Павелонь васенце сёрмац Коринфу 2
2
Куля эськотьф Христость колга
1Кемай ялгат, мзярда мон сашендонь тейнть азондомонза Шкаень кулять, мон сашендонь аф кодамовок мазы валонь и смузьшинь няфтема. 2Вдь мон путыне прязон улемс ширесонт мезевок аф содайкс, Иисус Христоста башка – крёзти эськотьф Иисус Христоста башка. 3Мон улень тинь ширесонт лафчашиса, пелемаса и оцю трнатомаса. 4Монь валозе и монь тонафтомазе ульсть аф ломанень смузьшить кемафты валсонза, но Шкаень Ваймопожфть виенц эвондамаса. 5Тяфта, катк тинь кемаманте нежетькшни аф ломанень смузьшить лангс, а Шкаень вийть лангс.
Шкаень смузьши
6Минь азондсаськ смузьшить сятненди, кит кенерсть тянди, но тя аф масторлангонь смузьши и аф тя масторлангонь азорхнень смузьшисна, конатнень шисна ни лувфт. 7Аф, минь азондсаськ Шкаень смузьшить, салаваннеть, кяшфть; ся смузьшить, конань Шкайсь ладязе тейнек иневалдокс менельхнень-масторхнень тиемда инголе. 8Тя масторлангонь азорхнень эзда кивок ашезе сода-шарьхкоде тя смузьшить, афток афолезь эськоде крёз лангс иневалдонь Азорть. 9Кода азф Сёрматфксса:
«Сельмось сянь ашезе няе,
и пилесь ашезе куле,
и ашезь сашенда ломанть пряс ся,
мезе Шкайсь аноклась Эсь кельгиензонды»#2:9 Исаия 64:4.
10А тейнек Шкайсь тянь панжезе Эсь Ваймопожфонц вельде, сяс мес Ваймопожфсь ванцы и тонафнесы семботь, нльне Шкайть салавашинцка-крхкашинцка.
11Кие ломаттнень эзда содасы мезе ломанть эса, ломанть сонцень ваймопожфтонза башка, конай эряй эсонза? Тяфта Шкаеннетьке колга кивок аф содай, Шкайть Ваймопожфтонза башка. 12Но тейнек максфоль аф тя масторлангть ваймопожфоц, а Шкайть Ваймопожфоц сянь шарьхкодеманкса, мезьса Сон минь каземазь. 13И минь тянь азондсаськ аф стама валса, конатненди тонафтомазь ломанень смузьшись, а валса, конатненди тонафтомазь Ваймопожфсь. Сясы ваймопожфонь тефнень панчсесаськ ломаттненди Ваймопожфть вельде. 14Но кинь эса аш Ваймопожфсь, сянь аш виец сявомс сянь, мезе максови Шкаень Ваймопожфть эзда. Тяфтама ломанти ся ёньфтомаши: тейнза аф шарьхкодеви ся, мезть колга эряви судендамс аньцек Ваймопожфть вельде. 15А вага ломанць, конань эса ули Ваймопожфсь, машты судендамс семботь колга, но сонцень колганза кивок аф судендави. 16Сёрматфксса азф:
«Кие содазе-шарьхкодезе Азорть ёненц,
кинь ули виец путомс Сонь ёньц?»#2:16 Исаия 40:13
А минь ёненьке Христосонне.
Currently Selected:
Павелонь васенце сёрмац Коринфу 2: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
