खबरदुत 25
25
पावल फेस्तसको ङ्हा
1फेस्तस ताह्ङो हाकिमि स्याउति कयसरियाहाङ वाङोको सुम दिन लोन्हे, ओहाङसय ओउ यरुसलेमताङ आला। 2ओहाङ मुख्य पुजारिलम र केहि पाको अगुवालमइ लयमयइ पावलको बिरोतहाङ काओ मुद्दाको बारेहाङ ओउकाय तोआथय। 3ओउमयइ पावलकाय ल्यामहाङले आक्रमन जाह्ङ्ति सात्सा जालसाजि जाह्ङोझ्यान्ते पावलकाय यरुसलेमताङ ल्होक्ति बइसास्याउपा त दाह्य्ति फेस्तसकाय बिन्ति जाह्ङाकानि। 4तर फेस्तसइ तोआकान, “पावलकायपाय कयसरियाको झेलकनहाङ कुङ्तिगमो मुना, र ङामा रेह्न्तोले ओताङ आल्धय मुनाङ। 5ओउतझ्यान्ते निङ मध्येको केहि अगुवालम ङाकुसले कयसरियाताङ आलि, र यदि पावलइ केहि गल्ति काम जाह्ङो मुना त खेयाकाय निङइ ओउकाय गाल बइसा खाइतेनानि।”
6यरुसलेमहाङ मुओ लगभग आथ-दस दिन लोन्हे फेस्तस कयसरियाताङ द्याह्ना, र स्याह्ङ्लो पल्त ओउइ न्याय जाह्ङो अदालतहाङ च्युःङाक्तिको पावलकाय अदालतभित्र वान्सा आग्या जाह्ङाकान। 7जब पावल भित्र पोक्तिवाङा, यरुसलेमसय वाङो पाको अगुवालम ओउको वरिपरि चिङाकाय र ओउको बिरोतहाङ माहा पेमातो गाल बयाकानि। तर लयमयइ बयो गालको दोह प्रमानमा ओउमयइ बइसा खाइनिलि। 8तर पावलइ लयको हक लेःति एत दाह्या, “ङाइ यहुदि नेम-कानुनको बिरोतहाङ, मन्दिरको बिरोतहाङ, र रोमि माहाराजाको बिरोतहाङ दोह गल्तिमा जाह्ङो नाःङल।”
9तर फेस्तसइ यहुदिलमकाय आसताक्साको लागि पावलकाय एतदाह्य्ति ह्वताकान, “दोह नाङ यरुसलेम आल्ति ओहाङले ङाको ङ्हा नाङको मुद्दाको न्याय स्याउपाना त म्हर्तेना?”
10पावल त्याङा, “अह, ङा रोमि माहाराजाको न्याय जाह्ङो अदालतको ङ्हा चिङ्ति मुनाङ, इहाङले ङाको मुद्दाको न्याय स्याउसा परना। नाङइमा चिःओले मुना, ङाइ यहुदिलमको बिरोतहाङ दोह गल्तिमा जाह्ङो नाःङल। 11यदि ङाइ सिसासम्मको सजाय दोःसा कुनय अपराध जाह्ङालाङ त खेया, ङाइ सिसाकाय इन्कार जाह्ङ्ङल। तर यदि यहुदिलमइ ङाकाय गाल बयो कुराहाङ दोह सत्यतामा नाःल त खेया, सुइमा ङाकाय इमयकहाङ सुम्पसा खाइताङ्सल। द्याह ङाइ ङाको मुद्दा छिनोफानो जाह्ङ्ति बइसाको लागि माहाराजाकायले बिन्ति जाह्ङ्नाङ।”
12अनि फेस्तसइ इ बिसयहाङ लयको सल्लाहकारलमकुस कुरा जाह्ङाक्तिको पावलकाय तोआकान, “नाङइ लयको मुद्दा छिनोफानो जाह्ङ्ति बइसाको लागि रोमि माहाराजाकाय बिन्ति जाह्ङोझ्यान्ते, नाङ माहाराजाकहाङले आल्सा खाइतेनउ।”
राजा अग्रिपास र बर्निकिको ङ्हा पावल नोःओ
13केहि दिन लोन्हे राजा अग्रिपास#२५:१३ राजा अग्रिपास इ राजा अग्रिपासखे १२ अध्यायको राजा हेरोद अग्रिपासको चोः खेना। र इकाय हेरोद अग्रिपास निसम् त दाह्य्तिमा चिःना। बर्निकि त मय्ङ्ओ लयको हउद्याङकाय लाताक्तिको ताह्ङो हाकिमि फेस्तसकाय स्वागत जाह्ङ्लाङ कयसरियाहाङ दाह्तिवाङा। 14ओउनिस ओहाङ मुओ केहि दिन लोन्हे, फेस्तसइ पावलको मुद्दाको बारेहाङ राजाकाय एतदाह्य्ति तोआकान, “फेलिक्सइ यातचाक मान्ताकाय झेलकनहाङ काति गमो मुना। 