खबरदुत 8
8
सावलइ बिस्वासिलमकाय सतावो
1मान्तालमइ स्तिफनसकाय बाङइ आप्ति सातो कुराहाङ सावलकोमा सहमति खेतो। ओउ दिनहाङसय यरुसलेमहाङ मुओ मन्दलिकाय ताह्ङो दुख र सतावत सुरु स्यावा। मुख्य चेलालमबाहेक अरु जुदा बिस्वासिलम यहुदिया र सामरियाको वरिपरि छरपस्त स्यावाकाय।
2स्तिफनस सिआपछि, परमेस्वरको भक्ति जाह्ङो केहि मान्तालमइ स्तिफनसको म्हाङकाय पाह्माकानि, र ओउको लागि र्याति सोक जाह्ङाकानि। 3तर सावलइखे जुदा थाउहाङ आल्ति मन्दलिकाय म्हेत्ताक्सा फाःङाकान। ओउइ किम-किमहाङ पोक्धय बिस्वासि गोय्चो-मोम्चोलमकाय ह्रयुत्ति आःल्धय झेलकनहाङ कुङुतो।
फिलिपइ सामरियाहाङ प्रचार जाह्ङो
4ओउ वरिपरि छरपस्त स्यावो बिस्वासिलमइ लयमय दाहो जुदा छेत्रहाङ येसुको पेओ खबर प्रचार जाह्ङाकानि। 5फिलिप सामरियाको यातज्यो सहरहाङ आला र मान्तालमकाय ख्रिस्तको बारेहाङ प्रचार जाह्ङाकान। 6जब मान्तालमको हुलइ फिलिपको कुरा सायाकानि र ओउइ जाह्ङो ग्याह्ङ्सिओ कामको चिनोलम च्यवाकानि, अनि ओउमयइ ओउको कुराकाय माहा जोक्तो घिःति सायाकानि। 7धइतिदाह्य्सा नाःतो मान्तालमकसय असुद्ध ग्वालामलम हिह्ति ग्ल्युह्ङ्ति पाह्याकाय, र कुइच्या रोगइ ङाःयोलम र खोन्द्यालममा नाःतोले स्याकाकाय। 8ओउतझ्यान्ते ओउ सहरको मान्तालम आन आसति चोङायाकाय।
9ओउ सहरहाङ यातचाक सिमोन त मय्ङ्ओ मान्ता याक्तो। ओउइ नाःतो बर्सहाङसयले चतक छ्यानो काम जाह्ङ्धय वाङो खेतो, र ओउको चतक च्यउति सामरियाको जुदा मान्तालम ग्याह्ङितो। ओउइ “ङा ताह्ङो मान्ता खेनाङ” त दाह्य्ति ङाःसतो। 10ओउ सहरको साधरन र महत्वको जुदा मान्तालमइले “इ मान्ताखे परमेस्वरको महान् जिःङ खेना” त दाह्य्ति नोःइतो। 11ओउमयइ सिमोनको कुराकाय घिःति साइनितो, धइतिदाह्य्सा नाःतो समयहाङसयले ओउइ चतक छ्यान्ति ओउमयकाय ग्याह्ङ्ताकुतो। 12तर जब ओउमयइ फिलिपइ परमेस्वरको राज्यको पेओ खबर र येसु ख्रिस्तको बारेहाङ तोओ कुराहाङ बिस्वास जाह्ङाकानि, ओउमय गोय्चो-मोम्चो जुदाइले बप्तिस्मा लेःआकानि। 13अनि सिमोन लयइमा बिस्वास जाह्ङाकान र बप्तिस्मामा लेःआकान। फिलिप गाहाङले आल्याकायमा सिमोनमा ओउकाय गुह्ल्तिले आल्तो, र फिलिपइ जाह्ङो ग्याह्ङ्सिओ काम र चिनोलम च्यउति ओउ आन ग्याह्ङ्तो।
14जब सामरियाको मान्तालमइ परमेस्वरको स्यानराय सुइकार जाह्ङाकानि त दाह्यो कुरा यरुसलेमहाङ मुओ मुख्य चेलालमइ सायाकानि, ओउमयइ पत्रुस र युहन्नाकाय ओउमयकहाङ ल्होकाकानि। 15ओउनिस ओउमयकहाङ दाहापछि, ओउ नया बिस्वासिलमइ पबित्र ग्वालाम दोःपनय त दाह्य्ति प्राथना जाह्ङाकाचु। 16धइतिदाह्य्सा ओउच्युक बेलासम्मले ओउमयकहाङ पबित्र ग्वालाम वाङ्सास्यावो नाःआक्ल। ओउमयइ प्रभु येसुको मय्ङहाङ मात्र बप्तिस्मा लेःओ खेइतो। 17अनि पत्रुस र युहन्नाइ बिस्वासिलमको तालाङहाङ क्रुत झामाकाचु, र ओउमय पबित्र ग्वालाम दोःआकाय।
