Baroma 6

Ekufa ne'kuba muuma-uma ala'uma na Kirisito

1Rero, chi tutétaa? Tuéndekeraa kuba mwa bibi chasiya ebonjo bwa Ongo buéndekere bwáluwa? 2Nânga chiro na hicha! Mwa myasi era yèrekere ebibi, tubano tùli nga ba báfire mira. Rero kute tùngahuba kanji kuba mwa bibi? 3Si mwìshi kanangana kwa tuboshi twábatisibwaa, chasiya túbe mwa buuma na Yesu Kirisito. Na mwo'ku kubatisibwa, twèra kwire twába mwa buuma nai kurengera elufu lwai. 4Rero mwa kubatisibwa, twábaa nga'ba bafíre na kutabwa ala'uma nai, chasiya ngo'kwa Kirisito* ômwolibwaa mwa bafu kwa buashi bwe'ngulu ya Tata, netu kuno'ku tuáte kalamo kayayaya.

5Akaba twabáa mwa buuma nai kurengera ekufa ngo'kwa nai afáa, kuno'ku ku tukánaba mwa buuma nai kurengera ekwômolibwa ngo'kwa nai ômwolibwaa. 6Twìshi kwe'mibere yetu yo'kwa mira yamányikibwaa kwa musalaba ala'uma na Kirisito*. Mwa bacha, ei mibere ye'bibi yàhandulibwe, chasiya tùtachibaa tuungu* twe'bibi. 7Bushi emundu ákafa, énde ábona ebuhuru bwe'kutenga mwa bibi. 8Rero, akaba twáfire ala'uma na Kirisito*, twéte ebwemeresi kwa netu tukáata ekalamo ala'uma nai. 9Twìshi kwa Kirisito* ômókire mira, atákanachife, ne'lufu lùtachete buashi era luulu sai. 10Mwa kufa, áfaa euma oshâo kwa kuhandula ebuashi bwe'bibi. Rero era àli muuma-uma, bushi na Ongo. 11Nenyu kuno'ku: mwa myasi era yèrekere ebibi, mundaa mwáchitola nga ba báfire, kanji nga ba bàli bauma-uma bushi na Ongo, kurengera ebuuma bwenyu na Yesu Kirisito.

12Rero, mùtachêmerera ebibi kunde byáata buashi kwa mubiri wenyu we'kufa, mwa kunde mwákulikira ebuhuma-huma bwai bubi. 13Muténdaa mwâna ebitera bye'mubiri wenyu kwa kuira ebibi, mwa kubikoresa nga bindu bya kuira mabi. Si mundaa mwáchana mubeine kwa kukorera Ongo nga bandu ba bômolibwe, mwa kunde mwákoresa ebitera bye'mubiri wenyu nga bindu bya kuira myasi era ìtungenene. 14Ebibi biténdaa byáchiata buashi era luulu senyu, bushi mùtachiri era bufuli se'Mwaso*, si mwera mùli era bufuli se'bonjo bwa Ongo.

Ekuíra emyasi era ìtungenene

15Chiye chi tutétaa kasi? Tuéndekeraa kunde twáira ebibi bushi tùtachiri era bufuli se'Mwaso*, si era bufuli se'bonjo bwa Ongo? Nânga chiro na hicha! 16Mwìshi kanangana kwa mango mwénde mwáchana kwa kukorera mundu murebe nga tuungu* twai, mwénde mwáira ngo'kwa àtechire. Aola mwénde mwánaba kanangana tuungu* twai. Rero akaba mùngaba tuungu* twe'bibi, ebusinda lunáli lufu. Si akaba mùngende mwáira ngo'kwa Ongo àtechire, ebusinda kunali kuata mibere era ìtungenene. 17Ongo atóngwe, bushi kwa mira mwábaa tuungu* twe'bibi, si rero emyasi era mwákangirisibwaa, mwera mwénjire mwáira ngo'kwa ìtechire kwa muchima wenyu woshi. 18Mwàtengire mwa bucha bwe'bibi, mwera mùli tuungu* twe'myasi era ìtungenene. 19Náhambala nenyu nga mundu, bushi nyìshi ekuina emisi kwenyu. Kwa mira mwéndee mwáchana busese nga tuungu* mwa kunde mwákoresa ebitera byenyu kwa kuira emyasi era yéndee yábaka esinga, na kuira emabi. Ebi byoshi, bi byéndee byátuma mwáata mibere era ìtasimise Ongo. Kuno'ku ku mwiraa mwénde mwáchana kuba tuungu* mwa kunde mwáira emyasi era ìtungenene, chasiya emibere yenyu índe yásimisa Ongo.

20Mango mwábaa muchiri tuungu* twe'bibi, ekuíra emyasi era ìtungenene kwábaa kutabêrekere. 21Rero, mutoloke muchiye mwéndee mwábona mwa kuira emyasi era yera yábeta honyi lwarero? Bushi ebusinda bwe'i myasi lùli elufu! 22Si rero mwérire mwátenga mwa bucha bwe'bibi, mwera mùli tuungu* twa Ongo. Mwera mwéte emutoloke we'kuata mibere era ìsimise Ongo. No'kwa businda, mukábona ekalamo ke'suku ne'mango. 23Bushi emukosi we'bibi énde álipibwa elufu. Si emuhobore ola Ongo énde âna yeke, kali ekalamo ke'suku ne'mango kurengera ebuuma bwetu na Enawetu Yesu Kirisito.

Currently Selected:

Baroma 6: tbt

Highlight

Copy

Want to have your highlights saved across all your devices? Sign up or sign in

Learn More About Echilaano Chiyayaya