Baroma 10
10
1Banyaketu, cha nénjire náhonda kwa muchima wanyi woshi na kwéma Ongo bushi ne'Bayuta chi chechine: nabo banúnulibwe. 2Nyeine nàchilorere kanangana kwa bète bushiru bunene mwa myasi ya Ongo. Si obu bushiru, bàteshi kute bàngakoresa'bo. 3Batámenyereraa kute Ongo énde áira ebandu kuba ba bàtungenene era muhondo sai. Bera kwire báchihondera yabo njira era ìngatuma bàtunganana era muhondo sa Ongo. Mwa bacha, bera kunana kukulikira enjira era Ongo énde áira mwe'bandu kuba ba bàtungenene. 4Bushi Kirisito áisise eMwaso* wa Musa kwa nzinjiro yao, chasiya chira mundu ola wèmerere énde átolibwa ngo'la ùtungenene era muhondo sa Ongo.
Chira mundu ola wèmerere Enawetu Yesu angánunulibwa
5Enera i'myasi Musa áanjikaa era luulu se'kuhonda kuba mundu ola ùtungenene era muhondo sa Ongo kurengera eMwaso*: «Ola wénde wáira kwa miomba* ye'Mwaso* itúla ìtechire, angábona ekalamo kurengera oyu Mwaso*.»#10:5 Somaa Balawi 18:5. 6Si bacha ku eMaanjiko matúla màtechire era luulu se'kutunganana era muhondo sa Ongo kurengera ebwemeresi: «Uténdaa wáchibusa mwa muchima wao mbu: ‹Nde i'ungéruka kwa nguba?›» (Kukuteta mbu kwândaasa Kirisito* àtenge'ko.) 7Nesi uténdaa wáchibusa mbu: «Nde i'ungândáalaa era kusimu?» (Kukuteta mbu Kwérusa Kirisito* aténge mwa bafu.) 8Ei myasi, kute ìtechire? Ìtechire mbu: «eChinwa cha Ongo chìri ofu nao, chìri mwa bunu bwao, no'mwa muchima wao.»#10:8 Somaa Bukengere 30:14. Echi Chinwa, àli emwasi ola twénjire twáhubanganyisa ebandu era luulu se'bwemeresi. 9Akaba ùngateta mwa bunu bwao weine mbu Yesu i'Enawetu, na kwêmerera mwa muchima wao kwa Ongo ámwomolaa mwa bafu, ungánunulibwa. 10Ola wèmerere kwa muchima wai woshi, Ongo énde ámuira kuba ola ùtungenene era muhondo sai. Na mango emundu énde áteta mwa bunu bwai yeine kwa emérere, Ongo énde ámununula. 11Bushi eMaanjiko Mabuya-buya matúla màtechire mbu: «Chira mundu ola umwêmerere atákafunyike emuchima.» 12Mwa bacha, kutachiri Bayuta, kutachiri na ba bàtatula Bayuta, bushi Enawetu tuboshi análi muuma. Kanji énde áahanyira busese boshi ba bénde bámwěma. 13Ebyera bikulikene no'kwa Maanjiko Mabuya-buya matúla màtechire mbu: «Chira mundu ola ungénde wěma Enawetu, angánunulibwa.»#10:13 Somaa Yoweri 3:5.
14Rero, kute bangěma Enawetu ola bàteméreraa? Na kute bàngamwêmerere, no'ku bàtafuraa kûmva kwa myasi yai? Na kute bàngomvire kwa myasi yai, kutáli no'la wábahubanganyisa'i? 15Na kute bàngahubanganya akaba bàtatumirwe? Ei myasi ikulikene no'kwa bitúla byǎnjikirwe mwa Maanjiko Mabuya-buya mbu: «Ekuika kwe'bandu ba báreta emyasi ibuya-buya, lutúla lumoo lunene!»#10:15 Somaa Isaya 52:7. 16Si chiro bacha, atá ebandu boshi bu bêmereraa oyu Mwasi Mubuya-buya. Ebyera bikulikene no'kwa murebi* Isaya átetaa mbu: «Enawetu, nde iwèmereraa emyasi era twàhubanganyaa?»#10:16 Somaa Isaya 53:1. 17Mwa bacha, ebwemeresi bwénde bwátengana ne'kûmva emwasi. No'yu mwasi, chìri echinwa cha Kirisito*.
18Rero nábusa: eBayuta bàtomvaa kwo'yu mwasi? Nechi, bòmvaa kuo! Bushi eMaanjiko Mabuya-buya matúla màtechire mbu:
«Emirenge ye'bandu ba bénde báhubanganya,
yòmvikere mwa butala boshi.
Emyasi yabo, yaíkire kwa nyinda soshi se'butala.»#10:18 Somaa Saburi 19:5.
19Kanji nábusa: eBaisiraeli bàtamenyereraa? Bushi Ongo ábaa átechire mira kurengera Musa mbu:
«Nyingábaira múnde mwáfira emufula ebandu ba batá lubaa kanangana.
Nyingábaira múnde mwáfira ebute ebandu ba batéte bwenge.»#10:19 Somaa Bukengere 32:21.
20Kanji Ongo ábaa átechire mira kurengera murebi* Isaya mbu:
«Ebandu ba bábaa batányihonda, bu bérire bányibona,
nàchilosise kwa bandu ba bábaa bàtanyibusa mwasi.»#10:20 Somaa Isaya 65:1.
21Si bacha ku Ongo àtechire era luulu se'Baisiraeli:
«Emushi woshi, nabáa nénjire na náteya emino sanyi kwa bandu ba bàtaira kwa nàtechire,
kanji bénde báenzanya ebwaka.»#10:21 Somaa Isaya 65:2.
Currently Selected:
Baroma 10: tbt
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc.
