खबरदुत 22
22
1“ङाको यहुदि होयालम र आपालम, ङाइ लयको हक लेःति निङको ङ्हा तोसा बोःङो कुरा निङइ साइनु।” 2जब ओउमयइ लयमयको आर्मेइक भासाहाङ पावलइ नोःओ सायाकानि, ओउमय झन् ङइमात मुआकाय। अनि पावल नोःआ—
3“ङा, किलिकिया इलाकाको तार्सस सहरहाङ नाःओ यहुदि मान्ता खेनाङ, तर इ यरुसलेम सहरहाङखे ङा गमलिएलको स्यानराय दोःति हुर्कओ खेनाङ। ङाइ यहुदि नेम-कानुन र रितिथिति ओउको चरनहाङ मुतिले स्यानो खेनाङ। तेन निङ परमेस्वरको सेवा जाह्ङ्सा गच्युक ते म्रोतेआकाय, ङामा ओउच्युकले म्रोओ खेङतो। 4ङाइ प्रभुको ल्यामकाय सुइकार जाह्ङो जुदा मान्तालमकाय सिच्युकसम्मले सतावत जाह्ङालाङ। ङाइ गोय्चोलम र मोम्चोलमकाय पक्रति झेलकनहाङ काआलाङ। 5ङाइ तोओ इ कुरालम सत्य खेना त दाह्य्ति ताह्ङो पुजारि र ताह्ङो सभाको सदस्यलमइमा तोसा खाइनानि। ङाइ ओउमयकसयले दमस्कस सहरहाङ मुओ यहुदि होयालमकाय पक्रसा चिथि दोःआलाङ, ओउतझ्यान्ते ओउमयकाय पक्रआक्तिको यरुसलेमहाङ वान्ति सजाय बइसाको लागि ङा दमस्कस आलो खेङतो।
6ङा यात्रा जाह्ङ्धय दमस्कस द्याङ्तो दाहो खेङतो, हिदिङको बेलाहाङ अचानक लाङकासय वाङो ज्योति ङाको वरिपरि प्लिह्ङा। 7ङा साःहाङ तोनालाङ र ङाकाय एतदाह्य्ति तोधयमुओ यातज्यो हाउनय ङाइ सायालाङ, ‘सावल, सावल, नाङइ ङाकाय धइति ते सताउधय मुतेना?’
8ङाइ ह्वतालाङ, ‘प्रभु, नाङ सु खेसास्याउना र?’
अनि ओउ हाउनयइ जवाफ बयाताङ, ‘ङा नाङइ सतावो नासरतको येसु खेनाङ।’ 9ङाकुस मुओ मान्तालमइ ज्योतिपाय च्यवाकानि, तर ङाकुस नोःधयमुओ हाउनयखे ओउमयइ चिःसाले खाइनिलि।
10ङाइ ह्वतालाङ, ‘प्रभु, ङाइ दोह हाइसा परनाङ?’
अनि प्रभुइ ङाकाय तोसास्यावा, ‘च्योक अनि दमस्कसताङ आल। ओहाङ नाङइ दोह जाह्ङ्सा परना त दाह्यो जुदा कुरा नाङकाय तोलेना।’ 11ओउ प्लिह्ङो ज्योतिको कारनइ ङाइ च्यउसाले खाइङल, ओउतझ्यान्ते ङाको होयालमइ ङाकाय क्रुतहाङ चुम्ति दमस्कसहाङ वानाताङ।#खबर ९:३-८
12ओउ सहरहाङ निको यहुदि नेम-कानुन पालन जाह्ङो र ओहाङको यहुदिलमइ जोक्तो मान जाह्ङो यातचाक हननिया त मय्ङ्ओ धार्मिक मान्ता खेतो। 13ओउ ङाकहाङ वाङ्ति ङाको छेउसय चिङाक्तिको ङाकाय एत तोआताङ, ‘सावल हउ य, नाङइ फेरि च्यउसा खाइतेपनउ।’ ओउच्युक खेरले ङाइ ओउकाय च्यउसा खायालाङ। 14ओहाङसयको हननियाइ ङाकाय तोआताङ, ‘निको पुर्खालमको परमेस्वरइ लयको इच्छ्या चिःताक्साको लागि, र लयको धर्मि सेवक च्यउताक्सा र ओउको म्होतोङसय नोःओ हाउनय साइताक्साको लागि नाङकाय छ्युह्ङ्सास्यावो मुना। 15धइतिदाह्य्सा जुदा मान्तालमकाय नाङइ च्यवो र सायो कुरा तोसाकाय नाङ येसुको लागि साछि स्याउतेना। 16ओउतझ्यान्ते द्याह नाङइ दोहको लागि ल्युह्ङ्तेनउ र? च्योक र बप्तिस्मा लेःउ अनि प्रभुको मय्ङहाङ प्राथना जाह्ङ्ति लयको पापलमसय सुद्ध स्याव।’#खबर ९:१०-१८
