Mikolo ye'ndumwa 22

1«Emu batata na banyaketu, mǔmvirisaa bya náhonda kuteta era luulu sanyi nyeine era muhondo senyu!» 2Abu bandu, mango bômvaa kwa mwa Chieburania mu Paulo áteta, bera kwire bánasira. Chasinda, era kubabura mbu: 3«Nyono, nyìri Muyuta, nyibutwa mwa musi we'Tariso, mwa chio che'Kirikiya. Si muno Yerusalemu mu nákuliraa. Kanji nábaa mwanafunzi* wa Kamaliyeri. Oyu Kamaliyeri iwányikangirisaa kubuya-buya kwa Mwaso* wa bahokulu betu atúla àtechire. Kanji nábaa nyitúsa bushiru bunene mwa myasi ya Ongo ngo'kwa nenyu muboshi mubwéte lwarero. 4Kanji nábaa nénjire nálibusa busese ebandu ba bàkulikire enjira ya Enawetu. Nera kunde námina ebalume ne'bakasi ne'kubaúma mwa buroko. Na bauma mubo, bera kunde bánêchibwa. 5Bine náteta, emukulu-kulu we'bakuhanyi* ala'uma ne'chikembe choshi che'bashamuka be'Karubanda ke'Bayuta* nabo, bànganababura kwa bináli bya kanangana. Abola bu bábaa bénjire bányeresa ne'maruba me'kwêkera banyaketu Bayuta bo'mwa musi we'Tamasiki. Nábaa nénjire náya'mo chasiya nyimíne ebemeresi ne'kubareta ene Yerusalemu bachínjibusibwe.»

Paulo ábalikisa kute áhubaa mwemeresi

6«Lusuku luuma, mango sábaa sáhonda kuba saa ndatu sa mushi, ábere nera nyináli ofu ne'musi we'Tamasiki, unao-unao chilungere chinene chera kutenga kwa nguba na chálomekera ala nábaa nyìri. 7Nera kukumbaala, unao-unao, nera kûmva murenge muuma ányibura mbu: ‹Saulo! Saulo! Chi chátuma wányiribusa?› 8Nanyi mbu: ‹Woyo u'nde Waliya?› Oyu murenge nai mbu: ‹Nyono, nyi Yesu we'Nasareti nyíwalibusa.› 9Baliketu bánabaa nábalama nabo, bera kulola kwe'chi chilungere, si oyu murenge chiro bákômva kuo. 10Nera kwire nábusa kanji mbu: ‹Enawetu, chi němire kuira kasi?› Nai mbu: ‹Èmangaa úye mwa musi we'Tamasiki, omola mu bangákubwirira byoshi bya wěmire kuira.› 11Mwe'chi chihangi, nábaa ndàchisene bushi echi chilungere chábaa chànyisibire emeho. Abu baliketu, bera kwire bányiachirira kwa kuboko, báenda bányitandaisa kuikira mwa musi we'Tamasiki.

12«Mwo'yu musi, mwábaa mutúla mulume muuma mbu i'Ananiya. Oyu Ananiya, ábaa atúsa bushiru bunene bwe'kutunda eMwaso wa Musa. Kanji ábaa atúsa ngulu ibuya mwa kachi-kachi ke'Bayuta boshi ba mwo'yu musi. 13Ananiya era kuika ala nábaa nyìri, na ányibura mbu: ‹Munyaketu Saulo, uhúbaa kulola!› Unao-unao, emeho manyi kuna kusibukala, na námulola'ko. 14Era kuhuba kunyibura mbu: ‹Ongo wa bahokulu betu àkulondwere uményerere ekuhonda kwai, kanji ùchilorere na kwo'la wénde wáira bya bìtungenene, uchûmvire no'kwa murenge wai yeine. 15Bushi emyasi wàchiloreraa'ko na kuchumvira'ko weine, ungénde wáibalikisisa ebandu boshi. 16Rero, chi uchíri wálinjira? Wíree wêmanga, wéme Enawetu akubabalire ebibi byao, chasinda ubátisibwe.›

