Гал 3

3 ГЛАВА

1 Закон дӓ Христослан ӹнянӹмӓш. 15 Сӧрӹмӓш дон закон. 19 Малын закон келеш?

1О, ышдымы галатвлӓ, кӱ тӓмдӓм лачокым колыштмаш гӹц карангаш алтален тӓрвӓтен? Сӹнзӓ анзылныда Иисус Христос тӓ донда пыдален сӓкӹмӹ [ганьок] анжыкталтын. 2Тӓ гӹцдӓ тидӹм веле пӓлен нӓлнем: тӓ Йымын Шӱлӹшӹм законым колыштмы доно ма нӓлӹндӓ ӓль колмы уверлӓн ӹнянӹмӹ доно? 3Тӹнӓрок тӓ ынгылыдымы ылыда ма? Шӱлӹш доно тӹнгӓлӹндӓ, а ӹнде кӓп дӓ йӓнг доно пӹтӓредӓ? 4Такеш ма тинӓр шукы тырхендӓ? Уке, такеш агыл, шанем. 5Йымы тӓлӓндӓ Шӱлӹшӹм пуа дӓ тӓ лоштыда цӱдӓвлӓм ӹштӓ. Тидӹм Тӹдӹ законым колыштмыда гишӓн ма ӹштӓ – ӓль колмы уверлӓндӓ ӹнянӹмӹ гишӓн?

6Авраам донат тенгеок лин: «Тӹдӹ Йымылан ӹнянен, седӹндон Йымы тӹдӹм тӧр ӹштӹшеш шотлен».#3:6 Быт 15:6. 7Тенгежӹ пӓлӹдӓ: ӹнянӹшӹвлӓ Авраамын эргӹвлӓжӹ ылыт. 8Пӹтӓри язычник ылшывлӓм Йымылан ӹнянӹмӹштӹ гишӓн Йымы тӧреш лыктеш. Тидӹм Писани анзыцок ужын дӓ Авраамлан, «Тӹнь гачет халыквлӓ цилӓн благословаялтыт»#3:8 Быт 12:3. манын, пуры уверӹм анзыцок шижтӓрен. 9Тенгелӓ, ӹнянӹшӹ Авраам сага ӹнянӹшӹвлӓ благословайымы лит, 10а законым шоктымылан ӹнянӹшӹвлӓ проклятайымы ылыт. А вет сирӹмӹ: «Закон книгӓш сирӹмӹм кӱ соок цилӓ ак ӹштӹ, хоть-кӱӓт проклятайымы лиэш».#3:10 Втор 27:26. 11А закон гач иктӓт Йымы анзылны тӧреш ак лӓк, тидӹ раскыды, вет «тӧр ӹштӹшӹ эдем ӹнянӹмӓшӹжӹ доно ӹлӓш тӹнгӓлеш».#3:11 Авв 2:4. 12Закон ӹнянӹмӓшлӓн ак тӹкӹлӓлт, а «кӱ законын ядмыжым ӹштӓ, тӹдӹм ӹштӹмӹ доно ӹлӓ».#3:12 Лев 18:5. 13Христос мӓмнӓм законын проклятайымыжы гӹц тӱлен нӓлӹн. Тӹдӹ мӓ верцнӓ Ӹшке проклятайымы лин, вет сирӹмӹ: «Пу мӓнгеш сӓкӹмӹ хоть-кӱӓт проклятайымы».#3:13 Втор 21:23. 14Седӹндон Авраамлан пумы благословайымаш язычниквлӓ докы Христос Иисус гач шон кердеш, дӓ ӹнянӹмӓш доно мӓ сӧрӹмӹ Шӱлӹшӹм нӓлӹн кердӹнӓ.

15Шӱмбелвлӓ, кечӹнь лишӹ примерӹм кандем: эдемӹн пингӹдемдӹмӹ завещанижӹм иктӓт шӧрен дӓ тӹшкӹ нимат приваен ак керд. 16А сӧрӹмӓшвлӓм Авраамлан дӓ тӹдӹн вырлыкшылан пумы. Писаништӹ, «вырлыкшывлӓлӓн» манын, шукы гишӓн агыл, а иктӹ гишӓн «тӹньӹн вырлыкетлӓн» манын келесӹмӹ, тидӹ – Христос.#3:16 Быт 12:7, 13:15, 24:7. 17Мӹнь тидӹм келесӹнем: нӹлшӱдӹ кымлы и эртӹмӹкӹ лӓкшӹ закон Христос гишӓн Йымын пӹтӓри пингӹдемдӹмӹ согоньым шӧрен дӓ Йымын сӧрӹмӹжӹн силажым пӹтӓрен ак керд. 18Вет наследствым нӓлмӓш законеш негӹцлӓлтеш гӹнь, тенгежӹ тӹдӹ сӧрӹмӓшеш ак негӹцлӓлт. Но Йымы Авраамлан сӧрӹмӹжӹ семӹньок наследствым подарен.

19А малын законжы келеш? Тӹдӹм, сӧрӹмӓшӹм нӓлшӹ вырлык толмешкӹ, вуйнаматыш пырымы гишӓн варарак лыкмы дӓ лом каштшын#3:19 Лом каштшы – посредник. кидшӹ доно Ангелвлӓ гач пумы. 20Но иктӹ годым лом каштшы ак ли, а Йымы иктӹ.

21Тенгежӹ закон Йымын сӧрӹмӹжӹ ваштареш шалга ма? Уке! Вет ӹлӹмӓшӹм пуэн кердшӹ закон пуалтеш ылгецӹ, тӧреш лӓкмӓш лачокат закон гӹц лиэш ыльы. 22Но мам сӧрӹмӹ, тӹдӹ ӹнянӹшӹвлӓлӓн Иисус Христослан ӹнянӹмӹ доно пуалтшы манын, Писани цилӓм сулыкеш кӓпшӹлтен.

23Ӹнянӹмӓш толмы якте, анзыкылашы ӹнянӹмӓш анжыкталтмешкӹ, закон мӓмнӓм питӹрен кычен дӓ оролен. 24Тенгежӹ, мӓлӓннӓ ӹнянӹмӹ доно тӧреш лӓктӓш манын, закон мӓмнӓм Христос докы виктӓрӹшӹ лин.#3:24 «Закон мӓмнӓм Христос докы виктӓрӹшӹ лин»: греклӓ сирӹмӹм тенгеӓт ынгылаш лиэш: «Христос толмешкӹ, закон мӓмнӓм виктӓрӹшӹ ылын». 25Но ӹнянӹмӓш толмыкы, мӓ ӹнде виктӓрӹшӹн кид лӹвӓлнӹжӹ ана ыл.

26Вет Христос Иисуслан ӹнянӹмӹ гишӓн тӓ цилӓн Йымын эргӹвлӓжӹ ылыда. 27Тӓ цилӓн, Христос доно ушнаш крестӓлтшӹвлӓ, Христос доно вӹдӹлӓлтӹндӓ. 28Иудей ӓль эллин, раб ӓль ирӹкӓн, пӱэргӹ ӓль ӹдӹрӓмӓш ӹнде уке, вет тӓ цилӓнӓт, Иисус Христос доно ушнен, иктӹ ылыда. 29А Христосын ылыда гӹнь, тенгежӹ тӓ Авраамын вырлыкшы дӓ сӧрӹмӹ семӹнь наследник ылыда.

Currently Selected:

Гал 3: УС

Highlight

Copy