Лыдпусъёс 5
5
5-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Израиль пиосты – гижлочерен вань висисьёсты, мугоразы виянэз ванё муртъёсты, кулэм мурт борды йӧтӥськыса саптаськемъёсты стан сьӧры поттыны кос, 3пиосмуртъёсты но, кышномуртъёсты но поттэ, стан сьӧры поттэ, станъёссэс, кытын Мон улӥсько, медаз сапталэ». 4Тазьы каризы израиль пиос: соосты стан сьӧры поттӥзы; Кузё-Инмарлэн Моисейлы верам кылызъя лэсьтӥзы израиль пиос.
5Кузё-Инмар Моисейлы тазьы вераз, тазьы шуиз: 6«Израиль пиослы шу: пиосмурт яке кышномурт адямилы пумит кыӵе ке сьӧлык лэсьтӥз ке, озьы Кузё-Инмарлы пумит йыруж лэсьтӥз ке, со лул янгыше усемын луоз. 7Соку со лэсьтэм сьӧлыксэс ватытэк вераса мед ӧпкелёзы, тыронзэс, маин янгыше усемын, мед берыктозы, со борды эшшо витетӥ люкетсэ мед ватсалозы, сое мед берыктозы солы, кинлы пумит соос сьӧлыказы; 8кинлы пумит сьӧлык лэсьтэмын, со мурт кулэмын ни ке, солэн матысь ӵыжы-выжыез но ӧвӧл ке, соку со тыронзэ Кузё-Инмарлы мед сӥзёз; та священниклы мед луоз, сьӧлыклэсь сузяськон-чылкытатӥськон понна курбонлы ваёно така вӧзы мед ватсаськоз. Такаез курбон сётыса, священник со муртэ лэсьтэм сьӧлыкезлэсь чылкытатоз-сузялоз. 9Израиль пиослэн священник доры ваем вань святой саламъёссы-кузьымъёссы пӧлысь вылэ ӝутон курбонъёссы священниклы сётэмын луыны кулэ, 10сӥзьыса сётэм курбонъёсты но священниклы сётыны кулэ; мар ваё священниклы, ваньмыз со солэн луэ».
11Кузё-Инмар Моисейлы тазьы вераз, тазьы шуиз: 12«Израиль пиослы тазьы ялыса шу: кинлэн ке кышноез мукет пиосмуртэн сьӧлыказ ке, оскиськымон луэмысь дугдӥз ке, 13кин та кышномуртэн кӧлӥз но кидыссэ кисьтӥз ке, нош картэз адӟытэк-тодытэк кылиз ке, со кышномурт лушкемен саптаськоз, со ужез адӟись ӧз ке луы, солэн ужез шарае ӧз ке поты. 14Пиосмурт доры вожан дух вуиз ке, кышноеныз вожаса улыны кутскиз ке, кышноез саптаськем дыръяз, яке, со доры вожан дух вуиз ке, со кышноеныз вожаса улыны кутскиз ке, нош кышноез саптаськымтэ ке, 15соку картэз кышнозэ священник доры мед ваёз, кышноез понна курбонлы ефалэн дасэтӥ люкетаз йыды пызь поныса мед ваёз, но со вылэ вӧй медаз киська, ливан-ладан медаз поны, малы ке шуоно та вожан понна ваем салам, тодэ ваён салам – законлы пумит улэмез тодэ вайытӥсь салам со; 16нош священник та кышномуртэз Кузё-Инмарлэн азяз мед султытоз, 17священник горд сюй сосудэ святой ву мед лэзёз, скиния пушкысь сюй мед басьтоз но вуэ мед поноз; 18священник кышномуртэз Кузё-Инмарлэн азяз султытоз но кышномуртлэсь йырзэ гольык кароз, тодэ ваён саламез солэн кияз сётоз, – та вожан понна ваем салам, нош священниклэн кияз карган вайись курыт ву. 19Священник та кышномуртэз кыл сётытоз но солы шуоз: ”Нокин но тонэн ӧз ке изьы, тон карттэ ӧд ке вошты, мукет пиосмуртэн ӧд ке саптаськы, соку та карган вайись курыт вуэз юид ке, со тыныд изъян уз вайы; 20нош тон карттэ пӧяса саптаськид ке, картэд сяна, тонэн мукет пиосмурт кӧлӥз ке”, – 21соку священник та кышномуртэз, карганэн кышкатыса, кыл мед сётытоз, священник та кышномуртлы мед шуоз: ”Кузё-Инмар тонэ калыкед пӧлын карган киулэ мед сётоз, калыкед тонэ мед каргалоз, Кузё-Инмар тынэсьтыд нуны ваён пуштэ мед куашкатоз, кӧттэ мед тӧрнатоз. 22Та карган вайись ву тынад пушкад мед пыроз но, кӧтыд мед тӧрналоз, нуны ваён пушкыд мед куашкалоз”. Соку кышномурт шуоз: ”Аминь, аминь”. 23Священник карган кылъёсты свиток вылэ гожтоз но курыт вуэн соосты гылтоз; 24карган вайись курыт вуэз кышномуртлы юыны сётоз но кышномурт пушкы карган вайись, изъян вайись ву пыроз. 25Священник кышномуртлэн киысьтыз вожан понна ваем салам нянез басьтоз но Кузё-Инмар азе вылэ ӝутоз, собере курбон сётон ӝӧк доры нуоз; 26священник кырыменыз салам нянь пӧлысь оглюкетсэ буре ваён понна басьтоз но курбон сётон ӝӧк вылын тылын сое сутоз, собере кышномуртлы юыны ву сётоз. 27Та кышномуртэз вуэн сектам бере, со кырсь ке, картэзлы пумит йыруж лэсьтэм ке, карган вайись курыт ву изъян вайыны со пушкы пыроз но, солэн пушкыз пыктоз, нуны ваён пушкыз куашкалоз, ас калыкез пушкын та кышномурт каргамын луоз. 28Кышномурт саптаськемын ӧй ке вал, чылкыт вылэм ке, соку солы изъян уз луы, нуны вайыны быгатонлыкез уз быры». 29Тани вожан пумысен закон: кышномурт картэз вань вылысь юмшаз ке, саптаськиз ке, 30яке картэз доры вожанлэн духез вуиз ке, со кышноеныз вожаса улыны кутскиз ке, соку та пиосмурт кышнозэ Кузё-Инмар азе мед султытоз но священник солы та пумысен кылдэм законъя ваньзэ мед лэсьтоз, 31соку картэз сьӧлыкен саптаськытэк чылкыт куен кылёз, нош кышноез аслэсьтыз сьӧлыксэ ас вылаз нуоз.
Currently Selected:
Лыдпусъёс 5: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