18ओउ मुख्य चेलानिसइ बिस्वासिलमको तालाङहाङ क्रुत झाम्धार्ना ओउमयइ पबित्र ग्वालाम दोःओ कुरा सिमोनइ च्यवाकान। ओउतझ्यान्ते ओउइ ओउ जिःङ दोःसाको लागि पत्रुस र युहन्नाकाय थेपो बइसा कुरा जाह्ङाकान। 19ओउ दाह्या, “ङाकायमा एतताह्ङो जिःङ बइसास्याउपाना, धइतिदाह्य्सा सु-सुकाय ङाइ क्रुत झाम्नाङ, ओउमयइमा पबित्र ग्वालाम दोःसा खाइपानानि।”
20तर पत्रुसइ ओउकाय जवाफ बयाथय, “नाङको थेपो नाङकुसले म्हेत्पाना, धइतिदाह्य्सा परमेस्वरको बरदानकाय थेपोइ लेःसा खाइना त नाङ म्हर्तेआ। 21इ सेवाको कामहाङ नाङको दोह भाकमा स्याउल, धइतिदाह्य्सा परमेस्वरको नजरहाङ नाङको ल्हुङतुक पेतो नाःल। 22ओउतझ्यान्ते नाङको इ दुस्त बिचारकाय पस्ताप जाह्ङ्ति प्रभुकुस प्राथना जाह्ङु, सायद प्रभुइ नाङको ल्हुङतुकको दुस्त बिचारकाय छेमा बइसास्याउना। 23धइतिदाह्य्सा ङाइ चिःनाङ, नाङ चोःरो ल्हुङतुकइ ब्लिङो र पापको बन्धनहाङ परओ मुतेना।”
24अनि सिमोन त्याङा, “निङ्जिइ तोसास्यावो दोह कुरामा ङाकहाङ ताप्जेलाम त दाह्य्ति निङ्जिइले ङाको लागि प्राथना जाह्ङ्ति बइसास्याउपाना।”
25ओहाङसयको पत्रुस र युहन्नाइ प्रभु येसुको बारेहाङ मान्तालमकाय लयनिसइ च्यवो कुरालमको प्रचार जाह्ङ्ति र तोति भ्याआपछि, ओउनिस यरुसलेमताङ द्याह्न्ति पाह्याकाच। ओउनिस पाह्य्तोकहाङ ल्यामहाङ परओ सामरियाको नाःतो गाउलमहाङमा परमेस्वरको पेओ खबर प्रचार जाह्ङाकाचु।
फिलिपइ इथियोपियाको यातचाक हाकिमिकाय प्रचार जाह्ङो
26ओहाङसयको प्रभुको यातचाक लाङकादुतइ फिलिपकाय तोआथय, “तयार स्याव, र दखिनताङ आल्ति यरुसलेमसय गाजा सहरताङ आलो ल्यामहाङ आल, ओउ ल्यामखे सुमा याक्मालो थाउ स्याउति आल्ना।” 27ओउतझ्यान्ते फिलिप तयार स्याउति आला। ओउइ ल्यामहाङ इथियोपियाको यातचाक नपुङ्सककाय क्रुसाकान, र ओउखे इथियोपिया देसको रानिको#८:२७ इथियोपिया देसको रानि ओउतोक बेलाहाङ इथियोपिया देसको रानिकाय कन्दाकि त दाह्य्ति तोओ उपाधि बयो चलन खेतो। थेपो गमो ताह्ङो हाकिमि खेतो। ओउ हाकिमि यरुसलेम आल्ति परमेस्वरको आराधना जाह्ङाक्तिको किम द्याह्न्धय खेतो। 28र ओउ रथहाङ च्युःङाक्तिको यसय्या अगमबक्ताको किताप पह्रधयमुओ खेतो। 29पबित्र ग्वालामइ फिलिपकाय तोसास्यावा, “ओउ रथको द्याङ्तो आल्ति ओउको छेउसय वाह।”
30अनि फिलिप ओउको द्याङ्तो तन्ति आला, र ओउ हाकिमिइ यसय्या अगमबक्ताको कितापसय पह्रतिमुओ फिलिपइ सायाकान, र ओउइ ह्वताकान, “दोह नाङइ लय पह्रधयमुओ कुराको माने चिःसास्यावो मुना?”
