Потон 30

30-тӥ ЛЮКЕТ

1Ческыт зын поттӥсь арбериосты сутыны курбон сётон ӝӧк лэсьты, сӥттимпулэсь лэсьты сое: 2кузьдалаез гырпум кузьда, пасьталаез гырпум кузьда, ньыль сэрего со луыны кулэ, нош ӝуждалаез кык гырпум кузьда; солэн бордысьтыз сюръёсыз мычиськыса мед улозы; 3чылкыт зарниен сое шобырты, вылзэ но, урдэсъёссэ но котыр ласянь, сюръёссэ но; котыртӥз зарни тугоко лэсьты; 4тугоко улэ кык пал сэрегаз [чылкыт] зарнилэсь кык кульчо лэсьты; соосты кык палтӥз ик лэсьты, соос пушкы сюры тырыны луоз, сюрыосын та курбон сётон ӝӧкез ӝутыса нуллон понна. 5Сюрыосты сӥттимпулэсь лэсьты, соосты зарниен шобырты. 6Сӥзён-косонэн ковчег азе ошем катанчилэн азяз сое пукты, сӥзён-косонэн ковчеглэн шобретэзлэн ваче бериназ, отысен Мон тонэн пумиськыса верасько.

7Курбон сётон ӝӧк вылын Аарон ческыт зыно арбериосты ӵын поттоз; ӵукналы быдэ со, лампадаосты дасяны лыктыкуз, мед ӵындытоз: 8Аарон лампадаосты ӝыт ӝуатъякуз но мед ӵындытоз: выжыысь выжыосы Кузё-Инмар азьын тазьы ӵындытон мед ортчоз. 9Та курбон сётон ӝӧк вылын мукет ӵындытонъёс, тылын сутӥськись курбонъёс эн ортчытъялэ, салам няньёс эн вае, кисьтоно курбон-саламъёстэс со вылэ эн кисьтэ. 10Курбон сётон ӝӧклэн сюръёсызлы Аарон арлы одӥг пол чылкытатон-сузян сямез мед ортчытоз, сьӧлыкъёслэсь чылкытатӥськон-сузяськон понна ваем курбонлэн вирыныз арлы быдэ, выжыысь выжыосы курбон сётон ӝӧкез чылкытатон-сузян сямез ортчытоно. Та святыня быдӟым Кузё-Инмар азьын.

11Кузё-Инмар Моисейлы тазьы шуиз: 12«Израиль пиосты учкыкуд-чаклакуд, соосты лыдъяны-ӵотаны кутскид ке, соосты учкыкуд чакла: лулзэ утён понна котькудӥз но Кузё-Инмар азьын лулыз понна дун мед тыроз, лыдъян-ӵотан ортчытэм понна соос вылэ шугадӟонъёс медаз вуэ шуыса; 13котькудӥз лыдъянэ-ӵотанэ пырись мурт ӝыны сӥкль сётыны кулэ, – вӧсяськон скинияысь сӥкльлэн секталаеныз мертаса; одӥг сӥкльын кызь гер: ӝыны сӥкль – со Кузё-Инмарлы курбон; 14кинлы кызь но солэсь тросгес арес ини, кин лыдъян-ӵотан улэ сюре, Кузё-Инмарлы собыдӟа дун вайыны кулэ. 15Кузё-Инмарлы узыр мурт ӝыны сӥкльлы тросгес медаз вай, куанер мурт ӝыны сӥкльлэсь ӧжытгес медаз вай, – лулдэс утьыны ваем уксёдэс. 16Израиль пиослэсь лулзэс утёнлы ваем азвесьсэс басьты но сое вӧсяськон скинияын кулэ ужъёслы кут: та израиль пиосты Кузё-Инмар азьын тодэ вайытонлы, лулъёстэс утёнлы луоз».

