Аввакум 2
2
2-тӥ ЛЮКЕТ
1Возьмаськон интыям султӥ мон, каланчаын сылыса чаклай мон: тодэме потӥз, мар шуоз Со мон сярысь, аслам ӝожтӥськонэ пумысен кыӵе ответ мыным сётоно? 2Кузё-Инмар мыным ответ сётыса шуиз: «Адӟемдэ гожты, пул вылэ валамон гожъя, лыдӟись мурт капчиен лыдӟыны мед быгатоз, 3уго адӟон возьматэ вуоно, нимысьтыз пуктэм дырез, со пумыз сярысь вера, уз пӧя; со ӝегаса ке но улӥз, возьма сое, уго одно ик быдэсмоз, уз воштӥськы. 4Тани, вылтӥяськись лул уз буйгатскы, нош шонер улӥсь осконэз пыр улэп улоз». 5Вылтӥяськись адями, чырсась вина кадь, уг буйгатскы, аслэсьтыз ньылонзэ адэз кадь паськыт каре, кулон эзель кадь кӧт тыронэз валасьтэм, ас дораз вань калыкъёсты люка, вань выжыосты аслыз киултэ. 6Но соос ваньзы ик со сярысь мадён уз вералэ-а, серекъяса тазьы уз кырӟалэ-а: «Куректон-кайгу луоз солы, кин ассэ дурыстэм узыр каре муртлэн ваньбуреныз, – кемалы-а со? – кин аслэсьтыз улонзэ пунэм тыронъёсын шугомытэ!» 7Шӧдтэк шорысь уз султэ-а тонэ кесясьёс, лушкась-таласьёс тон вылэ уз урдӥське-а, – соос тынэсьтыд но уз лушкалэ, уз талалэ-а? 8Тон трос калыкъёсты лушкад-талад бере, адямиослэсь трос вирзэс кисьтэмед понна, улон дуннеез, городэз но отын вань улӥсьёсты таркамед понна вань мукет калыкъёс тонэ таркалозы.
9Куректон-кайгу луоз солы, кин ас юртэзлы ӧрекчаськыса поттэм ваньбур люканы аксымъяське, соин гурезь йылэ курадӟон киулэ сюронлэсь утиськон понна юнматэм кар пуктыны малпа. 10Трос калыкъёсты виылыса, ас выжыдэ сӥтэм-сантэм улонэ кельтӥд, ас лулыдлы пумит тон сьӧлыкад. 11Борддорысь изъёс черектӥськозы, пу сюрыос соослы ответ сётозы: 12«Куректон-кайгу вир вылэ город пуктӥсьлы, сьӧлыклэсь кышкатэк улыса юнматэм изкаръёс лэсьтӥсьлы!» 13Тани, та Саваоф Кузё-Инмарлэсь ӧвӧл-а: калыкъёс тыл понна ужало, калык выжыос юнме асьсэды курадӟыто? 14Уго музъем пачылмоз Кузё-Инмарлэсь данлыксэ тодонэн, кызьы вуосын зарезь пачылме. 15Куректон-кайгу тыныд – матыседлы юыны аслад йыркуръяськонэныд пачылмем юон сётӥсьлы, сое кудӟытӥськод возьдаськон интызэ адӟон понна! 16Данлыко ужъёс интые возьыттэм ужъёсын тон пачылмемын ини; ю ук тон но, возьдаськон интыдэ возьматы, – тон вылэ но вуоз Кузё-Инмарлэн бур кияз кутыса возем чашаез, данлыкед тынад сӥтэм-сантэм каремын луоз. 17Уго Ливанын лэсьтэм сьӧсь ужъёсыд тон доры вуозы кышкатэм пӧйшуръёсты виылэмед понна, адями вир кисьтэмед понна, улон дуннеез, городэз но отын вань улӥсьёсты таркамед понна. 18Мар пайдаез суредасьлэн киыныз кисьтыса-ӵыжатыса лэсьтэм сульдэрлэсь – ӧрекчи дышетӥсьлэсь; сульдэр лэсьтӥсь оскиське ке но ас киыныз кылдытэм кылтэм-ымтэм сульдэръёслы? 19Куректон-кайгу пулэсь лэсьтэм арберилы «Султы!» шуисьлы, кылтэм-ымтэм излы «Сайка!» шуисьлы. Малы ке но со дышетоз-а? Тани, со зарниен, азвесен шобыртэмын, нош лулыз-шоканэз солэн ӧвӧл. 20Нош Кузё-Инмар Аслаз святой храмаз, Солэн азяз быдэс музъемвыл чус мед улод!
Currently Selected:
Аввакум 2: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
