Лыдпусъёс 14

14-тӥ ЛЮКЕТ

1Вань калык вузыны-викышъяны кутскиз, [быдэс] та уез калык бӧрдыса потӥз; 2вань израиль пиос, вань калык Моисеен Аарон вылэ ӝожтӥськыса улӥзы, соослы шуизы: «Э, ми Египет музъеме кулысалмы ке, яке та луоё кыр дуннее кулысалмы ке! 3Малы меда Кузё-Инмар милемыз та музъеме нуэ – меч улэ мед куломы шуыса-а? Кышноосмы, нылпиосмы тушмонлы люкетлы сюрозы; умойгес уз луы-а берен Египетэ берытскыны?» 4Огзылы огзы шуизы: «Асьмелы кивалтӥсь быръёмы но Египетэ берытскоме». 5Соку Моисеен Аарон огазе люкаськем вань израиль калыклэн азяз ымныр вылазы выдӥзы. 6Соку Навинлэн Иисус пиез, Иефоннийлэн Халев пиез, со музъемез учкыны-чакланы ветлэм муртъёс, вылысьтызы дӥськутсэс кесязы но 7вань израиль калык азьын тазьы шуизы: «Милям учкыны-чакланы ветлэм музъеммы туж но туж умой; 8Кузё-Инмар асьмемыз гажаз-жаляз ке, со музъеме асьмеды пыртоз но сое, йӧлын чечыен бызись музъемез, асьмелы сётоз; 9Кузё-Инмарлы гинэ пумит эн бугыръяське, со музъемысь калыклэсь эн кышкалэ, сое асьмеос ньыломы ук: утисьсы соослэн ӧвӧл ни, нош асьмемын – Кузё-Инмар; соослэсь эн кышкалэ». 10Соку вань калык шуиз: «Изъёсын зӥръяса виёно соосты!» Со виын Кузё-Инмарлэн пиштӥсь данлыкез [пилем пушкысен] вань израиль пиослы вӧсяськон скиниязы пушкысен возьматскиз.

11Соку Кузё-Инмар Моисейлы шуиз: «Кема-а та калык Мынэсьтым вожме поттыса улоз на? Кытчыозь со Мыным оскытэк улоз на, со пӧлын трос паймымон тодметъёс возьматъясько ке но? 12Сьӧдчер вылаз лэзё, выжытэм быдто сое, тон бордысь, [тынад атаедлэн выжыез бордысь] та калыклэсь кужмогес но тросгес лыдо калык потто». 13Нош Моисей Кузё-Инмарлы тазьы шуиз: «Египетын улӥсьёс, кинъёс пӧлысь Тон та калыкез Аслад кужыменыд поттӥд, кылозы но 14та музъемын улӥсьёслы вералозы; соос кылӥзы: Тон, Кузё-Инмар, та калык пӧлын улӥськод, Тон, Кузё-Инмар, Астэ соослэн син азязы возьматӥськод, Тынад пилемед соос йылын сылэ, соослэн азязы Тон пилем юбо пушкын нуназе мынӥськод, нош уйин тыл юбо пушкын мынӥськод; 15одӥг муртэз кадь та калыкез быдтӥд ке, соку тынад данлыкед сярысь кылэм калыкъёс шуозы: 16”Кыл сётыса сӥзем музъемаз та калыкез пыртыны Кузё-Инмарлэн кужымез ӧз тырмы, луоё кыр дуннее сое быдтӥз”. 17Кузё-Инмарлэн кужымез вылӥе мед ӝутскоз ук, кызьы Тон тазьы вераса шуид вал: 18”Кузё-Инмар кема чидась, туж гажась-жалясь, [зэмлыко,] законлы пумит улэмъёсты, йыружъёсты, [сьӧлыкъёсты] куштэ, нош янгышо муртэ вӧсь карытэк уг кельты, атайёслэн законлы пумит лэсьтэм йыружъёссы понна соослэсь нылпиоссэс куинетӥ, ньылетӥ выжыозь вӧсь каре”. 19Аслад туж бадӟым гажан-жалянэныд та калыклэсь сьӧлыксэ кушты, кызьы тон Египетысен кутскыса та дырозь та калыклэсь сьӧлыкъёссэ куштылӥд».

