Осия 9
9
9-тӥ ЛЮКЕТ
1Мукет калыкъёс кадь эн шумпоты, эн шулдыръяськы, Израиль, уго тон, Инмаредлэсь палэнскыса, азыса-калгыса улӥськод: вань итымъёсын азон-калгон кузьымъёс басьтыны яратӥськод. 2Кутсаськон итым но, виноград нелькон инты но соослэсь кӧтсэс уз тыре, виноград вулы оскиськемзы но юнме луоз. 3Кузё-Инмарлэн музъемаз соос уз улэ: Ефрем Египетэ берытскоз, Ассирияын ярантэм сиён сиёзы. 4Кузё-Инмарлы курбон вина уз кисьтэ, Солы соослэн курбонъёссы ярамонэсь уз луэ; соослы соос кулэм мурт ватыку сием нянь кадь луозы: ваньмыз, кин сое сииз, саптаськоз, уго соослэн няньзы асьсэлэсь кӧтсэс тырон понна, нош Кузё-Инмарлэн корказ со уз пыры. 5Сӥё-дано нуналэ, Кузё-Инмарлэн праздник нуналаз, мар кароды? 6Уго тани, куашкан-таркаськон вуэмен сэрен соос кошкозы; Египет соосты ас дораз люкалоз, Мемфис соосты ватоз; азвесьлэсь лэсьтэм дуно арбериоссэс пушнер ӝокатоз, бышкись будос соослэн балаганъёсазы потоз. 7Тон доры лыктон нуналъёс вуизы, пунэм берыктон нуналъёс вуизы. Израиль тодоз, азьпалзэ тодытыса верась укылтэм, ассэ духен тыр луэм шуись визьзэ ыштэм луэ шуыса, – со тынад законлы пумит лэсьтэм трос ужъёсыныд сэрен, туж-туж тушмонъяськыса улэменыд сэрен! 8Ефрем – Инмаре вӧзысь возьмаськись; пророк – тылобурдо кутылӥсьлэн вань сюресъёсыз вылэ пуктылэм казез, Инмарезлэн юртаз визь тугаськон вайись. 9Пыдло усизы соос, Гиваын улӥсьёс кадь азӥзы-сӧриськизы; соослэсь сьӧлыклэсь кышкатэк улэмзэс Со тодаз ваёз, сьӧлыкъёссы понна соосты вӧсь кароз. 10Израилез шедьтыса, кыр дуннеысь виноградэз шедьтэм кадь Мон луи; нырысь вакытэ смоквапуысь нырысетӥ потэм емышсэ кадь тӥлесьтыд атайёстэс Мон адӟисько вал, – нош соос Ваал-Фегор доры кошкизы, возьыттэм ужъёс киулэ сётскизы, яратонооссы (сульдэръёссы-идолъёссы) выллем ик асьсэос но юрӟым макеослы пӧрмизы. 11Ефрем калыклэн данлыкез тылобурдо кадь лобӟоз: нылпи но уз ни вае, секытэн но уз ни луэ, нылпи но уз ни сюры. 12Нылпиоссэс быдэ ке но вуттӥзы, талало соосты; соос дорысь кошки ке, куректон-кайгу луоз соослы! 13Кызьы Мон адӟи, Ефрем Тирозь туж чебер азе интыяськемын; но Ефрем ас нылпиоссэ адями виылӥсьёс доры поттоз. 14Сёт соослы, Кузё-Инмаре: мар соослы Тон сётод? Сёт соослы нылпи вайисьтэм лулпушъёсты, куасьмем ноныосты. 15Соослэн вань уродлыксы Галгалын: отысен Мон соосты лек ужъёссы понна адӟемпотостэм кари; Аслам коркасьтым Мон соосты улляло, уг ни яраты соосты; соослэн вань кивалтӥсьёссы Мон бордысь куштӥськемъёс. 16Ефрем погыртэмын; выжызы куасьмиз, соос емыш уз ни вае, нош нылпи вайизы ке, пушкысь потоно кема возьмам емышсэс быдто. 17Инмаре соосты кулэтэм кароз, малы ке шуоно Солэсь верамзэ соос ӧз кылзӥське, мурт калыкъёс пӧлтӥ пыдйылчи луыса ветлыны кылёзы.
Currently Selected:
Осия 9: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
