Потон 33

33-тӥ ЛЮКЕТ

1Соку Кузё-Инмар Моисейлы шуиз: «Кошкы татысь, тон но, Египет музъемысь поттэм калыкед но, Авраамлы, Исааклы, Иаковлы сӥзем музъем вылэ мынэ, сое тӥляд выжыдылы сёто шуыса, Мон кыл сётӥ вал, 2тынад азяд [Аслэсьтым] Кылчинме лэзё но отысь хананей, аморрей, хеттей, ферезей, [гергесей,] евей, иевусей калыкъёсты улляло, 3[со тӥледыз пыртоз] йӧл, чечы поттыса бызись музъеме, уго Мон Ачим тӥледын ӵош уг мыны, сюрес вылысен тӥледыз медам быдты шуыса, малы ке шуоно тӥ чурыт сюлэмо калык». 4Та кышкыт кылъёсты калык кылӥз но куараен бӧрдыны кутскиз, нокин но чеберъяськон арбериоссэ вылаз ӧз ошы. 5Уго Кузё-Инмар Моисейлы шуиз: «Израиль пиослы шу: тӥ чурыт сюлэмо адямиос; тӥ пӧлтӥ Мон ортчи ке, одӥг минут куспын Мон тӥледыз быдто; али ик мугор вылысьтыды чеберъянъёстэс октэ, Мон учко, мар тӥледын кароно». 6Израиль пиос мугор вылысьтызы Хорив гурезь дорысен чеберъянъёссэс октӥзы.

7Моисей балаганзэ станлэн сьӧраз пуктӥз – кыдёкегес, сое со вӧсяськон скиния шуыса нимаз; Кузё-Инмарез утчасьёс вӧсяськон скинияе лыктылӥзы, со станлэн сьӧраз вал. 8Моисей скиния доры потылыку, вань калык пыд йылаз султылӥз, котькудӥз но балаганаз пырон доры султылӥз но Моисейлэн бӧрсяз учкыса улӥз, – скинияе пырытозяз учкыса улӥзы. 9Моисей скинияе пырыку, пилем юбо васькылӥз но скинияе пырон дорын сылӥз, соку [Кузё-Инмар] Моисеен вераськылӥз. 10Вань калык скинияе пырон дорын сылӥсь пилем юбоез адӟылӥз; вань калык султылӥз, котькудӥз ас балаганаз пырон дорын йыбыртъяса улӥз. 11Кузё-Инмар Моисеен ваче син сылыса вераськиз, аслаз эшеныз вераськисьёс музэн, собере со калыклэн сылон интыяз берытскиз; нош солэн ужась-тыршисез Навин пи Иисус, егит пияш, скиния дорысь ӧз кошкылы.

12Моисей Кузё-Инмарлы шуиз: «Тани, Тон мыным шуиськод: ”Ну та калыкез”, нош Ачид мыным ӧд усьты, кинэ монэн ӵош келялод, Тон Ачид шуид ке но: ”Мон тонэ нимыдъя тодӥсько, Мынам син азям тон ӟеч эрик басьтӥд”. 13Озьыен, мон Тынад син азяд ӟеч эрик басьтӥ ке, сюлворыса курисько: Аслэсьтыд сюрестэ мыным усьты, мон Тонэ мед тодом но Тынад син азяд ӟеч эрик мед басьтом; малпа, та адямиос Тынад калыкед луо шуыса». 14[Кузё-Инмар солы] шуиз: «Мон Ачим [тынад азяд] мыно но тонэ каньыл азе пырто». 15[Моисей] солы шуиз: «Тон Ачид [милемын ӵош] ӧд ке мыны, соку милемыз татысь эн потты. 16Уго кызьы тодыны луоз, мон но, Тынад калыкед но Тынад син азяд ӟеч эрик басьтӥмы шуыса? Тон милемын ӵош мынӥд ке, соя ӧвӧл-а? Соку мон но, Тынад калыкед но музъем вылысь вань калыкъёслэсь даноесьгес луысалмы». 17Соку Кузё-Инмар Моисейлы шуиз: «Мар сярысь тон верад, Мон сое лэсьто, малы ке шуоно Мынам син азям тон ӟеч эрик басьтӥд, тонэ Мон нимыдъя тодӥсько». 18[Моисей] шуиз: «Аслэсьтыд пиштӥсь данлыктэ возьматы». 19Соку [Кузё-Инмар Моисейлы] шуиз: «Тынад азьтӥд Ас данлыкеным мыно, Кузё-Инмар шуыса, Аслэсьтым нимме тон азьын яло; кинлы ӟеч кареме потӥз, солы ӟеч каро; кинэ жаляме потӥз, сое жаляло». 20Собере Со шуиз: «Мынэсьтым ымнырме тынад адӟемед уг луы, малы ке шуоно адями Монэ адӟыны но улэп кыльыны уг быгаты». 21Кузё-Инмар шуиз: «Тани Мон вӧзысь инты, та изгурезь йылэ султы; 22Мынам пиштӥсь данлыке ортчыку, Мон тонэ изгурезьлэн висказ султыто но ортчытозямлы Аслам киыным тонэ шобырто; 23киме басьтэм бере тон Монэ бертӥм адӟод, нош Мынэсьтым ымнырме [тынад] адӟемед уз луы».

Currently Selected:

Потон 33: УДМБИБ

Highlight

Copy