31ओउ हाकिमि त्याङा, “सुइमा तोमातो गतहाइति ङाइ इको माने चिःसा खाइचाङ र?” अनि ओउइ फिलिपकाय रथहाङ लह्न्ति लयकुस ब्रक्त च्युःङ्साकाय बिन्ति जाह्ङाथय। 32ओउइ पह्रधयमुओ धर्मसास्त्रको भाकखे एत खेतो—
“ओउखे सात्साको लागि लात्तिआःलो भेदा लेखा खेतो।
र ओउ लयको मेःन खुर्धार्ना ङइमामात मुओ भेदाको पाथो लेखा,
ओउइ लयको म्होतोङसय दोह कुरामा नोःलेल।
33मान्तालमइ ओउकाय अपमान जाह्ङाथय, र स्याताहा गाल बइति दोसि जाह्ङाथय।
ओउको सन्तानलमको बारेहाङ सुइमा तोसा खाइलेनिलि,
धइतिदाह्य्सा मान्तालमइ इ ल्हाउदयबाङहाङले ओउकाय सात्ति वायाथय।”#यस ५३:७-८
34ओउ हाकिमिइ फिलिपकाय ह्वताथय, “ङाकाय तोति बइसास्याउपा, ओउ यसय्या अगमबक्ताइ इ कुरा लयको बारेहाङ तोओ या अरु कुनयको बारेहाङ तोओ खेना?” 35अनि फिलिपइ धर्मसास्त्रको ओउ भाकसयले सुरु जाह्ङ्ति ओउकाय येसुको बारेहाङ पेओ खबर तोआकान। 36रथहाङ लह्न्ति आल्धयमुतोकहाङ ओउनिस केहि तिः नाःओ थाउहाङ दाहाकाच। ओउ हाकिमिइ फिलिपकाय तोआथय, “योसास्याउपा, इहाङ केहि तिः मुना। द्याह ङाकाय बप्तिस्मा लेःसासय दोहइ रोकसा खाइनाताङ र?”
37[फिलिपइ तोआकान, “यदि नाङइ लयको जुदा ल्हुङतुकसयले बिस्वास जाह्ङ्सास्याउना त खेया, नाङइ बप्तिस्मा लेःसा खाइतेनउ।”
ओउ हाकिमि त्याङा, “येसु ख्रिस्तले परमेस्वरको चोः खेसास्याउना त दाह्य्ति ङाइ बिस्वास जाह्ङ्नाङ।”]#८:३७ नया नेम ङ्हापाय ग्रिक भासाहाङ लेखओ खेना र ओउबेलाहाङ मान्तालमइ जुदा कितापलम क्रुतइ लेखति तयार जाह्ङ्नितो। मान्तालमइ क्रुतइ लेखओ ङ्हाको कुनय-कुनय कितापलमहाङखे ओउ ताह्ङो कोस्थभित्र मुओ कुरालम लेखओ नाःल।
38ओहाङसयको हाकिमिइ रथ चलावोकाय रथ न्यास्ताक्सा आग्या जाह्ङाकान। अनि फिलिप र हाकिमि निसचाकमा तिःताङ आलाकाच, र फिलिपइ ओउकाय बप्तिस्मा बयाकान। 39जब ओउनिस तिःसय बाहिर ग्ल्युह्ङ्ति वाङाकाच, प्रभुको ग्वालामइ फिलिपकाय लात्ति आःलाथय, र ओउइ फिलिपकाय फेरि च्यउसा खायुलु। तर खेयाकायमा ओउ हाकिमि आन चोङाइति लयको ल्याम पाह्या। 40लोन्हे फिलिप अस्दोद सहरहाङ थालाङ ज्याला। ओउ कयसरिया सहरताङ आल्तोकहाङ ल्यामहाङ परओ जुदा सहरको मान्तालमकाय येसुको बारेहाङ पेओ खबर प्रचार जाह्ङाकान।
Currently Selected:
खबरदुत 8: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.