Павелонь сёрмац Филимононди 1
1
Шумбракстомась
1Павел, Иисус Христость инкса пякстафсь, и Тимофей кемай ялгась, кучихть пара вал марстонь тевонь тиити, кельгома Филимонти, 2и кемаень пуромксти, кона пуромкшни тонь кудсот, и тяконь лаца Апфияти, кельгома кемай сазороньконди, и Архиппонди, марстонь тевса покодити. 3Арьсетяма тейнть пароказне и сетьмоши Шкай Аляньконь и Иисус Христос Азорть эзда!
Филимононь кемамац и кельгомац
4Мон озондомста фалу сюконян Шкаезти тонь инксот, 5сяс мес кулян тонь кемамацень колга Иисус Азорти и кельгомацень колга Тейнза и сембе Шкаень ломаттненди. 6Мон озондан, катк марстонь кемаманьке лезды тейть сяда крхкаста содамс-шарьхкодемс сембе ся пароть, кона максф тейнек Христос Иисусонь эзда. 7Кемай ялгай, тонь кельгомаце пяк кеняртьфтемань и кемокстамань монь, сяс мес тонь вельдет ваймясть-кемокстасть Шкаень ломаттнень седисна.
Павел эняльди Онисимонь инкса
8Сяс, хуш монь и ули Христость эзда виезе кошардомс тонь тиемс сянь, мезе эряви, 9сяка сяда цебярькс лувса пшкядемс тейть эняльдема мархта, сяс мес келькте тонь. Аф кие лия, монць, сире Павелсь, а тяни нинге Иисус Христосонь инкса пякстафсь, 10эняльдян тейть Онисимонь инкса, кона монь вельден кармась кемама Шкайти, и стане жа арась тейне цёракс тяса, коса мон пякстафан. 11Мзярда-бди сон ульсь тейть лезксонь аф канды ломанькс, но тяни сон арась лезксонь кандыкс#1:11 Онисим лемсь греконь кяльста ётафневи кода «полезный, лезксонь канды». Тяфтама лем вельде, Павел ёрасы няфтемс Филимононди Онисимонь эрявиксшинц. и тейть и тейне. Мон мрдафтса сонь тейть. 12А тон васьфтьк сонь, кода монь седибялькскязень. 13Монь мялезель кирдемс сонь эсь вакссон: тонь вастозт лездоль тейне тяса, коса мон пякстафан Пара кулять пачфнеманкса. 14Но тонь апак кизефтть монь ашель мялезе мезевок тиемс, катк тонь пара тевце ули тиф аф вихца, а эсь мяльцень коряс. 15Шять, пефтома пингс тонь мархтот улеманкса Онисим и аертфоль тонь эздот аф ламос. 16Тяни сон тейть ули аф кода ни уре ломань, а уреть коряс сяда питникс, кода кельгома кемай ялга. Сон тейне пяк кельговикс, а конашкава кельговикс эста сон ули тейть, кода ломань и кода Азорти кемай ялга. 17Эрь ина, кда лувсамак монь марстонь тевонь тии ялгакс, эста васьфтьк Онисимонь стане, кода васьфтелемайть монь. 18Кда сон мезьса-бди обжанзе тонь али шуму ингольдет, лувк тянь монь мельган. 19Мон, Павел, сёрмадан эсь кядьсон: мон пандса. Мон ни аф корхтан сянь колга, конашкава тон шумуват монь инголен, прянек-мезнек шумуват! 20Сяс, кемай ялгай, макск тейне тя лезксть Азорть инкса, Азорть инкса ваймафтк-кемокстак монь седиезень. 21Мон сёрмадан тейть надиязь тонь кулхцондомацень лангс, и содаса, тон тият мянь вельф монь эняльдемазень коряс. 22Сяка пингть аноклак тейне лоткама васта, сяс мес надиян: озондомантень вельде улян казьф тейнть.
Мекольце валхне
23Пара вал пачфтихть тейть Епафрас, кона монь мархтон пякстаф Христос Иисусть инкса, 24тяфта жа монь мархтон марстонь тевонь тиихне – Марк, Аристарх, Димас, Лука.
25Иисус Христос Азороньконь пароказнец улеза тинь ваймопожфонтень мархта! Аминь.
Currently Selected:
Павелонь сёрмац Филимононди 1: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
