ROMANOS 10
10
1Ñani yo xiꞌin kuꞌva yo, ndinuꞌu ni ini i káꞌan i xiꞌin Ndioxi ta xáku ndaꞌvi ni i nuu ra xaꞌa na ñuu i Israel ya ná sikaku ra na. 2Xa xíni i ya vaꞌa ni íkan na, chíkaa ni na ndee xáa toꞌo na Ndioxi, sundi köo kúndaa ini na ndá ñaꞌa ku ya xíniñuꞌu ni na ikan na. 3Täꞌan kundaa ini na ndá kuꞌva kua nduu na, naꞌa na vaꞌa, na köo ka kuachi ku mií nuu Ndioxi. Ta ku̱ni na ikan na ya kúni mií na, süvi tá kuꞌva kúni mií Ndioxi kua. 4Sundi ley Ndioxi ya xa̱ꞌnda chiñu ra nuu na Israel xinaꞌa ta si̱xinu Jesucristo ya, yakan ndiꞌi naꞌa na kándixa Jesucristo, ta Ndioxi ndása vaꞌa ra na, ndúu na naꞌa, na köo ka kuachi kúu mií nuu ra.
5Ta saa ley Ndioxi ya ta̱a ra Moisés xinaꞌa káꞌan ya ndá kuꞌva kua nduu na, na vaꞌa na ka köo kuachi kúu mií nuu Ndioxi, káchi ya saa: “Naꞌa na kúchiñu xáa súvi ley Ndioxi, na ikán ku na kuchiñu nduu naꞌa, na vaꞌa, na köo ka kuachi ku mií nuu Ndioxi, tá tu xáa suvi na ya”, káchi ley Ndioxi. 6Sundi vitin kúndaa ini yo xaꞌa ya kándixa yo Jesucristo kua ndúu yo naꞌa, na vaꞌa, na köo ka kuachi ku mií nuu Ndioxi, ta Jesucristo íyo ra xiꞌin yo. Yakan köo xíniñuꞌu un kaꞌan un: “¿unku na ndaa vi nuu ndivi?” kachi un, chi tá káꞌan un saa ta ya kúni un sinuu un Cristo kixi ra nuu ñuꞌú yóꞌó kua. 7Ni köo xíniñuꞌu un nuu un nuú kúnu ni̱nu̱ ñuu ndíi, ya kaꞌan un xiꞌin Jesucristo ndaa ra koo ra xiꞌin un ñuu ivi yóꞌó. 8Saa chi tuꞌun Ndioxi káchi ya saa: “Yati ni íyo tuꞌun Ndioxi xiꞌin un. Yati ka vi íyo ya yuꞌu un xiꞌin nima un”, káchi tuꞌun Ndioxi ya ta̱a na xinaꞌa. Ta ya ikán ku ya káꞌan ndoso nde xaꞌa xiꞌin un vitin, ndá kuꞌva kandixa un Jesucristo ta ndikundikun un ichí ra. 9Tá ná kaꞌan un xaꞌa Jesucristo nuu ndiꞌi naꞌa ya kúu ra, Tata Yo Ra Chee ra xáꞌnda chiñu nuu un, ta kandixa un ra xiꞌin ndinuꞌu nima un ya si̱taku Ndioxi ra tañu na ndíi, ta saa sikaku Ndioxi yóꞌo̱. 10Chi tá kándixa un Ndioxi xiꞌin ndinuꞌu nima un, ta saa ndúu un tá íin naꞌa, na vaꞌa na köo ka kuachi ku mií nuu ra, ta sikaku ra yóꞌo̱ tá tu ndinuꞌu ini un káꞌan un kándixa un Jesucristo.
11Chi saa káꞌan tuꞌun Ndioxi ya ta̱a na xinaꞌa, káchi ya saa: “Ndiꞌi naꞌa, na kándixa ñaꞌa ta ndïko koo ini na xaꞌa ya kándixa na ra”, káchi ya. 12Saa chi iin káchi ndíkuiso vaꞌa Ndioxi ndiꞌi naꞌa, án na judío ku na án süvi na judío ku na. Saa chi mií Iva yo ku ra Chee ni ta ndíso chiñu ra xiꞌin ndiꞌi ni kuu naꞌa. Ta vaꞌa ni ra xiꞌin ndiꞌi naꞌa, na káꞌan xiꞌin ra, na ndúku ya mani nuu ra. 13Ta káꞌan tuku tuꞌun ra, káchi ya saa: “Ndiꞌi naꞌa, na ndáa ni ini xíni Tata yo, tá ndúku na ya mani nuu ra ta sikaku ra na”, káchi ya.
