Осия 2
2
2-тӥ ЛЮКЕТ
1Агай-вынъёстылы шуэлэ: «Мынам калыке», сузэръёстылы: «Сьӧлыкез куштэм» шуэлэ. 2Асьтэлэн анаеныды судэ пыре, судэ пыре; уго со Мынам кышное ӧвӧл, Мон солэн картэз ӧвӧл; азон-калгонэз син азьысьтыз мед палэнтоз, азон-калгон сьӧлыкез гадьёсыз дорысь мед палэнтоз, 3шыр гольык сое кылёно медам луы, вордскем нуналаз кадь калык азе поттоно медам луы, кыр дуннелы сое пӧрмытоно медам луы, кӧс музъемлы пӧрмытоно медам луы, вутэк пашмытыса, сое быдтоно медам луы. 4Нылпиоссэ но уг жаля, малы ке шуоно соос азыса-калгыса шедьтэм нылпи. 5Соослэн анайзы азыса-калгыса улӥз, секытэн луыса, ассэ возьытэ вуттӥз, уго шуэ вал: «Дусымъёсы доры мыно, уго соос мыным нянь, ву, ыжгон, етӥн, вӧй, юонъёс сёто». 6Тани, со понна солэсь сюрессэ бышкись будосэн котырто, кенерало сое, собере со аслэсьтыз сюресъёссэ уз ни шедьты. 7Дусымъёсыз сьӧры уйиськыса мыноз, но соосты уз ни суты; утчалоз соосты, но уз шедьты; соку шуоз: «Кошко, нырысетӥ кузпалы доры ик берытско, уго соин улыкум, мыным умойгес вал, али сярысь». 8Но со ӧз тоды, Мон, Мон солы нянь но, вина но, вӧй но сётӥ шуыса, азвесьсэ но, зарнизэ но трос кари, солэсь соос Вааллэсь сульдэрзэ лэсьтӥзы. 9Со понна Мон Аслэсьтым няньме солэн дыраз, винаме но солэн вакытаз берен басьто, талало ыжгонме но, етӥнме но, кудӥныз соос гольык интызэс шобырто. 10Али солэсь юрӟым интызэ кыре потто дусымъёсызлэн син азязы, нокин сое Мынам киулысьтым ишкалтыны уз быгаты. 11Со дорын ортчылӥсь вань шулдыръяськонъёсты, выль толэзез, субботаосты пусъёнъёсты, вань праздникъёссэс дугдыто. 12Быдто виноградпудъёссэ, смоквапуоссэ, кудъёсыз сярысь со шуэ: «Та мынам кузьымъёсы, соосты мыным дусымъёсы кузьмазы»; соосты мон нюлэслы пӧрмыто, луд пӧйшуръёс соосты сиёзы. 13Ваалъёслы ужаса-тыршыса улэмез понна Мон сое вӧсь каро, соослы со ӵындытыса улӥз, угыосын, чырты весьёсын чеберъяськыса, дусымъёсыз сьӧрын ветлыса улӥз, нош Монэ вунэтылӥз, – шуэ Кузё-Инмар. 14Со понна, тани, Мон сое нуо, кыр дуннее вутто, солэн сюлмызлы вераса уло. 15Отысь солы виноград бакчаоссэ сёто, Ахор нёжалэз сёто оскиськонэз усьтӥськон азьын; отын со кырӟаса улоз егит дыръяз кадь, Египет музъемысь потон нуналаз кадь. 16«Со нуналэ, – шуэ Кузё-Инмар, – тон Монэ ”кузпалы мынам” шуод, азьланяз тон Монэ ”Ваали” уд ни шуы». 17Ваалъёслэсь нимзэс солэн кыл-ымысьтызы улляло, соослэсь нимъёссэс азьланяз тодазы уз ни вае. 18Со вакытэ соос понна луд пӧйшуръёсын, ин тылобурдоосын, музъем вылтӥ нюж кыстӥськыса ветлӥсьёсын кусып кылдыто; соослэн музъем вылысьтызы пукыӵез, мечез, ожмаськонъёсты быдто но соослы кышкатэк улон нуналъёс сёто. 19Аслым пумтэм вапумъёслы тонэ кузпаллы басьто. Зэмлыклэн, шонер судлэн герӟетъёсыныз, ӟечлыкме, гажан-жалянме возьматыса, тонэ Асэным герӟало. 20Аслым тонэ кузпаллы басьто, оскиськымон луо, соку тон Кузё-Инмарез тодод. 21«Со нуналэ, – шуэ Кузё-Инмар, – Мон кыло, инлэсь куронзэ кыло, нош ин музъемлэсь куронзэ кылоз, 22музъем кылоз но нянь, вина, вӧй сётоз, нош соос Изреельын удалтозы. 23Израилез та музъем вылэ Аслым калык луыны кизё, ”Сьӧлыкез куштэмын ӧвӧл” шуыса нимамелэсь#2:23 татын вераськон мынэ израиль калык сярысь; сьӧлыксэ кушто, ”Мынам калыке ӧвӧл” шуыса нимамелы#2:23 татын вераськон мынэ израиль луисьтэм калыкъёс сярысь шуо: ”Тон Мынам калыке”, нош со шуоз: ”Тон мынам Инмаре”».
Currently Selected:
Осия 2: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
