Левит 7
7
7-тӥ ЛЮКЕТ
1«Тани янгыш уж понна курбон сётонлэн законэз: та быдӟым святыня; 2янгыш уж понна сётӥськись курбон пудоез вандыны кулэ тылын сутӥськись курбон пудоез вандон интыын ик, солэн вирыныз курбон сётон ӝӧкез котыр ласянь пазяны кулэ; 3курбонлы пудо вайись солэсь вань кӧйзэ, кӧй люкаськон пуйызэ, пуш кӧйзэ вайыны кулэ, 4кыксэ ик пекляоссэ, соос вылысь, саур (макес) вылысьтыз кӧйзэ, мус бордысь кӧй люкаськон пуйызэ; тае со пекляосын валче мед висъялоз; 5священник тае курбон сётон ӝӧк вылын, Кузё-Инмарлы сӥзьыса, мед сутоз: та янгыш уж понна сётӥськись курбон. 6Священникъёс выжыысь вань пиосмуртъёс тае сиыны быгато; сое святой интыын сиёно: та быдӟым святыня. 7Сьӧлык понна курбон сётонлэн но янгыш уж понна курбон сётонлэн законэз одӥг кадь: курбон пудолэсь сӥльзэ басьтоз со священник, кин, со пудоез курбон сётыса, курбон вайись муртэ сьӧлыклэсь сузя. 8Священник кинлэсь ке пудозэ, тылын сутыса, курбон сётэ ке, кузэ священниклы сётыны кулэ. 9Гурын пыжыса ваем вань салам нянез, горшокын яке таба вылын дасям сиёнэз, соосты курбон сётӥсь священник басьтоз. 10Вӧйын сураса пыжем салам няньёс, вӧйтэк пыжемъёсыз но Ааронлэн вань пиосызлы, соизлы но, таизлы но, сётэмын луыны кулэ.
11Тани тупаса улонлы сӥзем Кузё-Инмарлы вайиськись курбон сётонлэн законэз: 12кин тау карыны сое вае, соку тау карон курбон вӧзы вӧйын сураса пыжем юмал нянь, вӧйын зырам куарнянь вайыны кулэ, эшшо вӧйын сурам чабей пызь, вӧйын сураса пыжем нянь; 13тау карыса тупаса улонлы сӥзем курбон сётыку, куарнянь сяна, чырсатыса пыжем салам нянь мед ваёз; 14вань салам курбонъёсыз пӧлысь кудзэ ке но огзэ Кузё-Инмар доры вылэ ӝутыны мед ваёз: со – тупаса улонлы сӥзьыса ваем пудолэн вирыныз пазясь священниклы сётоно люкет; 15тау карыса тупаса улонлы сӥзем курбон пудолэсь сӥльзэ ваён нуналэ ик сиёно, солэсь кылем люкетсэ ӵукнаозьлы кельтыны уг яра. 16Нош кин ке сӥзиськыса яке аслаз ӟеч мылкыдыныз курбон сётыны вае ке, солэсь курбон сӥльзэ ваем нуналэ ик сиёно, мукетаз нуналэ но солэсь кылем люкетсэ сиыны яра, 17нош курбон пудолэсь кылем сӥльзэ, куинетӥ нуналозьлы кылиз ке, тыл вылын сутоно; 18нош тупаса улонлы сӥзем курбон сӥлез куинетӥ нуналэ но сиизы на ке, соку со курбон ярамон уз луы; кин сое вайиз, солы ӟечлы уз гожтӥськы: та саптаськон, кин ке сое сииз ке, со мурт сьӧлыкез ас вылаз нуоз; 19та сӥль борды кырсь маке йӧтӥськиз ке, сое сиыны уг яра, сое тылын сутоно, нош чылкыт сӥлез котькудӥз чылкыт мурт сиыны быгатэ; 20кыӵе ке но адями саптаськем дыръяз Кузё-Инмарлы ваем тупаса улонлы сӥзем курбон сӥлез сииз ке, со адями ас калыкез пӧлысь быдтэмын луоз; 21кыӵе ке адями кыӵе ке кырсь маке борды – адямилэн кырсез борды яке кырсь пудо борды, яке котькыӵе кырсь нюж кыстӥськыса ветлӥсь борды – йӧтӥськиз ке, собере Кузё-Инмарлы ваем тупаса улонлы сӥзем курбон сӥлез сииз ке, со адями ас калыкез пӧлысь быдтэмын луоз».
