Амос 5

5-тӥ ЛЮКЕТ

1Израиль выжы, кылзы та верам кылэз, тӥ сярысь бӧрдыса кырӟало. 2Усиз но уг ни султы Израиль ныл! Ас музъем вылаз погыртэмын, нош ӝутӥсез ӧвӧл. 3Уго тазьы шуэ Инмар Кузё-Инмар: сюрс ожгарчиосты султытӥсь город сю ожгарчиен кылёз; сю ожгарчиосты султытӥсь город дас ожгарчиен Израиль выжылы кылёз. 4Уго тазьы шуэ Кузё-Инмар Израиль выжылы: утчалэ Монэ, улэп кылёды. 5Эн утчалэ Вефилез, Галгалэ эн ветлэ, Вирсавияе но эн ветлэ, уго Галгал быдэсак пленэ нуэмын луоз, Вефиль номыртэм быроз. 6Утчалэ Кузё-Инмарез, улэп кылёды; озьы ӧд ке лэсьтэ, тыл кадь Со Иосифлэн выжыез вылэ урдӥськоз, тыл сое ньылоз, Вефильын нокинлы луоз сое кысыны. 7Э, тӥ, судэз бӧрдонлы пӧрмытӥсьёс, шонерлыкез пыд улады лёгасьёс! 8Кин сизьым кизилиё люкез, Орионэз кылдытӥз, кин кулон вужерез яркыт ӵукналы пӧрмытэ, нош нуназе куазез уй кадь пеймыт каре, зарезь вуосты люка но музъемлэн ымныр вылаз кисьта? Кузё-Инмар Солэн нимыз. 9Со куашкатӥсез кужмо муртлы пумит юнматэ, соку куашкатӥсь изкар пушкы пыре. 10Нош соос капка дорысен шекъёсты шарае поттӥсез адӟонтэм каро, шонер верасез синазькыль каро. 11Озьыен, куанер муртэ ӝикатыса воземды понна, солэсь нянен кузьым октэмды понна тӥ вӧлыса лэсьтэм изъёслэсь коркаос пуктылоды, но отын уд улэ; синмаськымон виноград садъёс мерттоды, но отысь вина уд юэ. 12Уго Мон тодӥсько, макем трос тӥляд йыружъёсты, макем секытэсь сьӧлыкъёсты: тӥ шонер улӥсьёсты ултӥяськоды, лушкемен кузьымъёс октӥськоды, судысен куанеръёслэсь ужъёссэс мыдланьтӥськоды. 13Соин ик визьмо мурт та дыре чус улэ, уго та урод-лек дыр. 14Ӟечлыкез утчалэ, уродэз-лекез эн утчалэ, улэп кылемды потэ ке, – соку Саваоф Инмар Кузё-Инмар тӥ пӧлын луоз, кызьы тӥ шуиськоды. 15Уродэз-лекез адӟемпотостэм каре, нош ӟечлыкез – яратэ, капка дорын шонер суд ортчытэ; оло, соку Саваоф Инмар Кузё-Инмар Иосифлэсь кылем люкетсэ жалялоз. 16Соин ик Дунне Кутӥсь Саваоф Инмар Кузё-Инмар тазьы шуэ: вань ульчаосын бӧрдэм куара кылӥськоз, вань сюресъёс вылын кесяськозы: «Каръян лулы, каръян лулы!» Музъем ужасьёсты ӧтёзы бӧрдыны-викышъяны, усточиосты – ӝож гуръёсты кырӟаса бӧрдыны. 17Вань виноград садъёсын бӧрдозы, уго Мон тон пыр потыса кошко, – шуэ Кузё-Инмар 18Куректон-кайгу Кузё-Инмарлэсь нуналзэ возьмасьёслы! Малы кулэ тӥледлы Кузё-Инмарлэн та нуналыз? Со пеймытлык, югытлык ӧвӧл, – 19озьы ик, кызьы кин ке но, левлэсь пегӟыкуз, гондырлэн пумитаз кемдӥз, пе, яке, гуртаз бертыса, борддор бордаз зӥбиськиз но, кый сое лексиз, пе. 20Кузё-Инмарлэн нуналыз тём пеймыт ӧвӧл-а, югыт-а? Со пеймыт, отын пиштонэз-чилянэз ӧвӧл. 21Адӟеме уг поты, кулэтэм карисько праздникъёстэс, огазе люкаськыса шулдыръяськыса улон дыръяды курбон зындэс уг шӧдӥськы. 22Тылын сутӥськись курбонъёс, нянь курбонъёс Мыным вайиды ке, Мон соосты кабыл уг басьты, тау карыса курбонлы сётэм куаем кунянъёсты шоры уг но учкы. 23Кырӟан гуредлэсь куаразэ Мон дорысь палэнты, крезь куарадэ Мон уг кылзы. 24Шонерлык ву кадь мед бызёз, зэмлык шур кадь мед мыноз! 25Израиль выжы, кыр дуннеын ньыльдон ар ӵоже тӥ Мыным курбонъёс, салам няньёс вайиды-а? 26Тӥ Молохлэсь тылыссэ, Ремфан инмардылэсь кизилизэ, асьтэлы шуыса лэсьтэм сульдэръёсты нуллӥды. 27Со понна Мон тӥледыз Дамаск сьӧры улыны келяло, шуэ Кузё-Инмар; Солэн нимыз Саваоф Инмар!

Currently Selected:

Амос 5: УДМБИБ

Highlight

Copy