Софония 3
3
3-тӥ ЛЮКЕТ
1Куректон-кайгу кырсь, саптаськем городлы, ӝикатыса-ёртыса возисьлы. 2Верам кылэз уг кылзы, дышетон-нодъянэз кабыл уг басьты, Кузё-Инмарлы уг оскиськы, ас Инмарезлэн матаз уг мыны. 3Солэн котырысьтыз кивалтӥсьёсыз – бурсыса ветлӥсь сьӧсь пӧйшуръёс, судьяосыз – ӝытазе ветлӥсь кионъёс, ӵукнаозь одӥг лыэз но кельтӥсьтэмъёс. 4Солэн пророкъёсыз капчи визьемесь, кескичесь; священникъёсыз дун-чылкыт интыез саптало, законэз сӧрыса уло. 5Кузё-Инмар со пӧлын шонерлыко, Со шонертэм ужез уг лэсьты, ӵукналы быдэ, котьку но Со Аслэсьтыз шонерлыко судить каремзэ возьматэ; нош законлы пумит улӥсь мар со возьдаськон – уг тоды. 6Мон калыкъёсты быдтӥ, соослэн юнматскон каръёссы куашкатэмын; ульчаоссэс тырттэм кельтӥ, табере соос кузя нокин но уг ни ветлы; городъёссы куашкатэмын: улӥсьёсыз ӧвӧл, одӥг адями но ӧвӧл. 7Мон шуи: «Мынэсьтым гинэ кышка, дышетонме-нодъянме кабыл басьты!», соку солэн улон интыез куашкатэмын ӧй луысал, солы дасям вӧсь каронэ со доры ӧй вуысал; нош соос сюлмысьтызы тыршизы асьсэлэсь вань ужъёссэс сӧрыны.
8Озьыен, вите Монэ, – шуэ Кузё-Инмар, – тарканы султон нуналозям вите, уго Мон малпай калыкъёсты ӧтьыны, эксэйлыкъёсты люканы, соос вылэ Аслэсьтым вожпотонме, йыркурелэсь тылзэ кисьтыны, соку Мынам вожпотонэлэн тылыз быдэс музъемез ньылоз. 9Соку Мон калыкъёслы нош ик чылкыт кылын-ымын вераськыны луонлык сёто, Кузё-Инмарлы ваньзы вазиськыны мед быгатозы, огкылысь Солы мед ужалозы-тыршозы шуыса. 10Эфиопиялэн шур сопалысьтыз Мыным вӧсяськыса улӥсьёс, пазьгиськыса улӥсь нылпиосы, Мыным кузьым-салам вайыса лыктозы. 11Со нуналэ тон урод ужъёсыныд астэ возьытэ уд ни вутты, кызьы тон азьло Мон азьын сьӧлыкаса улӥд, уго соку Мон тон пӧлысь асьсэлэн сӥё-дано луонэнызы ушъяськисьёсты палэнто, азьланяз Мынам святой гурезям астэ вылӥ карыса уд ни улы. 12Тон пӧлы огшоры, зӥбыт-востэм калыкез кельто, соос Кузё-Инмар вылэ оскиськыса улозы. 13Израильлэн кылем люкетъёсыз шонертэм ужъёс уз ни лэсьтэ, ӧрекчаськыса уз ни вераське, кыл йылазы кескичлыкез уз ни кыльы, соос ас понназы возь вылтӥзы ветлозы, шутэтскозы, нокин но соосты уз улля. 14Сӥон ныл, шумпот! Шулдыръяськы, Израиль! Иерусалим ныл, вань сюлмысьтыд шулдыръяськы, шумпот! 15Кузё-Инмар воштӥз Аслэсьтыз тыныд дасям вӧсь каронзэ, улляз тушмондэ! Кузё-Инмар, Израильлэн эксэез, тон пӧлын: азьланяз уродлыкез уд ни адӟы. 16Со нуналэ Иерусалимлы шуозы: «Эн кышка», Сӥонлы: «Киосыд медаз лябӟелэ!». 17Инмаред Кузё-Инмар тон пӧлын: Со кужмо, тонэ утёз; тон понна Со шумпотыса шулдыръяськоз; Аслаз яратонэз ванен Со тонэ гажалоз-жалялоз, тон понна шумпотыса, шулдыръяськыса улоз. 18Данлыко шумпотон-шулдыръяськонъёсы лыктэмзы потыса ӝоже усемъёсты огазе люкало; соос но тынад калыкед, сӥтэм-сантэм улон соосты нюртыса возе. 19Тани, тынэсьтыд вань ӝикатыса возисьёстэ со виын Мон ӝикато но чутӥсьёсты утё, пазьгиськемъёсты огазе люкало, сантэмаськыса улэм музъем вылазы соослы сӥ-сан, данлык сёто. 20Со дыре тӥледыз ваё, соку ик тӥледыз огазе люкало; дунне вылысь вань калыкъёс пӧлын тӥледыз сӥё-даноесь, ушъяны ярамонэсь каро, соку пленэ шедемъёстэс тӥляд син азяды берыкто, – шуэ Кузё-Инмар.
Currently Selected:
Софония 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