22Кузё-Инмар Моисейлы тазьы вераз, тазьы шуиз: 23«Израиль пиослы тазьы шу: ”Ошлэсь но, ыжлэсь но, кечлэсь но нокыӵе но кӧйзэ эн сиелэ. 24Кулэм пудолэсь, пӧйшуръёсын кесям пудолэсь кӧйзэ котькыӵе уже кутыны луэ, нош сое тӥ эн сие. 25Кин Кузё-Инмарлы курбон ваем пудолэсь кӧйзэ сииз ке, со адями ас калыкез пӧлысь быдтэмын луоз; 26асьтэлэн улон интыосады нокыӵе но вирез эн сие – тылобурдолэсь но, пудолэсь но вирзэ эн сие; 27нош кин ке кыӵе ке вирез сииз ке, со адями ас калыкез пӧлысь быдтэмын луоз”».
28Соку Кузё-Инмар Моисейлы тазьы вераз, тазьы шуиз: 29«Израиль пиослы тазьы шу: ”Кин, тупаса улонлы сӥзьыса, Кузё-Инмарлы курбон вае, со тупаса улонлы сӥзем курбонэзлэсь люкетсэ Кузё-Инмарлы саламлы мед ваёз; 30курбонэз со ас киыныз Кузё-Инмарлы вайыны кулэ: кӧез мӧляеныз валче [озьы ик мус бордысь кӧй люкаськон пуйыез] со вайыны кулэ, Кузё-Инмар азьын со мӧляез сэзъяса вайыны кулэ; 31кӧез священник курбон сётон ӝӧк вылын сутоз, нош курбонлы сётэм пудолэсь мӧлязэ Ааронлы но солэн пиосызлы сётыны кулэ; 32нош бурпал пельпумзэ тупаса улонлы сӥзем курбонъёсты пӧлысь священниклы вылэ ӝутонлы ваелэ. 33Аарон пиос пӧлысь кудзы ке тупаса улонлы сӥзем курбон пудолэсь вирзэ, кӧйзэ вае ке, солы люкетлы курбон пудолэсь бурпал пельпумзэ сёто; 34уго израиль пиослэсь тупаса улонлы сӥзьыса сётэм курбон пудооссылэсь сэзъяса вылэ ӝутонлы ваёно люкетсэс – мӧлязэс, пельпумзэс – Мон израиль пиослэсь Аарон священниклы но солэн пиосызлы пумтэм вапумъёс ӵожелы люкетлы сётӥсько”». 35Та Кузё-Инмарлы курбон ваем пӧлысь Ааронлы люкет, солэн пиосызлы люкет, – Кузё-Инмар азьын священник луыса ужаны-тыршыны кутскем нуналысен ик, 36таӵе люкетэз Кузё-Инмар, соосты вӧйын зырӟыса пуктэм нуналысен кутскыса, израиль пиослы сётыны косӥз. Та выжыысь выжые, пумтэм вапумъёс ӵожелы сётӥськем пуктон-косон. 37Тани тылын сутӥськись курбон пумысен, саламлы ваем нянь пумысен, сьӧлык понна, янгыш уж лэсьтэм понна курбон сётон пумысен, священнике пуктыку курбон сётон пумысен, тупаса улонлы сӥзем курбон сётон пумысен закон мар вера, 38та законэз Кузё-Инмар Сӥнай гурезьысен Моисейлы сётӥз, Сӥнай луоё кыр дуннеысен Со Моисей пыр израиль пиослы вераз, Кузё-Инмарлы кыӵе-мар саламъёс-кузьымъёс вайылыны кулэ.
Currently Selected:
Левит 7: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