17ओहाङसयको ङा द्याह्न्ति यरुसलेमताङ आलालाङ, अनि जब ङा मन्दिरहाङ प्राथना जाह्ङ्धय खेङतो, ङाइ यातज्यो दर्सन च्यवालाङ। 18ओउ दर्सनहाङ प्रभु येसुइ ङाकाय एत तोआताङ, ‘रेह्न्तोले यरुसलेम फेउ, धइतिदाह्य्सा इहाङको मान्तालमइ नाङइ ङाको बारेहाङ बयो गभाइकाय सुइकार जाह्ङ्निलि।’
19ङाइ तोआलाङ, ‘प्रभु, ङाइ सभाकिमलमहाङ आल्ति नाङकाय बिस्वास जाह्ङो मान्तालमकाय पक्रति झेलकनहाङ काओ र घानो कुरापाय ओउमयइ पेतोले चिःओ मुनय। 20नाङको साछि स्तिफनसकाय सात्तोक बेलाहाङ ङाकोमा सहमत खेलेतो, र ओउकाय सातो मान्तालमको क्रमनाय ल्युह्ङ्ति ङाले मुओ खेङतो।’
21तर प्रभुइ ङाकाय तोसास्यावा, ‘आल, धइतिदाह्य्सा ङाइ नाङकाय अरु जातिको मान्तालमकहाङ माहा लोक्तोले ल्होक्नेनाङ।’”
पावल र रोमि सिपाहिलमको हाकिमि
22मान्तालमइ पावलको कुराकाय उच्युकसम्म मात्र सायाकानि। अनि ओउमय हिह्ति एत दाह्य्सा फाःङाकानि, “इ मान्ताकाय सात्ति वाइनु! इखे इ ल्हाउदयबाङहाङ स्याक्तिमुसा ज्योओ मान्ता खेल।” 23ओउमय लयमयको क्रमनायलम हल्लाउधय र साः भुङ्ताक्धय हिह्तिले मुआकाय।
24रोमि सेनाको हाकिमिइ पावलकाय ब्यारेकभित्र आःल्नु त दाह्य्ति लयको सेनालमकाय आग्या जाह्ङाकान। अनि यहुदिलम धइति ओउको बिरोतहाङ हिह्ओ त दाह्य्ति चिःसाको लागि पावलकाय कोर्राइ स्राप्नु त दाह्य्ति तोआकान। 25जब ओउमयइ पावलकाय कोर्राइ स्राप्साको लागि छालाको लाइ पाःनाकानि, अनि पावलइ ओहाङ चिङ्तिमुओ यातचाक कप्तानकाय तोआकान, “कुनय अपराधहाङमा दोसि त दाह्य्ति प्रमानले स्याउधाङ्मालो यातचाक रोमि मान्ताकाय कोर्राइ स्राप्साको लागि, दोह निङको लागि नेम-कानुनइ अनुमति बइनउ र?”
26जब कप्तानइ इ कुरा सायाकान, ओउ सेनाको हाकिमिकहाङ आला र ओउकाय ह्वताकान, “नाङ दोह हाइसा बोःङ्धय ते मुना? धइतिदाह्य्सा ओउ मान्तापाय रोमि मान्ता खेना!”
27ओउतझ्यान्ते सेनाको हाकिमि वाङ्ति पावलकाय ह्वताथय, “ङाकाय तोचि, दोह नाङ रोमि मान्ता खेतेना र?”
पावल त्याङा, “मा, ङा रोमि मान्ताले खेनाङ।”
28अनि सेनाको हाकिमि दाह्या, “ङापाय नाःतो थेपो बइति रोमि मान्ता स्यावो खेनाङ।”
पावल त्याङा, “तर ङाखेपाय आमाको कोखसय नाःओहाङसयले रोमि मान्ता स्यावो खेनाङ।”
29ओउत साइनातासले पावलकाय घान्लाङ वाङो सिपाहिलम ओउकसय लोह्न्ताङ द्याह्नाकाय। अनि पावलपाय रोमि मान्ता खेना त दाह्य्ति चिःति सेनाको हाकिमिमा रया, धइतिदाह्य्सा ओउइले पावलकाय पाःन्सा र कोर्राइ स्राप्साको लागि आग्या जाह्ङो खेतो।
पावल यहुदि ताह्ङो सभाको ङ्हा
30यहुदिलमइ पावलकाय दोह कारनइ गाल बयाकानि त दाह्यो कुरा रोमि सेनाको हाकिमिइ चिःसाकाय इच्छ्या जाह्ङाकान। ओउतझ्यान्ते स्याह्ङ्लो पल्त ओउइ पावलकाय पाःनो साङ्ला फान्ताकाकान, अनि मुख्य पुजारिलम र ताह्ङो सभाको जुदा सदस्यलमकाय यात थाउहाङ हुम्साको लागि आग्या जाह्ङाकान। ओहाङसयको ओउइ पावलकाय लात्ति आःल्ति ओउमयको ङ्हा चिङताकाकान।
Currently Selected:
खबरदुत 22: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.