17Соку Кузё-Инмар Моисейлы шуиз: 18«Мисьтӥськон-гылтӥськон понна ыргонлэсь мисьтӥськон лэсьты, пыдул пуктэтэз но ыргонлэсь мед луоз, вӧсяськон скинияен курбон сётон ӝӧк вискы сое пукты, отчы ву лэзь; 19Аарон но солэн пиосыз отысь вуэн киоссэс, пыдъёссэс мед миськозы; 20вӧсяськон скинияе пырон азязы, кулоно медаз луэ шуыса, вуэн мед мисьтӥськозы, – со понна кулоно медаз луэ; яке курбон сётон ӝӧк доры служить карыны, Кузё-Инмарлы курбон сётыны, лыктон азязы 21соос киоссэс, пыдъёссэс вуэн миськыны кулэ, – медаз кулэ; та пуктон-косон Ааронлы но, солэн пиосызлы но выжыосысь выжыосы, пумтэм вапумъёс ӵожелы сётӥське». 22Кузё-Инмар Моисейлы тазьы вераз, тазьы шуиз: 23«Ческыт зын поттӥсь самой усто арбериосты кут: ас понназ потӥсь смирнаез – вить сю [сӥкль], ческыт зын поттӥсь корицаез – кык пол ӧжытгес – кык сю витьтон сӥкль, ческыт зыно тростникез – кык сю витьтон сӥкль; 24кассиез – вить сю сӥкль, вӧсяськон скинияысь сӥкльлэн секталаеныз мертаса, одӥг гин вӧйпулэсь вӧйзэ; 25таосыз огазе карыса, миро дася святой вӧйын зырӟон ортчытыны, быгатыса дасям вӧй: та миро святой вӧйын зырӟонлы мыноз; 26соин вӧсяськон скинияез зыра, сӥзён-косонэн ковчегез зырӟы. 27Отысь ӝӧкез но мар отын вань, югдытон арбериез но со бордын мар вань, ӵындытон курбон сётон ӝӧкез, 28тылын сутӥськись курбон сётон ӝӧкез но солэсь вань тӥрлыкъёссэ, мисьтӥськонэз пыдул кутонэныз ӵош мироен зырӟы; 29вӧся соосты, быдӟым святыня луоз: мар гинэ соос борды уз йӧтӥськы, ваньмыз дун-чылкыт луоз; 30Ааронэз но, солэсь пиоссэ но зырӟы, дун-чылкыт кар, соос Мыным священникъёс мед луозы. 31Нош израиль пиослы шу: ”Мынам та мирое, выжыосысь выжыостылы святой зырӟон понна луоз, 32священник луисьтэм муртлэсь мугорзэ соин зырӟыны уг яра, [асьтэ тодэмъя асьтэлы] таӵе люкетъёслэсь зырӟылон эн лэсьтэ; со – святыня: тӥ понна со святыня луыны кулэ; 33кин таӵе люкетъёслэсь зырӟылон лэсьтӥз яке святой зырӟон вӧйын священник луисьтэм муртэ зырӟиз ке, со ас калыкез пушкысь быдтэмын луыны кулэ”».

34Соку Кузё-Инмар Моисейлы шуиз: «Басьты таӵе ческыт зыно арбериосты: стакти, оних, ческыт зыно халван, чылкыт ливан-ладан – ваньзэ огмында, 35соослэсь ческыт зыно ӵын поттӥсь сурет лэсьты, быгатыса, нелькыса дася, чылкыт, дун-чылкыт со мед луоз. 36Сое векчи-векчи карытозь нелькы, вӧсяськон скинияысь сӥзён-косонэн ковчег азе сое пукты, отысен Мон тонэн пумисько: та тӥ понна быдӟым святыня луоз; 37таӵе люкетъёслэсь ческыт зыно ӵын поттӥсь сурет асьтэлы эн лэсьтэ: та святыня Кузё-Инмарлы мед луоз; 38кин ке талы укшась сурет лэсьтӥз ке соин ӵындытон понна, [та лул] ас калыкез пӧлысь быдтэмын луоз».

Currently Selected:

Потон 30: УДМБИБ

Highlight

Copy