Baroma 5

Yesu Kirisito átuhubise mwa buuma na Ongo

1Kubinali, Ongo átuirire kuba bandu ba bàtungenene era muhondo sai kurengera ebwemeresi. Rero twera tùli mwa bôlo nai kurengera Enawetu Yesu Kirisito. 2Na kurengera obu bwemeresi, Yesu átweresise ebuashi bwe'kuchifunda ofu ne'bonjo bwa Ongo. Na mwo'bu bonjo, mu tunáchiri lwarero. Bushi no'ku, twénjire twámowa, bushi twéte emunyiiro kwa tukábona kwa bulangare bwa Ongo. 3Ala'uma ne'bi byoshi, kanji twénjire twámowa mwa malibuko ma twárenga'mo. Bushi twìshi kwa amu malibuko mu ménde mátuma twáata ebushibirisi. 4No'bu bushibirisi bu bwénde bwátuma twába bandu ba kuchinyiirwa kanangana. No'ku kuchinyiirwa kukwende kwátuma twáata emunyiiro. 5No'yu munyiiro àtatufuna emuchima, bushi Ongo ábikire enzii yai mira mwa michima yetu kurengera eMuchima Mubuya-buya ola átweresise.

6Bushi kwa bihangi bya Ongo ábaa ákunganyise mira, na mango twábaa tuchíri tutéte chiro na misi isibya, Kirisito era kufira ebandu be'mabi. 7Bitúla bisibuire kwa mundu kwêmerera kufira eunji, chiro àngaba mbu oyu unji àtungenene. Ngaba mundu àngachâna kufira eunji ola wénde wáira emubuya. 8Si Ongo yeke álosise changanama kwa atúla àtusimire busese, bushi mango twábaa tuchíri bandu ba bibi, Kirisito era kufa bushi netu. 9Rero kurengera emikira yai, Ongo átuírire kuba bandu ba bàtungenene. Echera chàlosa kanangana kwa Yesu akátununula mango Ongo akáchinjibusa ebandu mwa bute bwai. 10Kubinali, mango twábaa tùli barenda ba Ongo, era kutuhubya mwa buuma nai kurengera ekufa kwe'Mwana wai. Rero bushi twera tùli mwa buuma nai, akátununula kurengera ekalamo ko'yu Mwana wai. 11Kanji atá ebyera oshâo, si twénjire twámoera Ongo kurengera Enawetu Yesu Kirisito, iwérire wátuhubya mwa buuma na Ongo.

Atamu na Yesu Kirisito

12Rero, bushi na mundu muuma,#5:12 Mundu muuma ola wâmaanyibwa anola àli Atamu. ebibi byêngiriraa mwa butala. Ne'bi bibi byera kureta elufu. Mwa bacha, elufu lwáikire kwa bandu boshi, bushi boshi báirire bibi. 13Ebi bibi byábaa byera binátula mwa butala mango Ongo ábaa àtasa kwêresa Musa eMwaso*. Si bushi eMwaso* ábaa àtasa kuba, Ongo ábaa àtahola'bi. 14Si kutengera ku Atamu kuikira ku Musa, elufu lwéndee lwánaikira ebandu boshi. Lwéndee lwáikira ne'bandu ba bàtairire bibi, ngo'kwa Atamu áiraa bya Ongo ámwangaa mbu àtairaa. Oyu Atamu ánabaa ehuhi lyo'la wábaa wěmire kubaha. 15Si elwêmbo lwe'buha lwa Ongo énde ana, lutáli kuuma ne'chi chibi cha Atamu chiro na hicha. Bandu banene báfaa bushi ne'chibi cho'yu mundu muuma. Si ebonjo bwa Ongo bweke bunátula bunene busese. No'lu lwêmbo lwe'buha lwêresaa bandu banene kurengera mundu muuma, Yesu Kirisito, lu'lwète mufa munene. 16Kanji elwêmbo lwa Ongo lutáli kuuma ne'myasi era yárechibwaa ne'chibi cho'yu mundu muuma. Bushi echi chibi chai chi chátumaa ebandu báishirwa elubanja mbu bachínjibusibwaa. Si elwêmbo lwe'buha lwa Ongo énde âna lu lwérire lwátuma ebandu bátunganana era muhondo sai, chiro àngaba mbu emabi mabo màli manene. 17Kubinali, elufu lwáataa ebuashi kwa bandu kurengera mundu muuma, bushi ne'mabi mo'yu mundu muuma. Si kanji kurengera mundu muuma, Yesu Kirisito, ebandu bénde bábona bindu binene kutenga era mwa Ongo. Ende áfira'bo bonjo bunene, na kubatola nga ba bàtungenene. Kanji kurengera oyu mundu muuma, Yesu Kirisito, bakáata ekalamo na kwîma.

18Rero ngo'kwa chibi cha mundu muuma, Atamu chátumaa ebandu boshi báchinjibusibwaa, kuno'ku ku emulimo ola ùtungenene wa mundu muuma, Yesu Kirisito, átumire ebandu boshi bátunganana era muhondo sa Ongo na kubona ekalamo. 19Na kukulikana no'kwa mundu muuma, Atamu, iwánanaa kuira kwa Ongo àtechire, bandu banene bérire bába bandu ba bibi. Kuno'ku, kukulikana na mundu muuma, Yesu Kirisito, iwáiraa kwa Ongo àtechire, bandu banene bakére báanjibwa nga ba bàtungenene era muhondo sa Ongo.

20eMwaso* áikaa, era kutuma emabi máluwa. Si ala bibi byábaa byáendekera byáluwa, ebonjo bwa Ongo nabo bwera kunaendekera bwáluwa busese. 21Rero, kukulikana no'kwa bibi byábaa byete ebuashi bwe'kwîta, kuno'ku ku ebonjo bwa Ongo butúsa ebuashi bwe'kuíra ebandu kuba ba bàtungenene, na kutweresa ekalamo ke'suku ne'mango kurengera Enawetu Yesu Kirisito.

Currently Selected:

Baroma 5: tbt

Highlight

Copy