылтӥяськыса вераськиз. 25Со понна ик Израильын, солэн вань интыосаз туж юн бӧрдӥзы. 26Викышъязы кивалтӥсьёс, тӧроос, каньсыразы егит нылъёс но егит пиос, кышномурт чеберлык воштӥськиз. 27Вань эмеспиос бӧрдӥзы, коркалэн нылкышно палаз ӝожомыса пукиз вылькен. 28Отын улӥсьёсты жаляса, музъем куалекъяз, Иаковлэн вань выжыез сантэман улэ сюриз.
29Кык ар ортчыса, выт бичанъя кивалтӥсез эксэй Иудалэн городъёсаз ыстӥз, туж трос калыкен ӵош со Иерусалиме вуиз. 30Тупаса улон сярысь кескич кылъёс вераз но, соос солы оскизы; нош малпамтэ шорысь город вылэ урдскиз но туж юн сое куашкатӥз, трос израиль калыкез быдтӥз. 31Городысь ваньбур люказ но сутӥз сое, коркаосты куашкатъяз, борддоръёсты но котыр ласянь ёмыръяз. 32Кышномуртъёсты, нылпиосты пленэ нуизы, пудо-животсэс киултӥзы. 33Давидлэсь городзэ бадӟым, юн борддорен котыртӥзы, юнэсь каланчаос лэсьтӥзы, юнматэм изкар соослы со луиз. 34Сьӧлыклэсь кышкасьтэм, законлы пумит улӥсь адямиосты отчы интыязы, отчы соос кужым люказы; 35ожмаськон тӥрлык, сиён-юон дасязы, Иерусалимлэсь ваньбурзэ люкаса отчы тыризы но бадӟым капканлы пӧрмизы. 36Вӧсяськон инты понна изкарзы лушкем пукон-чакласькон интылы пӧрмиз, Израиль понна лек диаволлы пӧрмиз. 37Вӧсяськон инты котыре соос янгыштэм вирез киськазы, вӧсяськон интыез саптазы. 38Соослы луыса Иерусалимын улӥсьёс пегӟыса кошкылоно луизы, Иерусалим мурт калыклы улон интылы пӧрмиз, ас выжыезлы со мурт луиз, нылпиосыз сое куштыса кошкизы. 39Вӧсяськон интыез, кыр дунне кадь, тырттэм кылиз, праздник нуналъёсыз бӧрдонлы пӧрмизы, субботаосыз – серекъян-веранлы, сӥ-данэз сантэмаськонлы пӧрмиз. 40Данлыкез будэмъя сӥтэм-дантэм луонэз йылӥз, вылӥе ӝутсконэз ӝожен улонлы берытскиз.
41Антиох эксэй быдэс кун-эксэйлыказ вань калыкъёсты одӥг калык карон сярысь пуктон-косон поттӥз, 42ваньзэсты ас законзылэсь куштӥськыны косӥз. Вань калыкъёс эксэйлэн кылыныз соглаш луизы. 43Израильын но тросэз улӥсьёс соослэсь сульдэръёслы-идолъёслы йыбыртъянзэс кабыл басьтӥзы, сульдэръёслы-идолъёслы курбон сётылӥзы, субботаез саптазы. 44Ивор нуллӥсьёс пыр Иерусалиме, Иудеяысь городъёсы эксэй гожтэт ыстӥз, та музъемын улӥсьёс мурт сямъёсты быдэсъяса мед улозы шуыса со гожтэмын вал. 45Вӧсяськон интыын тылын сутӥськисьёссэ но, мукетъёссэ но курбонъёсты медаз ни сётъялэ, вӧсяськон интые кисьтыны курбон-саламъёсты медаз ни вае, субботаосты сантэм мед карозы, праздникъёссэс но, 46вӧсяськон интыез, отысь вӧсяськон сосудъёсты#1:46 Синодальной Библияын «святойёсты» мед сапталозы, 47сульдэръёслы-идолъёслы сӥзем курбон сётон интыос, храмъёс, куалаос мед пуктылозы, парсь сӥлез, курбонлы ярасьтэм, кырсь шуыса лыдъяськись пудоез курбон мед сётозы, 48пиоссылы вандӥськон сямез медаз ортчытылэ, лулзэс-мылкыдзэс мед сапталозы вань кырсь, юрӟым макеосын, 49иудейёслэсь законзэс мед вунэтозы, отысь вань пуктон-косонъёсты мед воштозы. 50Нош кин эксэйлэсь верам кылзэ ӧз ке быдэсты, виыны косэмын. 51Та пуктон-косон пумысен со быдэс кун-эксэйлыказ гожтэтъёс ысъяз, вань калыкез чакласа возисьёсты пуктылӥз, Иудеяысь городъёслы косон сётӥз: ваньмаз курбон сётъяно. 52Соос доры калык пӧлысь трос мурт люкаськиз, ваньмыз законэз кулэтэм карисьёс, – музъем вылын урод-лек ужъёс лэсьтӥзы; 53Израилез вань пеган интыосын ватӥськыса улӥсь каризы.
54Хаслев толэзьлэн дас витетӥ нуналаз, сю ньыльдон витетӥ арын, курбон сётон интыез юрӟым куашканлы пӧрмытӥзы, Иерусалимлэн котыраз интыяськем Иудеяысь городъёсын но сульдэръёслы-идолъёслы сӥзем курбон сётон интыос лэсьтылӥзы, 55корка пырон ӧсъёс азьын, ульчаосын ӵындытъянъёс ортчытъязы; 56Инмар законэн книгаосты шедьто ке вал, кесяса тылын сутылӥзы; 57кин дорысь сӥзён-косонэн книгаез шедьто ке, кин законэз утьыса улэ, со муртэ эксэйлэн косэмезъя виылӥзы. 58Толэзьлы быдэ городэ вуылӥсь израиль калыкез тазьы ултӥяллязы. 59Толэзьлэн кызь витетӥ нуналаз алтарьлэн вылӥяз интыяськем курбон сётон ӝӧк вылын курбон сётылӥзы. 60Та косонъя пиоссылы вандӥськон сямез ортчытъям нылкышноосты виылӥзы, 61нош нуныосты анайёссылэн чырты вылазы ошылӥзы, коркаоссэс тарказы, вандӥськон сямез ортчытӥсь муртэ виылӥзы. 62Нош Израильын трос адямиос кырсь макеосты сионтэм вылысь юн кариськизы, юн возиськизы; 63сиёнэн саптаськон сярысь кулыны умойгес луоз шуыса, соос лыдъязы, святой сӥзён-косонэз сантэмантэм понна кулонэз бырйылӥзы. 64Израиль вылын туж бадӟым вожпотон улӥз.
Currently Selected:
Маккавейёслэн 1-тӥ книгазы 1: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016