2 Bakorindo 9

Ekwâna na muchima muuma

1Nyiséne kwa kùtabetere mufa asibya, ekubǎnjikira era luulu se'lwêmbo lwe'kuya kuasa ebandu ba Ongo. 2Bushi nyìshi kwa mwěte muchima mubuya wàkuasa'bo. Nénjire náchitonga bushi nenyu era muhondo sa besha Maketoniya mbu: «Ebemeresi bo'mwa chio che'Akaya bàchikunganyise mira kwa kwâna kutengera mwa mwaka ola wàrengaa.» Mwa bacha, kurengera obu bushiru bwenyu, mwatúmire banene mubo nabo báata emuchima we'kunde bâna. 3Si chiro bacha, nàbatumirire bano banyaketu, chasiya ekuchitonga kwetu bushi nenyu kutalorekanaa'ko nga kandu buha. Bushi no'ku, náhonda mwíkale mwàchikunganyise kukulikana no'kwa nàtetaa. 4Bushi akaba nyingábaha eyi mwenyu ala'uma na besha Maketoniya, chasinda twánababuana mùtachikunganyise, aola tungáfa honyi busese kukulikana no'kwa twabáa tùbalangalire. Anabe nenyu mubeine mungánafa'si.

5Echera chi chátumaa náanyisa kwa byěmire nyibúre bano banyaketu bànyihondorere eyi mwenyu tanga, chasiya báye kukunganya elwêmbo lwa mwaláanyaa. Aola, lungába lwàkunganyisibwe mira, ne'chi chi chingálosa kwa mwànaa'lo na muchima muuma, si mùtanaa'lo na michima ebiri.

6Mundaa mwákengera ene myasi: Emundu ola wáinga bieke, angáshebula bieke. No'la wáinga binene, angáshebula binene. 7Chira mundu ěmire kunde âna kukulikana no'kwa abáa aányisise mira mwa muchima wai, busira businane kanji busira kuchichikibwa. Bushi Ongo atúla asímire emundu ola wâna na lumoo. 8Ongo éte ebuashi bwe'kubaahanyira mwa njira soshi, chasiya múnde mwábona byoshi bya mùlaire'ko esuku soshi. Kanji mungáendekera kuata binene busese kwa kunde mwákola chira mulimo woshi mubuya. 9Echera chìkulikene no'kwa bitúla byǎnjikirwe mwa Maanjiko Mabuya-buya mbu:

«Êresaa ebakene bindu binene.

Akánaendekera kunde áira bya bìtungenene esuku ne'mango.»#9:9 Somaa Saburi 112:9.

10Ongo iwénde wêresa emuinzi embuto, kanji iwénde wêresa ebandu ekalyo.#9:10 Somaa Isaya 55:10. Rero nenyu, angánaberesa embuto, na kunde áluya'i na kumesa'i, chasiya ekuíra kwenyu bya bìtungenene, kunde kwéka bifuma binene. 11Mwa bacha, Ongo angábaira kuba baare mwa bindu byoshi, chasiya esuku soshi múnde mwálosa emuchima we'kwâna. Aola, bandu banene bangénde báteta mbu akoko kali chumbi era mwa Ongo bushi ne'lwêmbo lwa twénjire twábaisa'ko, lwa lwátenga era mwenyu. 12Bushi ono mulimo we'kuholola atéte mufa oshâo kwa kwêresa ebandu ba Ongo bya bàlaire'ko, si kanji mwe'i njira, banene mwa'bu bandu bangénde báteta mbu akoko kali chumbi era mwa Ongo. 13Bushi ne'mufa wo'yu mulimo, bandu banene bangénde bátonga Ongo mwa kulola kwa mwénjire mwáira kwa Mwasi Mubuya-buya wa Kirisito* àtechire. Kanji bangénde bámutonga mwa kulola kwa muchima we'kwâna ola mwěte mwa kunde mwêresa'bo kwa bikulo byenyu, mwêresa ne'banji bandu boshi. 14Kanji bangénde ba bêmera na nzii inene bushi ne'bubuya bunene busese bwa Ongo àběte'ko. 15Akoko era mwa Ongo bushi ne'lwêmbo lwai lwa lùtangalingamanyisibwa!

Currently Selected:

2 Bakorindo 9: tbt

Highlight

Copy

Want to have your highlights saved across all your devices? Sign up or sign in

Learn More About Echilaano Chiyayaya