14Ná ndikani ini yo vitin, ¿ta unkua ikan na kana na ra, kaꞌan na xiꞌin ra, ta täꞌan kundaa ini na xaꞌa ra, ni täꞌan kuni soꞌo na tuꞌun xaꞌa ra? chi köo naꞌa ndituꞌun xiꞌin na xaꞌa ra. 15Ta ¿unkua ikan na kuꞌun na ndituꞌun na tuꞌun Ndioxi xiꞌin inka naꞌa, ta köo naꞌa tiꞌvi na kuꞌun na? Tá káchi tuꞌun Ndioxi ya ta̱a na xinaꞌa: “Vaꞌa ka vi kúni yo tá xa̱a naꞌa ndítuꞌun na tuꞌun vaꞌa xaꞌa Ndioxi xiꞌin yo”, káchi ya ta̱a na.
16Ta saa ni, süvi ndiꞌi na Israel ndi̱xiin kuni soꞌo tuꞌun vaꞌa xaꞌa Jesucristo. Tá i̱kan na xinaꞌa tá ndi̱kaꞌan ra profeta Isaías xaꞌa na xiꞌin Ndioxi, káchi ra: “Tata, ¡ni köo naꞌa xíin kandixa tuꞌun un ya káꞌan nde xiꞌin na!”, káchi ra Isaías.
17Ta xa xíni yo, xiꞌna xíniñuꞌu naꞌa kuni soꞌo na tuꞌun xaꞌa Jesucristo, saa kuchiñu na kandixa na ra. 18Sundi yeꞌe, ndákan tuꞌun i mií i, káchi i, ¿án sana köo ndi̱xini soꞌo na Israel tuꞌun Ndioxi? káchi i. ¡Ta süvi saa íyo ya! Chi xa xi̱ni soꞌo va na ya. Saa chi iin ñaꞌñu nuu tuꞌun Ndioxi ya ta̱a na xinaꞌa, káchi ya saa:
Xa ndi̱xita niꞌnu ndiꞌi tuꞌun Ndioxi nuu na ñuu ivi,
xa ndi̱xaa tuꞌun ra ndiꞌi ni kúu xaꞌa ñuu ivi,
káchi ya. 19Ta yeꞌe ndákan tuꞌun tuku i ndóꞌo̱: ¿Án köo ndíkundaa ini na Israel xiꞌin tuꞌun Ndioxi ya xi̱ni soꞌo na, túvi ndo? ¡Süvi saa íyo ya, chi ku̱ndaa va ini na xiꞌin ya! Saa chi tuꞌun Ndioxi ya ta̱a ra Moisés xinaꞌa, tá ndi̱kaꞌan ra tuꞌun Ndioxi, káchi ra saa:
Taxi i ndukuiñu ini ndo kuni ndo naꞌa, na inka ñuu, na köo kúu ñuu i, xaꞌa ya vaꞌa ikan i xiꞌin na.
Taxi i saá ni ini ndo xaꞌa ya vaꞌa ikan i xiꞌin na inka ñuu.
Saa kuniñuꞌu tu i naꞌa, na köo xíni, na köo ndíchi xini.
káchi Ndioxi xiꞌin na Israel 20Ta iin téteꞌe ndi̱kaꞌan tuku ra Isaías xaꞌa tuꞌun ya ndi̱kaꞌan Ndioxi xiꞌin ra, káchi ra:
Naꞌa na köo ndi̱nduku yeꞌe, ta ndi̱niꞌi na yeꞌe.
Naꞌa na köo ndákan tuꞌun xaꞌa i, ta ndi̱tuvi i nuu na.
káchi Ndioxi xiꞌin ra Isaías, ndi̱kaꞌan ra.
21Saa ndi̱kaꞌan ka Ndioxi xiꞌin ra Isaías xaꞌa na ñuu Israel, káchi ra saa:
“Iin nduvi ndaa ndi̱xiyo i tánii ndaꞌa i nuu na kixi na nuu i, ta köo ndi̱xiin na kixi na.
Soꞌo ni na, köo xíin na kundikun na yeꞌe”, káchi ra Isaías.
Currently Selected:
ROMANOS 10: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
