Baroma 7

Ebemeresi bàtengire mwa bucha bwe'Mwaso wa Musa

1Banyaketu, oku mutúla mwìshi eMwaso*, ene myasi náhonda kubabura, muîshi kubuya-buya. eMwaso* atúsa ebuashi kwa mundu mango mundu achíri'o. 2Bináli kuuma ne'mukasi ola ùhweribwe: oyu mukasi, emwaso énde ába amúminyirire kwe'ba mango oyu eba achíri'o. Si akaba oyu eba àngafa, wamukasi ánatenga era bufuli so'yu mwaso wabáa umúminyirire kwe'ba. 3Rero akaba oyu mukasi àngatolibwa na unji mulume mango eba achíri'o, ánerikibwa musingisi. Si akaba eba àngafa, oyu mukasi ánatenga era bufuli so'yu mwaso. Na akaba era àngatolibwa na unji mulume, àtangacherikibwa musingisi.

4Nenyu banyaketu, kubinali bacha ku mwabo. Kukulikana ne'myasi era yèrekere eMwaso* wa Musa, mwera mùli nga ba báfire mira, bushi mwabére mwa buuma ne'mubiri wa Kirisito iwáfaa. Mwérire mwátolibwa na unji mundu. No'yu mundu, iwômokaa mwa bafu, chasiya túnde twáira bya bìsimise Ongo. 5Bushi mango twábaa tuchíri twénjire twáira ekuhonda kwe'mubiri, eMwaso* wa Musa énde ásusa mwa ndanda setu emianyisa ye'kuira ebibi. Ne'i mianyisa ibi, era yéndee yákola mwa ndanda setu i'yátureteraa elufu. 6Si rero twàtengire mwa bucha bwo'yu Mwaso*, bushi kukulikana ne'myasi era yabáa itúminyire, twèra tùli nga ba báfire. Mwa bacha, twera tùngakorera Ongo mwa kukulikira enjira iyayaya, era yákoresibwa ne'Muchima Mubuya-buya, si àtachiri mwa kukulikira enjira yo'kwa mira era yákoresibwa ne'myasi era yǎnjikirwe mwa Mwaso*.

eMwaso wa Musa ne'bibi

7Chi twíraa twáteta kasi? eMwaso* wa Musa bìri bibi? Nânga chiro na hicha! Si ndàngamenyire ebibi chìri chiye, akaba eMwaso* àtangabere. Kanji ndàgamenyire ebuhuma-huma chìri chiye akaba eMwaso* àtangatechire mbu: «Uténdaa wáhumira ebyabene.»#7:7 Somaa Kutenga 20:17. 8Ebibi byábonaa enjira kurengera emuomba*, kwa kususa chira buhuma-huma mwa muchima wanyi. Bushi akaba eMwaso* àtangabere, ebibi bìngabere bifíre. 9Kwa mira, mango nábaa ndasa kumenya eMwaso*, nábaa nyìri muuma-uma. Si mango emuomba* áikaa, ebibi byera kulorekana'ko, 10nanyi nera kunafa. Aola, emuomba* ola wábaa ùnganyiretere ekalamo, era kwire ányiretera elufu. 11Bushi kurengera oyu muomba* ino'yu, ebibi byábonaa enjira ye'kunyengeera, ne'kunyita.

12Kubinali, eMwaso* atúla mubuya-buya. Ne'muomba* nao anátula mubuya-buya, kanji atúla àtungenene, kanji atúla mubuya. 13Rero, echindu chibuya chi chérire chányiretera elufu? Nânga chiro na hicha! Ebibi bi byányiretere elufu. Mwa bacha, byérire byánaloreka'ko kwa bináli bibi kanangana, mwa kurengera kwa chindu chibuya kwa kunyiretera elufu. Rero, kurengera emuomba*, ebibi byáchilosise kwa bináli bibi busese.

Emabi ménde málwisa emabuya mwa muchima we'mundu

14Twìshi kwe'Mwaso* ìri myasi ya muchima, si nyono nyináli mundu wa mubiri, bushi náusibwe mira chasiya nyíbe kaungu* ke'bibi. 15Kubinali, bya nénde náira ndàbîshi. Bushi bya nénde náhonda kuira, atá bi nénde náira. Si bya nyitúla nyiáyire, bi nénde náira. 16Na akaba bya nyitúla nyiáyire bi nénde náira, echera chilósise kwa nemérere kwa Mwaso* atúla mubuya. 17Rero, àtachiri nyono nyi nénde náira ebyera, si ebibi bya bitúla mwa ndanda sanyi bi byénde byáira'bi. 18Bushi nyìshi kwa kutáli chibuya chisibya cha chitúla mwa ndanda sanyi, kukuteta mbu mwa ndanda sanyi nyináchiberere mundu wa mubiri oshâo. Kubinali bacha, bushi nyitúsa emuchima we'kuhonda kuira emabuya, si ndàala kuira'mo. 19Bushi emabuya ma nénde náhonda kuira, atá mu nénde náira. Si emabi ma ndáhonda kuira, mu nénde náira. 20Rero, akaba nénde náira bya ndàsimire kuira, àtachiri nyono nyi nénde náira'bi, si ebibi bya bitúla mwa ndanda sanyi bi byénde byáira'bi.

21Chechine chi nérire námenyerera kanangana: mango náhonda kuira emabuya, unao-unao nánachichingira naírire emabi. 22Mwa muchima wanyi, nénde námoera eMwaso* wa Ongo. 23Si nyiséne kwa mwa mubiri wanyi mutúla unji mwaso ola wénde wálwisa eMwaso* ola nyitúla nyisímire. No'yu mwaso ányiirire kuba mundu wa mulisi we'mwaso we'bibi ola wénde wákola mwa ndanda sanyi. 24Nyono nyìri mwânya! Nde i'ukányinunula kutenga mwo'no mubiri we'kunyeka mwa lufu? 25Ongo atóngwe kurengera Enawetu Yesu Kirisito!

Rero, kurengera ebwenge bwanyi, nyìri kaungu* ke'Mwaso* wa Ongo. Si kanji bushi nyináli mundu wa mubiri, nyìri kaungu* ke'mwaso we'bibi.

Currently Selected:

Baroma 7: tbt

Highlight

Copy