Iironga 24
24
ONTOPORUA 24.
Paulus ta purua komureri Feliks
1Omasiku gatano, sho ga piti, omupristeri omukuruntu Ananias naakuruntu jamue, nomupopiri guauo Tertulus oje ja, ja cikama motshipara tshomureri guotshirongo ng’aahumaneki ja Paulus.
2Nde Paulus, sho a hicanua ko, Tertulus okua shimbike etamaneko rje a ti: “Moru’ongueje sse tu ri mombiri ohindji, nomeere gohe ga pukurura otshindji.
3Shoka otue tshi dimburura arushe napeshe, sse tua pandura Feliks, nakusimanekua!
4Ndere katu pijaganeke orure, ss’atu ku garikana u tu puakene mondjeerera hohe okacimbo okatshona kouara.
5Omurumentu nguno#24:5 Okutja omuapostoli Paulus. sse otue mu dimburua#24:5 Ongashi omuvu omunamburua ta pe orundji uuvu ue jakuauo, otsho tuu Paulus ta pukica aantu ojendji nuuhineji ue, anuua. omupijaganeki mokati kaajuda jomuujuni aushe, omutse guotshimpaga otshineji tshaanatsareni.#24:5 Otsho aajuda oja ruka tango aakriste.
6Okua erekere okunjateka otempeli. Sse tue mu kuata tu mu geere kompango hetu.
7Ndere Lisias omukuruntu guaakuiita okue ja ko, te mu kuca neenkondo odindji momake getu.
8A rombuera aahumaneki je, nokutja je nokuja kungueje. Ngueje muene oto vuru okutshiua tshiri iinima ajishe mbjoka atu mu umanekere, nge to mu purapura.”
9Otsho aajuda jakuauo ja popi, je mu rombuera nokutja otsho tsha tja ngaa.
10Ndere Paulus okua jamukura, ngija omureri guotshirongo e mu anda a popje: “Shoka onde tshi tshiua naua nokutja ngueje omupanguri guotshiguana shika eemvo odindji, ngaje nda ara nd’ipopire nehinekero.
11Oto vuru okutshiua naua nokutja omasiku omurongo na gaari ike ga piti, hera nde ja ku Jerusalem, ndi garikane.
12Jo inaa hadandje motempeli nd’umana nenge nda vundakanica aantu mosinagoga.
13Nenge motshirando. Otsho oja njengua oku tshi ku tompera sho j’umanekerandje nena.
14Ndere shoka andi tshi ku epururire nokutja otandi karere Karunga kootate handje kerongo ndi tari rukua ku jo erongo rjiirombo, nokutja nd’iteere atshishe sho tsha tshangua mompango no maaprofeti.
15Otsho ngaje ndi netegerero mu Karunga, nokutja oku nejumuko rjaajuki no rjaarunde, ndi jojene je na uo.
16Ano nduno ngaje nda kembadara ndi kare arushe nomutima kagu nokapogodidi motshipara tsha Karunga no tshaantu.
17Eemvo odindji sho da piti nokuri, ngaje onde ja ndi etere jaandjetu iikuaca, ngaje ndi gandje omagano, ndi gane omaganeno.
18Piironga mbika jo oja monandje motempeli, sho nd’icetica, ndere kapua ri epijagano rjaantu nenge ombujo.
19Tshiri okua ri aajuda jamue, ja zi ku Asia. Jo oja fere ja cikame uo motshipara tshohe mpee, j’umanekendje, nge oje na tsha kungaje.
20Nenge mboka je ri mpoka naa tje ngaa, oja monene mungaje ejonaguro rja tshee ngija nda cikama motshigongi tshaakuruntu.
21Shira ohapu ndjija himuike nd’igidire, sho kua nda cikama mokati kauo: ‘Omoru’ejumuko rjaasi ngaje tandi ka pangurua nena kune.”
22Feliks ngu a tshiua naua omarongo ngaka, okue ja rareka manka a ti: “Omukuruntu guaakuiita Lisias, nge te ja, opo tandi puakene eehapu deni ng’omupanguri.”
23Okua rombuera ondjai, hi mu rangere nomarangero kage nuudigu. Jakuauo kaa hindikirue oku mu jakura.
24Okuza mpo omasiku gamue, Feliks okue ja nomukiintu gue Drusilla, ngu a ri omujuda. A hicanene Paulus, nde te mu puakene keehapu dehiteero rjokuiteera Jesus Kristus.
25Nde sho a popi uujuki nuushekesheke nepanguro rjokomesho, Feliks okua kekama a ti: “Inda manka, andi ku icana pecimbo ndi tari k’oparerandje.”
26Ndere okua diradira uo nokutja Paulus te mu pe iimariva. Otsho he e mu icana orundji, ta popi na he.#24:26 Omureri guotshirongo okua ara Paulus e mu pe iimariva, opo he e mu mangurure.
27Eemvo mbari sho da piti. Feliks okua randurua ku Portius Festus. Ongashi Feliks sho a hara okuoparera aajuda, okua cigi mo Paulus meemango de.
Omission Heklesia Ekatolika, 1951. Namibian Catholic Bishops Conference.