Павелонь омбоце сёрмац Тимофеенди 3
3
Мекольдень шинь ломаттне
1Содак, мекольдень шитнень сайхть стака пинкт. 2Ломаттне улихть эсь прянь и ярмаконь кельгихть, эсь прянь шнафтыхть, прянь няихть, ломанень сялдыхть, тядянь-алянь аф кулхцондыхть, цебярень аф мяляфтыхть, ваймосост аф ули иняруши и ломаттненди кельгома. 3Синь аф нолнихть ломаттненди пежет, синь кяльготнихть ломаттнень лангс, мезьсонга аф кирдевихть, синь эсост аш ужяльдема, синь паронь аф кельгихть, 4ялгань мийхть, пряса аф арьсихть, вярьге эсь прянь кепсихть, ламбама и тёждя эряфонь кельгихть, но аф Шкаень кельгихть. 5Няфнемок эсь пряснон Шкайти кемайкс, потмова синь аердайхть кемамать виенц эзда. Ворьготькшнек тяфтапнень эзда! 6Ётксост улихть тяфтапт, конат салава сувсихть кудга и васькафнесазь аватнень, конат вайсихть пеже потмоса и вятневихть эрь кодама визькс мяльса. 7Тяфтама аватне фалу тонафнихть, но коданга аф сатови тейст видешить шарьхкодемац. 8Кода Ианнийсь и Иамврийсь#3:8 Ванк Лисемась (Исход) книгать 7:11. Кой-кона кунардонь евреень азксне корхтайхть тяфта: Египетонь колдутнень ёткста, конат бароцясть Моисеень мархта, кафттне ульсть Ианний и Иамврий. мольсть каршек Моисеенди, стане жа ня васькафни тонафтыхне молихть каршек видешити. Тя ломаттнень ёньцна колаф и Шкайть инголе синь кемамасна аф афкуксонь. 9Но синь аф лама кенерихть тиемс, сяс мес синь ёньфтомашисна панжеви сембонь инголе, кода лиссь и ся кафттнень мархта.
Павел кода кепотькс
10А тон молеть монь мельган тонафтомаса, эрямаса, мяльса-арьсемаса, кемамаса, куватьс кирдемшкаса, кельгомаса, сталмонь кирдемаса, 11панцемасон и маятамасон, конат монь мархтон ульсть Антиохияса, Иконияса и Листраса. Кодама панцемат мон кирдень, и эрть эзда Азорсь монь идемань! 12Виде, сембе, кит ёрайхть эрямс Шкайть мяленц коряс Христос Иисусса, кармайхть панцевома. 13А кяжи ломаттне и васькафнихне кармайхть тиендема сядонга лама кальдявда, васькафнемок лиятнень и эсь пряснонга.
14А тон киртть сянди, мезти тонафтфат и мезти кемат, сяс мес содасак, кит тонь тонафтыхне. 15Тяфта жа тон ни шабакстокиге содасайть иняру Сёрматфкснень, конат маштыхть тиемс тонь смузюкс, и сяс тон Христос Иисусти кемамать вельде кармат идеф. 16Сембе Сёрматфкссь шачф Шкайть Ваймопожфонц вельде и канды лезкс: сон тонафты, няфти аф видексшинь тефнень лангс, путы меки виде кис и касфты видексшиса, 17улеза Шкаень ломанць афсатыксфтома и эрь кодама пара тевонди аноклаф.
Currently Selected:
Павелонь омбоце сёрмац Тимофеенди 3: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
