खबरदुत 26
26
पावलइ राजा अग्रिपासको ङ्हा लयको हक लेःति नोःओ
1राजा अग्रिपासइ पावलकाय तोआथय, “नाङकाय लयको हक लेःति नोःसाकाय अनुमति मुना।”
अनि पावलइ लयको क्रुत च्युनाक्तिको एतदाह्य्ति नोःसा फाःङाकान— 2“अ राजा अग्रिपास, ङाको लयको यहुदि मान्तालमइले ङाकाय गाल बयो जुदा कुराको बारेहाङ नाङको ङ्हा लयको हक लेःति नोःसा दोःधार्ना ङा माहा जोक्तो आसओ मुनाङ। 3यहुदिलमको जुदा रितिथिति र बिबादलमको बारेहाङ नाङइ पेतोकुस चिःओझ्यान्ते, ङाको बयान ध्यान बइति साइसास्याउपाना त दाह्य्ति ङा नाङकाय बिन्ति जाह्ङ्सा चाहनाङ।
4ङाइ लयको जुदा रुवाङ ङ्हा लय नाःओ थाउहाङ अनि लोन्हे यरुसलेमहाङ गतहाइति हुतालाङ त दाह्यो कुरा जुदा यहुदिलमइ चिःओले मुनय। 5ओउमयइ ङाको बारेहाङ नाःतो बर्सहाङसयले चिःओ मुनय। यदि ओउमय चाहनय त खेया, ङा फरिसि समुहको सदस्य खेङतो त दाह्यो कुरा नाङकाय तोसा खाइतेना, र अरु धार्मिक समुहलमसय फरिसिलमइखे निको रितिथितिको नेम-कानुन माहा पेतोकुसि पालन जाह्ङ्नानि। 6र देङेखे परमेस्वरइ निको पुर्खालमकुस बाचा जाह्ङ्सास्यावो कुराहाङ ङाइ आसा-भरोसा गमोझ्यान्ते ङाको इहाङ जाच स्याउधय मुना। 7निको बाह्र बङ्सलमइ परमेस्वरइ बाचा जाह्ङ्सास्यावो आसिकको लागि दिन-याह्दिङ त मा दाह्य्मात म्रोतिले परमेस्वरको सेवा जाह्ङाकानि। अ राजा अग्रिपास, इ आसा-भरोसाको कारनइले निको केहि पाको अगुवालमइ ङाकाय गाल बयो खेनय। 8परमेस्वरइ सिओसय फेरि उह्ति च्योक्ताक्सास्याउना त दाह्यो कुराहाङ बिस्वास जाह्ङ्सा निङमध्ये केहिखे धइति असम्भब ताःतेनय?
9खेसापाय नासरतको येसुको बारेहाङ खाइच्युकसम्म जोक्तोले बिरोत जाह्ङ्सा परना त दाह्य्ति ङा लयले म्हरो खेङतो। 10ङाइ बिरोतको काम यरुसलेमसय सुरु जाह्ङालाङ। ङाइ मुख्य पुजारिलमकसय अधिकार दोःति प्रभुहाङ बिस्वास जाह्ङो नाःतो मान्तालमकाय झेलकनहाङ काआलाङ, र ओउमयकाय सात्तोक बेलाहाङ ङाइमा ओउमयको बिरोतहाङ सहमत जाह्ङालाङ। 11सभाकिमलमहाङ आल्ति नाःतो पल्त ङाइ ओउमयकाय सजाय बयालाङ, र ओउमयइ जाह्ङो बिस्वासकाय इन्कार जाह्ङ्ताक्सामा कोसिस जाह्ङालाङ। ङा माहा जोक्तो रिस वाङोझ्यान्ते अरु देसको सहरलमहाङमा आल्ति ओउमयकाय सतावालाङ।
12यात दिन ङा एतताह्ङो योजना अनुसार मुख्य पुजारिलमको अधिकार र आग्या दोःति दमस्कस सहरताङ आल्धय खेङतो। 13अ राजा अग्रिपास, ओउ दिन हिदिङको बेला ल्यामहाङ आल्धयमुतोकहाङ, ङाइ यातज्यो ज्योति लाङकासय वाङो च्यवालाङ। ओउ ज्योतिखे ङा र ङाको होयालमकहाङ न्यामको थोङोसयमा माहा जोक्तो प्लिह्ङा। 14नि जुदा साःहाङ तोनालाङ्सु, र आर्मेइक भासाहाङ ङाकाय एतदाह्य्ति तोधयमुओ ङाइ यातज्यो हाउनय सायालाङ, ‘सावल, सावल, नाङ ङाकाय धइति ते सताउधय मुतेना? योउ, नाङइ ङाको बिरोत जाह्ङ्ति लयकायले दुख बइधय मुतेना।’
15ङाइ ह्वतालाङ, ‘प्रभु, नाङ सु खेसास्याउना र?’