17«Era nyuma se'bi, nera kuhuba eYerusalemu. Ábere nyìri mwa Luhu lwa Ongo* néma, nera kuya mu byabunya biroto. 18Mwe'bi biroto, nera kulola ku Enawetu ányibura mbu: ‹Uténgaa mwo'no musi we'Yerusalemu fuba, bushi emyasi era ungénde wáhubanganyisa besha'mo, batáyemerere.› 19Nera kwǎkula mbu: ‹Enawetu, si bano bandu boshi banêshi kubuya-buya kwa nyínabaa nénjire násungula mwa mashenge me'Bayuta, naénda napunda ebemeresi bao ne'kubaúma mwa buroko! 20Na mango bêtaa Sitefano iwábaa wénjire wáhubanganyisa ebandu era luulu sao, nanyi nyeine nábaa nyináli'o. Nera kunába mwa lwango lwe'kumwita. Na ba bámwitaa, nyínabaa nábalangira enjimba.› 21Si Enawetu era kunyibura mbu: ‹Endaa, bushi nyingákutuma burerere, era mwe'bandu be'sinji mbaa.›»

Paulo ábura ebandu kwa nai atúla Muroma

22Ebandu bera kunômvirisa Paulo kubuya-buya. Si mango átetaa echi chinwa chisinda, bera kutangirisa báteta na murenge munene mbu: «Oyu mundu bàmwîtaa, bushi bitěmire mbu abáa muno butala!» 23Bera kubanda mwa twabwabwe busese, ne'kuumanga enjimba sabo mwa chanya, báulusanga ne'mukungu#22:23 Ekuúlusa emukungu mwa chanya kwábaa kulosa kwa bandu bàsibukire busese, kanji kwábaa kulosa kwa Paulo akámbire Ongo.. 24Ola mukulu-kulu we'basula era kwire ábura ebasula bai mbu běngisaa Paulo mwa chikali chabo. Era kubabura mbu bamúhutaa etuchi, chasiya abábure cha chátuma ebandu bámukuwa-kuwa bacha. 25Si mango abu basula bábaa bera bámuminaa chasiya bamúhute etuchi, era kubusa muuma mwa bakulu-kulu babo ola wábaa ùli aola mbu: «Munyíburaa akaba mwéte loso lwe'kuhuta eMuroma#22:25 Paulo ábaa Muyuta, kanji emwaso we'Baroma ábaa amwêmerere kuba Muroma. Somaa 16:37. busira kumenya akaba àkolire lubanja!»

26Mango oyu mukulu-kulu ômvaa bacha, era kuya kubura enawabo mbu: «eWaliya, wabáa wàuwirwe! Ola mundu kasi nai àli Muroma!» 27Enawabo ômvire bacha, kukwera kuya kubusa Paulo mbu: «Unyíburaa kanangana akaba unáli Muroma!» Nai mbu: «Nechi, nyìri Muroma!» 28Chasinda, oyu mukulu-kulu era kwire ábura Paulo mbu: «Nyono, mwa kuba Muroma, náesaa buteya bunene.» Si Paulo yeke, era kumubura mbu: «Nyono, nyìri Muroma wa kabutwa.» 29Unao-unao, ebasula ba bábaa báhonda kuhuta Paulo etuchi, bera kwire bámureka. Wamukulu-kulu nai, mango ámenyereraa kwa kasi Muroma yâminyisise, era kwôbaa.

Paulo átongana era muhondo se'Karubanda ke'Bayuta

30Ábere mwe'i mishangya, emukulu-kulu we'basula era kuhonda aményerere kanangana chi chatúmire eBayuta básitaka Paulo. Bushi no'ku, era kumuboola. Chasinda, era kuteta mbu ebakulu-kulu be'bakuhanyi* ala'uma ne'Karubanda ke'Bayuta* koshi, bábuananaa. Chasinjire, era kureta Paulo ne'kumwemanza era muhondo sabo.

Currently Selected:

Mikolo ye'ndumwa 22: tbt

Highlight

Copy

Want to have your highlights saved across all your devices? Sign up or sign in

Learn More About Echilaano Chiyayaya