15जब ङा यरुसलेमहाङ आलालाङ, मुख्य पुजारिलम र पाको अगुवालमइ पावलको बिरोतहाङ मुद्दा काआकानि, र ओउकाय दन्द बइसाको लागि ङाकाय बिन्ति जाह्ङाताङ्स। 16तर ङाइ ओउमयकाय ‘नि रोमिलमको रितिथिति अनुसार, गाल दोःओ र गाल बयो मान्तालमकाय क्रुस्काइताक्मातो र गाल दोःओ मान्ताकाय लयको हक लेःति नोःताक्मातो, सु मान्ताकायमा दन्द बयो चलन नाःल’ त दाह्य्ति तोआलाङ। 17जब ओउमय इहाङ वाङाकाय, ङाइ समय खेरो वाइमात स्याह्ङ्लो पल्तले न्याय जाह्ङो अदालतहाङ च्युःङाक्तिको गाल दोःओ मान्ताकाय भित्र लात्ति वान्साको लागि आग्या जाह्ङालाङ। 18तर जब पावलकाय गाल बइसाको लागि ओउमय चिङाकाय, ङाइ म्हरो लेखाताह्ङो ओउमयइ दोह पेमातो गाल बइसामा खाइनिलि। 19ओउमयको बिबादखे ओउमयको धर्मको बारेहाङ र सितिखायो येसुकाय पावलइ जिउदोले मुना त दाह्य्ति तोओको बारेहाङ खेतो। 20इ बिसयहाङ गतहाइसा खेचा त दाह्य्ति ङाइ निर्नय जाह्ङ्सा खाइमालोझ्यान्ते, इ मुद्दाको बारेहाङ छलफल जाह्ङ्साको लागि यरुसलेम आल्सा नाङको इच्छ्या मुना या मुल या त दाह्य्ति ङाइ ओउकाय ह्वतालाङ। 21तर ओउइ ङाको मुद्दा रोमि माहाराजाइले न्याय जाह्ङ्ति बइपाताङ त दाह्य्ति बिन्ति जाह्ङोझ्यान्ते, ओउकाय माहाराजाकहाङ ल्होक्सा बन्दोबस्त जाह्ङ्सा खाइमाच्युकसम्म झेलकनहाङले सुरछ्या बइति गम्साकाय आग्या जाह्ङो मुनाङ।”
22अनि राजा अग्रिपासइ फेस्तसकाय तोआकान, “ङा लयइले इ मान्ताइ नोःओ साइसा चाहनाङ।”
ओउ त्याङा, “स्याह्ङ्ले नाङइ ओउको कुरा साइसा खाइतेनउ।”
23स्याह्ङ्लो पल्त राजा अग्रिपास र बर्निकि ताह्ङ्तो सम्मानकुस दाह्तिवाङाकाच र सेनाको हाकिमिलम र सहरको मुख्य मान्तालमकुसि सभा कोथाहाङ पोकाकाच। अनि फेस्तसइ आग्या जाह्ङापछि पावलकाय भित्र पोस्ति वानाथय। 24ओहाङसयको फेस्तस दाह्या, “राजा अग्रिपास र इहाङ हुमो भद्र-भलाद्मिलम, निङइ इ मान्ताकाय योसा खाइतेनानि, जुदा यहुदिलमइ इकाय सात्साले परना त दाह्य्ति यरुसलेमहाङमा इहाङमा ङाकाय बिन्ति जाह्ङो खेइतो। 25तर इ मान्ताइ सिसासम्मको दन्द दोःसाकाय दोह पेमातो गल्ति जाह्ङोमा ङाइ च्यउङल। र इ लयइले ङाको मुद्दा योसाकाय ङाइ माहाराजाकायले बिन्ति जाह्ङ्नाङ त दाह्य्ति दाह्योझ्यान्ते ङाइ इकाय माहाराजाकहाङले ल्होक्सा निर्नय जाह्ङालाङ। 26तर इ मान्ताको बारेहाङ माहाराजाकाय लेखति ल्होक्साकाय ङाकुसि दोह बिसेस कुरामा नाःल। ओउतझ्यान्ते ङाइ ओउकाय निङ भद्र-भलाद्मिलम र बिसेस जाह्ङ्ति नाङ राजा अग्रिपासको ङ्हा वानो खेनाङ। निङइ इको मुद्दाको जाच जाह्ङापछि लेखसाको लागि ङाइ केहि कुरालम दोःनाङ या त दाह्य्ति ङाइ आसा गमो मुनाङ। 27धइतिदाह्य्सा झेलकनहाङ परओ मान्ताको मुद्दाको बारेहाङ पेतोकुसि तुसलम तह्य्मातो माहाराजाको ङ्हा ल्होक्साकाय पेतो स्याउना त ङा म्हर्ङल।”
Currently Selected:
खबरदुत 25: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.