अनि प्रभुइ जवाफ बयाताङ, ‘ङा नाङइ सतावो येसु खेनाङ। 16द्याह नाङ चिङ, धइतिदाह्य्सा नाङकाय ङाको सेवक र साछि जाह्ङ्साको लागि ङा नाङकहाङ थाओ खेनाङ। तेन नाङइ ङाको बारेहाङ च्यवो र लोन्हे ङाइ नाङकाय छ्यान्साखेओ कुरालम नाङइ अरु मान्तालमकाय तोसा परतेना। 17ङाइ नाङकाय नाङको यहुदिलम र अरु जातिको मान्तालमकसय दल्ताक्नेनाङ। ङाइ नाङकाय ओउमयकहाङले ल्होक्नेनाङ, 18र नाङइ ओउमयको मिक फोल्ताक्ति ओउमयकाय च्याकोसय थोङोताङ र सय्तानको जिःङसय परमेस्वरकताङ द्याःन्सा परतेना। ओउत स्याउधार्ना ङाकहाङ जाह्ङो बिस्वास दुवारा सुद्ध स्यावो ओउमयइ लयमयको पापको छेमा र परमेस्वरको छ्युह्ङो मान्तालमको थाउ ओउमयइ दोःलेनय।’#खबर ९:३-८
19ओउतझ्यान्ते, अ राजा अग्रिपास, ङाइ लाङकासय दोःओ ओउ दर्सनको आग्या पालन जाह्ङो खेनाङ। 20ङ्हाखे ङाइ दमस्कसको मान्तालमकाय, अनि यरुसलेम र जुदा यहुदियाभरिको मान्तालमकाय प्रचार जाह्ङालाङ। ओहाङसयको लोन्हे, अरु जातिको मान्तालमकहाङ आलाक्तिको लयको पापको पस्ताप जाह्ङ्ति परमेस्वरकताङ द्याह्न्न, र लयइ जाह्ङो पेओ कामलम दुवारा लय परिवर्तन स्यावोको प्रमान बइनु त दाह्य्ति तोआलाङ। 21इ कारनलमइ जाह्ङ्धार्ना केहि यहुदिलमइ ङाकाय मन्दिरहाङ पक्रआताङ्स, र सात्सा बोःङाताङ्स। 22तर तेनको दिनसम्म परमेस्वरइ ङाकाय सहयोग जाह्ङ्सास्यावो मुना, ओउतझ्यान्ते ङाइ मयो अथबा ताह्ङो महत्वको मान्तालमकायमा लयको गभाइ बइसा खाइनाङ। ङाइ ओउमयकाय अगमबक्तालम र मोसाइ स्याउलाङ वाङ्साखेओको बारेहाङ तोओ कुरालम मात्र तोओ खेनाङ। 23ओउमयइखे ‘ख्रिस्तइ दुख दोःति सिसाले परना, र निको यहुदिलमको लागि र अरु जातिको मान्तालमको लागिमा मुक्तिको थोङो घोसना जाह्ङ्साकाय ओउखे जुदासय ङ्हा सिओसय उह्ति च्योको स्याउसा परना’ त दाह्य्ति तोओ खेइतो।”
24पावलइ लयको हक लेःति इ तरिकासय नोःओझ्यान्ते फेस्तसइ ओउकाय हिह्ति तोआथय, “पावल, द्याह नाङ ब्रतेआ। नाङको नाःतो ग्यानइ नाङकाय ब्रताक्तेआ।”
25तर पावल त्याङा, “माननिय फेस्तस, ङा ब्रओ नाःङल। ङाइ तोओ कुराखे सोचसा ज्योओ सत्य कुराले खेना। 26राजा अग्रिपासइ इ जुदा कुरालम चिःसास्यावो मुना, ओउतझ्यान्ते ङा साहसकुसि नोःधय मुनाङ। ङा नोःधयमुओ जुदा कुरालम राजाइ चिःसास्यावो मुना त दाह्यो कुराहाङ ङा पक्का मुनाङ, धइतिदाह्य्सा इ जुदा कुरालमखे कुनय यातज्यो थाउको कुनाहाङ मात्र स्यावो खेल।”
27ओहाङसयको पावलइ राजा अग्रिपासकाय तोआकान, “अ राजा अग्रिपास, दोह नाङइ अगमबक्तालमकाय बिस्वास जाह्ङ्सास्याउना या? ङाइ चिःनाङ, नाङइ बिस्वास जाह्ङ्सास्याउना।”
28अनि राजा अग्रिपासइ पावलकाय तोआथय, “दोह इच्युक मइतो समयहाङले नाङइ ङाकाय ख्रिस्तियान जाह्ङ्सा खाइनेनाङ त म्हर्तेना?”
29पावलइ जवाफ बयाकान, “मइतो समयहाङ खेयामा नाःतो समयहाङ खेयामा, नाङ र इहाङ ङाको कुरा सायो जुदा मान्तालम, ङा लेखाले मुक्ति दोःतेपनय त दाह्य्ति ङाइ परमेस्वरकुसि प्राथना जाह्ङ्नाङ। तर निङ सु खेयाकायमा ङा लेखाले साङ्लाको बन्धनहाङ परओ ङा चाहङल।”
30ओहाङसयको राजा अग्रिपास, ताह्ङो हाकिमि फेस्तस, राजाको हउद्याङ बर्निकि र ओहाङ मुओ जुदा मान्तालम चिङाकाय। 31तर ओउमय ओहाङसय ग्ल्युह्ङ्ति पाह्यापछि, “इ मान्ताइपाय सिसासम्मको र झेलकनहाङ मुसासम्मको दोह पेमातो गल्तिमा जाह्ङो नाःलेल” त दाह्य्ति ओउमय दाह्याकाय।
32अनि राजा अग्रिपासइ फेस्तसकाय तोआकान, “यदि इ मान्ताइ लयको मुद्दा छिनोफानो जाह्ङ्ति बइसाको लागि माहाराजाकाय बिन्ति जाह्ङ्मालो खेयापाय, इकाय फेति ल्होक्यामा स्याउचा खेतो।”
Currently Selected:
खबरदुत 26: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.