Осия 7
7
7-тӥ ЛЮКЕТ
1Израилез эмъяса улыкум, усьтӥськиз Ефремлэн шонертэм улэмез, Самариялэн сьӧсь ужез: уго соос пӧяськыса уло; лушкаськись пыре, йырвандӥсь но ульчаос кузя таласа ветлэ. 2Соос сюлмазы уг поно, соослэсь вань сьӧсь ужъёссэс Мон тодам возисько шуыса; табере соосты ужъёссы котырто, соос Мынам син азям. 3Сьӧсь уженызы соос эксэез шулдырто, ӧрекчаськонъёсынызы кивалтӥсьёслэсь мылкыдзэс ӝуто. 4Кызьы нянь пыжись нянь котыса со чырсатозь гурзэ эстэмысь уг дугды, озьы ваньзылэн соослэн азон-калгонлы мылкыдзы ӝуаса улэ. 5«Милям эксэймылэн нуналыз!» шуо черлатозяз вина юэм, лӧптэм кивалтӥсьёс, нош соиз сантэмасьёслы кизэ мыче. 6Уго соос асьсэлэн кескич луэменызы сюлэмзэс гурлы укшась каро: нянь пыжисьсы быдэс уй изе ке но, гурзы ӵукна гомась тыл кадь ӝуа. 7Ваньзы соос гур кадь ӟырдамын, судьяоссэс сиё; соослэн вань эксэйёссы усё, нокин но соос пӧлысь Мыным уг вазиськы. 8Ефрем мурт калыкъёсын сураськиз, Ефрем табаысь берыктымтэ уднянь кадь луиз. 9Мурт калыкъёс солэсь кужымзэ сиыса улӥзы, нош со ӧз шӧдылы; йырсиез быдэсак пурысьтаз ини, нош со уг тоды, йырсиез пурысьтам шуыса. 10Соослэн син азязы Израильлэн данъяськонэз улӥ каремын, но озьы ке но соос Инмарзы Кузё-Инмар пала ӧз берыктӥське, ӧз утчалэ Сое. 11Ефрем нодтэм дыдык кадь луиз, номыр но уг вала: Египет калыкез ӧтё, Ассирияе мыно. 12Мыныны потӥзы ке, вылазы калтонме кушто; ин тылобурдоосты кадь соосты уськыто; вӧсь каро, кызьы ивортэмын вал соослэн кенешсылы. 13Куректон-кайгу соослы Мон бордысь палэнскемзы понна; бырон соослы Мон бордысь усемзы понна! Мон соосты ути, нош соос Мон вылэ ӧвӧлтэм кылъёс вераса улӥзы. 14Изён интыязы викышъяса улыкузы, сюлмысьтызы Мыным ӧз вазиськылэ; нянь понна, вина понна огазе люкасько, нош Мон дорысь палэнско. 15Мон соосты визьмалляй, суйбыгытсэс юнматылӥ, нош соос Мыным пумит урод ужъёс малпаллязы. 16Вазиськылӥзы, но Вылысь Инмарлы ӧз вазиськылэ, кырыж пукыӵ кадесь соос луизы; лек кылзы понна кивалтӥсьёссы тӥр-пурт улэ усёзы; та понна соос Египетын серекъян-веранлы пӧрмозы.
Currently Selected:
Осия 7: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