20Кузё-Инмар [Моисейлы] шуиз: «Тынад верам кылыдъя сьӧлыкъёссэ куштӥсько. 21Мон улӥсько, [Мынам нимы ялан улэ,] Кузё-Инмарлэн пиштӥсь данлыкеныз быдэс музъем пачылмемын: 22ваньмыз Мынэсьтым пиштӥсь данлыкме адӟисьёс, Египетысен, луоё кыр дуннеысен возьматылэм паймымонэсь тодметъёсме адӟисьёс, дас пол ини Мынэсьтым визьме сыналлязы, Мынэсьтым верам кылъёсме санэ ӧз понылэ, 23соослэн атайёссылы кыл сётыса сӥзем музъемме соос уз адӟе; [соослэн Монэн ӵош ветлӥсь нылпиоссылы гинэ – ӟечен уродэз тодӥсьтэмъёслы, номыр тодӥсьтэм-валасьтэм пичи пиналъёссылы гинэ – музъем сёто, нош] одӥгзы но Мынэсьтым вожме поттӥсьёс сое уз адӟе; 24нош Аслэсьтым Халев ляльчиме со пушкын мукет дух улэм понна, чик шекланытэк Мыным тэрытскыса улэмез понна учкыны-чакланы ветлэм музъемаз сое улыны пырто, солэн кидысэз-выжыез отысь люкет басьтоз; 25амалик калык, хананейёс нёжалын уло; ӵуказе тӥ берытске но Горд Кам зарезь пала, луоё кыр дуннее, мынэ».

26Моисеен Ааронлы Кузё-Инмар тазьы вераз, тазьы шуиз: 27«Та лек калык кытчыозь Мон вылэ быдӟыяськыса улоз на? Мон вылэ ӝожтӥськыса улӥсь израиль пиослэсь быдӟыяськемзэс Мон кылӥсько. 28Вера соослы: ”Улӥсько Мон, – шуэ Кузё-Инмар, – кызьы тӥ Мыным кылӥськымон вераськоды вал, озьы ик лэсьто тӥледлы; 29та луоё кыр дуннее погралоды тӥ ваньды лыдъян-ӵотан улэ сюремъёс, Мон вылэ ӝожтӥськыса улӥсьёс, – ваньды, кинлы кызь, солэсь но тросгес арес, 30Иефоннийлэн Халев пиез но Навинлэн Иисус пиез сяна, тӥ пӧлысь нокин но Мынам киме ӝутыса тӥледлы улон инты сётыны сӥзем музъемам уз пыры. 31Тӥ шуиськоды вал, нылпиосты тушмон киулэ сюрозы, нош Мон соосты отчы пырто, соос тодозы, кыӵе со тӥляд кулэтэм карем музъемды, 32нош тӥляд шӧйёсты лошъяськозы та луоё кыр дуннеын. 33Тӥляд пиосты ньыльдон ар ӵоже луоё кыр дуннеетӥ кӧчыса ветлозы, тӥляд азыса улэмды понна вӧсь каронэз чидано луозы отчыозь – луоё кыр дуннее мугоръёсты кулыса бырытозь; 34ньыльдон нунал ӵоже со музъемез учкыса-чакласа ветлӥды, нош сьӧлыкъёсты понна ньыльдон ар ӵоже вӧсь каронэз чидано луоды: одӥг нунал интые одӥг ар, мед тододы, Мон куштэм бере Монтэк кыӵе улонэз”. 35Мон, Кузё-Инмар, шуисько но озьы ик лэсьтӥсько вань та лек калыкен, Мыным пумит урдскемъёсын: ваньзы соос та луоё кыр дуннее кулыса бырозы». 36Музъемез учкыны-чакланы Моисейлэн ыстылэм муртъёсыз, отысь берытскем беразы со музъем сярысь урод кылъёс вӧлмытыса вань та калыкез Моисейлы пумит бугыртӥсьёс, 37со музъем сярысь урод кыл вӧлмытӥсьёс, кулӥзы, Кузё-Инмар азьын погыртэмын вал; 38со музъемез учкыны-чакланы ветлэм воргоронъёс пӧлысь Навинлэн Иисус пиез но Иефоннийлэн Халев пиез гинэ улэп кылизы.

39Та кылъёсты Моисей вань израиль пиос азьын вераз но, калык туж ӝожомиз. 40Ӵукна вазь ик султӥзы но гурезь йылэ мыныса шуизы: «Асьмелэсь сьӧлыкаммес ми табере валамы: Кузё-Инмарлэн верам интыяз ми мыномы». 41Моисей шуиз: «Малы тӥ Кузё-Инмарлэн косонъёсыз сьӧры потӥськоды? Отын азинлыкез уз луы. 42Эн мынэ, тушмонъёсты тӥледыз медаз погыртэ шуиськоды ке, эн ветлэ, тӥ пӧлын Кузё-Инмар ӧвӧл уго; 43тӥляд азьпалады амалик калык, хананейёс отын луозы, меч улэ тӥ погралоды, малы ке шуоно Кузё-Инмар бордысь куштӥськиды, таре Кузё-Инмар тӥледын валче уз луы». 44Нош соос, Инмарлэсь верам кылзэ санэ понытэк, гурезь йылэ тубизы; нош Кузё-Инмарлэн сӥзён-косонэн ковчегез но Моисей стан сьӧры ӧз потэ. 45Амалик калык, хананейёс, со гурезьын улӥсьёс, отысь васькизы, пазьгизы соосты но Хорма карозь соосты улляса нуизы, [собере станэ берытскизы].

Currently Selected:

Лыдпусъёс 14: УДМБИБ

Highlight

Copy